无线艺人赵璧渝（Osanna）日前现身出席好友黄嘉乐的验车真人骚活动，专程到场力撑好友。两人自合作剧集《法言人》后已甚少碰面，赵璧渝大赞今次重聚非常难得，更对嘉乐跨界挑战深感佩服：“知道嘉乐参加真人骚，佢而家变成咗升级验车师傅，我觉得呢件事都系非常之难得，同埋好犀利，因为佢真系花咗两个月再多啲嘅时间去认真学呢件事，多一技傍身，好好呀！”虽然她自己早已考获驾驶执照，但暂时冇车：“我而家冇车，不过我都好钟意揸车嘅，但系香港停车场真系太贵喇！我努力紧，第日如果真系有需要买车，我就会揾佢帮手。”

手握三部剧集存货　赵璧渝副业做瑜伽颂钵导师

谈到演艺工作，赵璧渝透露手头上有三部剧集存货《模仿人生》、《玫瑰战争》及《风华背后》待播出，感恩表示：“托赖，上年都好努力工作！”并透露稍后亦会重返无线开拍新剧。在上半年未开剧的空档期，她积极拓展演艺事业以外的新领域，化身瑜伽及颂钵导师开设工作坊，问到生意如何，她说：“都开心嘅，而家都有几个定期会揾我做颂钵嘅客人，瑜伽就我有同其他人Crossover，自己一个力量唔系好够，夹埋其他人，香薰颂钵、香薰治疗，唔使咁辛苦。”

避谈咸猪手男艺人黑名单　力撑袁澧林勇敢发声树榜样

早前赵璧渝曾于专访中提及圈中的“咸猪手男艺人黑名单”，并提到有女演员被抽水后勇敢发声，被问到此事时，她就避谈指：“上次都讲咗啦，今次唔回应。”不过提到袁澧林（Angela Yuen）日前撰千字文揭露被男记者冒犯，以及遭言语性骚扰、矮化女性等行为，赵璧渝则力撑袁澧林是个好榜样：“首先我觉得佢好勇敢，亦都系一个好嘅榜样，佢去话俾人听，咁其实个重点唔系边一次或者边一个人，我谂佢都系带出呢个意思，要佢俾返个界线。我见钟雪莹都系咁讲，俾返个界线，清晰啲表达，唔好令到有误会发生，我谂呢个都系佢哋想表达嘅事，就未必话独立系一件事或者一个人。我自己都觉得好好呀，佢哋去Voice out，亦都好多人comment、like，呢个风气几好。”

认同女性应勇敢表达界线：大家工作都唔想又不愉快事情

问到若事情发生在自己身上会否出声，她庆幸未遇过，但若真的发生，会以冷静、成熟的态度去处理，亦认同事前沟通清楚是最好的解决方法。袁澧林曾于帖文写道：“公开发声的代价，往往沉重得令人难以承受。”对于有女演员可能怕影响工作机会或得罪人，被性骚扰都不敢出声，她表示：“我谂都要睇返件事嘅程度，或者系咪真实，系咪人哋系唔小心定系点，要搞返清楚先至去讲。你话工唔工作呢样嘢，大家都系出嚟工作，大家都唔想有不愉快事情发生，所以一开始大家倾清楚，都系一个好方法，好似阿Sa（蔡卓妍）咁讲。”

拍戏自带距离感未曾被冒犯　笑称收工一秒即闪：太沉醉自己世界

对于圈中常有男性被讲完一些不尊重人的说话后推搪“讲笑啫”，赵璧渝直言自己未遇过，可能与她个性比较有距离感有关：“我个人本身自己都系比较……我会带少少距离感。同埋你知一开工拍嘢，做戏我要投入，我会Focus咗喺自己个剧本度，准备个戏，所以我喺现场未必好留意到身边嘅人讲嘢，未必会听到，或者佢同我讲嘢，我都直头唔知，都冇理到，唔得闲理咁多嘢，变咗我就冇乜呢个咁嘅经历同埋hard feeling。”她更笑称大家收工通常都是“一秒闪人”：“可能我太沉醉喺自己世界，你知收工又大家一秒钟就走，大家都系咁，一收工就‘换衫！走喇！’所以真系冇。”

拍亲密戏必打烂沙盆问到笃　大赞男对手绅士从未被加戏

问到拍摄期间有否试过被突然加亲热戏？赵璧渝直言在无线拍戏制度分明，尺度与事前沟通皆十分清晰，加上自己性格容易紧张，每次拍亲密戏前都必定打烂沙盆问到笃：“TVB任何嘢，第一尺度，第二如果有啲咩比较亲密嘅戏，一定沟通清楚。同埋我系紧张大师，所以一有呢啲我一定会同对手、导演，问清楚阵间点样点样，我要点样做，点样配合，一定要倾得好清楚。我经验唔系好多，你睇返啲戏都知我唔系好多呢方面嘅经验，但系都有试过嘅，所以有嘅时候我一定会好紧张问清楚，当你倾清楚嘅时候，就冇呢件事发生，同埋遇到嘅对手都好好，呢个都系我好appreciate 。”她力撑历来遇过的男对手极具绅士风度，全是顾家好男人，问到哪位演员最好，她却抱歉表示：“未出街呀！出咗街我真系可以讲，但系真系未出街，所以唔讲得住。”