今年对VIVA的李晞彤（Carina）而言，绝对是勇往直前不断冲刺的一年。除了兼顾团歌，她先后推出两首Solo单曲，4月完成独脚音乐剧《Nancy恋噏show》，8、9月再接连拍两部电影；镜头以外还要经营社交平台，令她忙个不停。随著工作愈来愈多，身体也开始响警号，眼疮严重要割除、心脏不适……就连从未出现过的失眠问题都突然缠上她：“今年其实有好多时候我都系觉得好难，我都系觉得好辛苦。”不过她深明做艺人，永远不知道会红多久，有得忙总好过冇得忙，所以尽管身心已超出负荷，她还是想拼一点：“做我哋呢行，唔系成日都系冲刺嘅时候，但系我觉得我今年系，所以好多嘢我都会好想全力以赴。”
比起忙碌本身，另一压力是Carina担心自己能否当一个称职的VIVA队长，她解释当初自荐做队长的原因，是因为她对VIVA工作、愿景及发展蓝图最上心，而且行动力和亲和力亦是最高：“如果呢个团对于我嚟讲，个重要性系去到咁大嘅，咁我尽力去做、用尽全力去做队长呢一个角色，系会令到我最冇遗憾。”然而，当个人机会愈来愈多，她却反过来担心会否分薄了可以留给VIVA的时间，甚至因而感到内疚：“我未拿捏得到点样可以balance得好啲。”现阶段看来机会比队友多，Carina直言曾担心过几位感受，不过她深深感受到队友们其实很为她开心，亦明白机会是轮流的：“我觉得可能只系我行先，但系可能未来VALC solo，或者Ada solo或者Macy solo，佢哋都会有佢哋自己嘅时间，呢样嘢我好清晰！”而她亦相信，经历过启德舞台洗礼后，无论自己或VIVA，都一定会越来越好！
服装：MAX&Co @maxandco
发型：Jeremy Wong@Myos @myos_jeremywong
化妆：Deep Choi @deepmaleup
场地：@laybackcafe

从霸气《让路》到恋爱脑Nancy　新歌呈现最似自己的Carina

相比起第一首个人单曲《让路》那种主打霸气、女权与树立个人态度的风格，Carina的第二首Solo歌《半夜跳进你限动》显得亲切得多。她希望大家能透过这首歌更感受到贴近她本人的性格：“大家如果系未认识我嘅，呢一首歌绝对系你好好认识我嘅好机会。”

笔者犹记得第一次睇MV，脑海已即时浮现出Nancy，你或会问“Nancy是谁？”其实就是她早前演出的独脚音乐剧《Nancy恋噏show》的角色——一个热爱粉红色、恋爱脑的少女，Carina亦于访问中解答了笔者的疑问：“哦！其实系有少少inspired by Nancy㗎呢一首歌！”新歌一段间场中加插了一小段独白：“哎呀，我咁快揿入去，佢咪好快睇到我好快睇咗啰？”她解释这段小剧场心声的起源：“我谂𠮶排都系啱啱做完Nancy，始终未完全放低呢个角色，加上MV设计完全系我想像中粉红色、好有Nancy嘅感觉，所以将做戏嘅经历摆咗落去。”

队友听到起鸡皮　AI男友集齐三位男神与金毛犬

私底下的Carina极具少女心、酷爱Care Bears与可爱事物，她笑言希望呈现出Sweet得来又不会令人觉得“过分油腻想呕”的感觉，却大爆：“我啲队友第一次听《半夜跳进你限动》，佢哋系觉得顶唔顺，好cute，太cute，有𠮶种起晒鸡皮嘅感觉，当然之后都有fine tune到，都希望大家钟意呢一首作品。”

MV中另一个亮点，是与Carina甜美互动的“AI男主角”，她透露当初曾争取过要真人男朋友，但导演希望聚焦在她身上，并以AI营造梦幻幻想感。原本剧组提供的参考图似成熟型男孔刘，但并非Carina杯茶，那既然都可以用AI，当然要生成一个最完美的男士啦？她说：“孔刘对于我嚟讲都其实年纪就相对大啲，同埋佢个样都相对成熟啲，同埋唔系好系我个type，我就问佢会唔会可以有少少改动呢？咁我𠮶少少改动就系其实我钟意嘅男艺人，就有分别系我觉得似系我钟意嘅男朋友嘅形象，就系许光汉、南柱赫同埋朴宝剑，所以可唔可以试吓叫AI Gen 一个佢哋嘅mix出嚟呢？”这个被Carina命名为“Shawn”的虚拟男友，融合了她所有的少女幻想，要识煮饭、喜欢做Gym与打波、性格细心、肤色偏黑健康、齐浏海少少卷发、带点犬系男孩的亲切感，甚至要养一只金毛寻回犬等等，细节多到不得了。

Snapchat断心数学堂落泪　明恋半年无疾而终仍觉美好

《半夜跳进你限动》道尽了暧昧期的小剧场与攻防战，而Carina自己亦曾过经历过一段青涩的青春往事。她回忆15、16岁时的初恋暧昧，当时还未流行Instagram限时动态，大家都在用Snapchat“储心心”：“以前唔知倾到一个星期就有黄色心，倾够一个月就红色心，如果你有24小时冇覆佢，就会断咗个心，以前有啲咁样嘅无聊setting，𠮶时我同𠮶个男仔就系，佢有一日冇覆我，搞到我冇咗𠮶个心，我就好难过，就喺数学堂度喊！”

那是一段持续了半年的“明恋”，她坦承对对方一见钟情，虽然深入了解过，但最终却没有走在一起：“但系都因为冇一齐到，所以我而家嘅记忆都好美好，《半夜跳进你限动》𠮶个心态、𠮶个花痴，就系好符合𠮶阵时嘅我。”Carina忆述，相处后感觉到对方是被动型的“I人”，而自己能量高又喜欢说话，渐渐发现彼此理想型不同而慢慢Fade Out。而她第一个修成正果的男友，则是互相打闹型的欢喜冤家。既然她说之前的暧昧对象因为冇开始过，所以一切回忆都美好，反而一齐过就有可能分开，那暧昧是否比拍拖还更好呢？她却不同意：“暧昧嘅话，我觉得overall系刺激啲嘅，同埋你心情嘅起伏会大啲嘅，但系当如果你真系同一个人有一个好嘅关系嘅时候，𠮶个感觉系你可以完全喺对方面前做自己，或者对方可能已经变咗你best friend咁样，我觉得呢一种恋爱关系，其实可能比暧昧时期系更加sweet 㗎㖞，所以各有各。”

乐坛女新人多达20位　Carina视《造星》战友非对手

今年乐坛女新人可能是近年最多，独立歌手连同有唱片公司的歌手，加起来多达20位，当中更包括不少跟Carina一样从《全民造星IV》出身的熟悉面孔，例如COLLAR的苏雅琳Ivy与王家晴Candy、Lolly Talk的黄咏霖（阿蛋）与郑芷淇elka等等，对于年尾大家要角逐新人奖，Carina坦言：“反而觉得好开心呀！”她指有好几位都是从女团跑出来Solo，跟自己一样，这样的身份更有共鸣：“同佢哋，我觉得唔系真系有一个竞争嘅关系，纯粹我哋咁啱系同一条赛道上面，但系我觉得大家有互相明白嘅感觉多过去争啰。”

她续说，见到其余《造星》战友在团体以外建立自己的个人音乐版图，虽不容易，但相信会有另一种满足和快乐乐：“我知道可能Ivy、Candy佢哋本身同我一样，今年都系要做团歌，佢哋今年都系要拍戏拍剧，大家反而系会更加明白大家𠮶个工作嘅攰，同埋都有𠮶个压力。可能有啲一齐《造星IV》，有啲可能唔认识嘅，我觉得overall就系，我都有去听佢哋嘅歌嘅，我反而系觉得原来我哋好多人做紧嘅音乐风格都系好唔相似㖞，我好开心，同埋有咁多新嘅歌手，咁多新嘅种类嘅歌嚟听，所以我觉得overall对于乐坛系一个非常之开心嘅事！”

投自己一票做队长　甘当VIVA四人关系的胶水

除了以个人身份出歌，Carina同时亦是VIVA队长。VIVA并不像其他偶像团体，出道时已选好队长，而是在去年底才开始让同事、网民等选出队长，而四位成员当然也各有一票。在这次投票中，Carina也投了自己一票，问到为何不会礼让地说“哎呀，你做啦”，反而自动请缨，她直言：“我好似有谂过投Macy，好似有一瞬间有咁样谂过，但系最后我都系觉得，𠮶阵时嘅我，我觉得喺我哋四个入面，我系一个对VIVA嘅工作或者对成个VIVA嘅未来发展，好多vision上面，或者一啲幻想、计划，我系最上心。同埋我最亲力亲为嘅一个人，我嘅行动力都系最高，喺计划同埋同经理人、公司沟通嘅呢一个部份，所以去到最后点解投自己，就系因为我觉得如果呢个团对于我嚟讲，个重要性系去到咁大嘅，咁我尽力去做、用尽全力去做队长呢一个角色，系会令到我最冇遗憾，去到最后所有嘢都系我去带领嘅。所以我就觉得，件事喺我手上，我都会输得心服口服啲，但系我当然希望VIVA系越嚟越好！”

外界常以为队长只是在访问中担任发言人，但Carina背后做的，是维持四人关系的“胶水”，负责整合大家想法，令沟通更畅顺：“我哋四个嘅性格系超级唔同，可能意见上面嘅分歧，或者表达方式，有啲人嘅表达方式同埋有啲人嘅接收方式都系唔同，当大家有误差嘅时候，我就负责做令到大家都转换喺同一个语言度嘅人。”她亦感恩自己获三位队友信赖，无论是工作上或私人生活感到不开心，队友们都很常私讯她求助，“我都好开心自己可以成为一个咁样嘅空间，俾佢哋舒服咁样讲嘢嘅一个人，所以我觉得呢样嘢可能就系喺VIVA里面我最大嘅价值。”

VIVA未有起色已率先Solo　克服演戏恐惧建立自信

问到当初时如何决定让Carina做VIVA首位Solo成员，她说起初公司未落实Solo人选，讨论阶段时她甚至想过究竟在VIVA尚未上轨道时就派成员出单曲，究竟是否好事？她说：“对于𠮶阵时嘅VIVA嚟讲，其实我哋未有起色，大家都好自然觉得你一定系做好个团，你先做solo，但系我觉得我经理人有某一啲嘅位系讲得冇错，我哋当然系望VIVA好，然后出solo，呢一样嘢系最大路嘅一个推进方式，但系如果VIVA真系冇起色呢？我哋要等多几耐呢？所以对于𠮶阵时嘅心态嚟讲，去做solo𠮶个人系必须要有一个想令到VIVA都更多人认识嘅呢一个谂法，同埋呢个先至系做solo嘅最大原因。对于我嚟讲，就系因为我都好希望自己嘅作品又好，或者我自己嘅嘢又好，有回响带到返VIVA度。”

而最终当公司通知她出Solo时，她第一反应是：“吓？唔系呀嘛？”因为她本身是很享受团队合作，不过到正式出单曲后她再回望，当日有这个惊愕反应，或许只是信心不足，否定了自己能力：“𠮶阵时我真系冇呢个自信，而家我觉得自己慢慢锻炼到自己有一个意志，tough啲，同埋令到自己觉得‘其实我有能力去做到啰。’嘅呢个谂法。”

今年Carina除了团歌与两首Solo歌，4月她完成了独脚舞台剧《Nancy恋噏show》，8、9月又接拍了两部电影，她发现最大的成长就是学会面对自己的恐惧，跨出了从前最害怕的演技门槛：“我以前系好唔钟意做戏，我会觉得自己系冇可能做到戏，我系有恐惧，但系我觉得由我自己一个做好咗《Nancy恋噏show》，我已经觉得自己跨出咗第一步，有一个好大嘅学习，而家都学习紧，就系好好咁样去面对自己嘅压力。”

团歌Solo电影三线夹击　割眼疮心口不适收身体警号

多重身分的转换与高强度的工作，确实让Carina背负著庞大的心理压力，她直言：“今年其实有好多时候我都系觉得好难，我都系觉得好辛苦。”她坦言对VIVA队友带有一份内疚：“好多嘢都真系需要时间，我嘅时间又得咁多，然后我就觉得自己其实好似冇做到一个好称职嘅队长，反而喺我成为咗队长之后，我觉得呢样嘢系有少少觉得……我未拿捏得到点样可以balance得好啲，同埋我会觉得对于我队友嚟讲，都有少少Guilty。”当初决定要做VIVA队长时，Carina有著满满的使命感，然而到正式“上任”后，她放在团的时间却被个人工作分薄了，加上经营社交媒体的排版、修图、广告处理，种种原因都让她长期处于“机不离身”的极限状态，甚至快把她压垮！

身体最终在近月敲响警号，除了前所未有地失眠，Carina又透露：“尤其是喺呢一两个月，我系觉得自己身体都唔系咁好嘅，前两个月就开始生眼疮，我好少去到咁严重，我要去割咗佢。我前几日仲影紧杂志，我第二日就已经去咗割眼疮，因为真系太唔舒服，有粒嘢咁样；然后去到近期，依两个星期我系feel到我心脏都有啲唔舒服啰，佢又唔系心跳好快，系纯粹你feel到有啲揦住同埋好重，可能我朝早起身，我会觉得个心好似好重，企直唔到。”她先是问AI意见，最后决定去睇医生，不过心电图等一切如常，未有异样，她就猜想可能纯粹是压力太大所致。

做艺人，永远不知道会红多久，有得忙好过冇得忙，所以虽然Carina已感到有点超出负荷，但还是想拼一点：“做我哋呢行，唔系成日都系冲刺嘅时候，但系我觉得我今年系，所以好多嘢我都会好想全力以赴。”不过她都尽可能让自己在工作与生活间平衡，多做运动及陪伴家人，别把自己逼得太尽。

个人工作多到曾不敢填日程　坚信VIVA机会轮流来

身为队长，Carina的工作量与个人机会（如单曲、品牌指名合作）的确比其余三位队友多一点，但如果有看过VIVA节目的话，都知道她是一个很照顾队友感受的人，然而有时当客户指明只需要个别成员，她也不能控制。面对这种“个人资源较突出”的情况，问Carina有时会否不知如何面对队友，她相当坦白：“其实一开始呢，我系会有少少唔系好想mark呢啲schedule落我哋𠮶个群组嘅schedule，因为我觉得，如果我系佢哋，我都可能会有呢个感受，都会有一种担心。”她随即补充，她深深感受到队友们其实很为她开心，而自己内心也很清晰，机会是轮流的，Carina谓：“唔系代表今年我多啲，佢哋就冇机会嘅，唔系咁样嘅，我觉得可能只系我行先，但系可能未来VALC solo，或者Ada solo或者Macy solo，佢哋都会有佢哋自己嘅时间，呢样嘢我好清晰，但系当要同佢哋咁样真实相处嘅时候，我觉得都会有少少会谂一谂点样讲，或者点样令佢哋舒服啲，但系我觉得佢哋都好好嘅，佢哋都好理解我！同埋我觉得工作机会都唔系净系得我一个多咗嘅，我觉得overall大家都有多到，咁所以我谂慢慢都平衡到嘅！”

笔者记得几年前看过一集《调校你MIRROR》，邓丽欣（Stephy）正正问姜涛：“如果你面对有一个job，净系揾你、全部都揾你，你点面对其他冇job嘅member？”Stephy坦言在Cookies时，被选中有工作会很开心，但却不知道如何处理与队友的关系，觉得很尴尬，而姜涛就表示在自己能力范围内，会向客户推荐其他有能力的队友。团内人气与机会不均，是许多组合必经的难题，Carina直言这份顾虑在所难免，但她却保持乐观：“当你嘅队友对于你嚟讲都系好重要，同埋你都会Take Care佢哋感受嘅时候，系一定会有呢个（顾虑），在所难免。但我觉得之后会更加好，无论系我自己、佢哋个人，或者我哋四个as a group，我哋都会更加好，所以呢啲忧虑迟啲就唔会咁多㗎喇！”

启德首场伴舞未够喉　翌日获跳唱改写VIVA命运

谈到队友间的相处，真正改写VIVA四人命运的，是早前于启德主场馆举行的《25+英皇群星演唱会》！第一场表演时，VIVA仅以伴舞身份上台，四人虽然兴奋，但结束后也深感意犹未尽，她分享当时想法：“我觉得大家都有𠮶种唔舍得落台，但系唔想讲出嚟，因为我哋四个都系𠮶种‘我哋喺啱嘅时间就会有㗎喇！’我哋抱住呢个谂法，同埋唔想讲出嚟令到自己唔开心，始终我哋好珍惜呢个舞台，但系又会好想有更加多。但系𠮶刻都始终上咗啦嘛，都会同自己讲，我哋迟早会有机会嘅！”

怎料网民纷纷为她们抱不平，指希望可以睇到VIVA跳唱，翌日下午她们就突然收到通知，因rundown改动，可以在第二场上台跳唱团歌《Baby Savage》！Carina形容那峰回路转的瞬间，像电影情节般奇迹：“哗，原来呢啲嘢真系会发生㗎㖞？”她又透露，其实那星期没怎么排练《Baby Savage》，不过成员间的互信和默契而超出一切：“可能只系妆头完咗，临上台之前𠮶段时间可能对镜mark咗mark我哋就去，但系𠮶刻就系对你嘅队友同埋自己都有信心，就系‘我必须要做好呢件事！而我肯定隔篱𠮶个一定会做得好！’”

在宿舍同居时，四位不知VIVA能走多远，甚至想过把下年当最后一年做，就连做《La Vida》都抱住一个想做首歌去纪录四人关系的心态，而那次启德的震撼演出，却带来关键转捩点，她由衷地表示：“我相信大家系对于我哋冇乜expectation，其实冇乜人睇过VIVA嘅表演㗎，冇乜人知道我哋，可能只系听过我哋系英皇嘅新女团，我谂大多数嘅人应该连我哋四个系边个打边个都唔知㗎，我哋冇嘢输呀其实咁！我哋净系觉得‘我哋上去俾人睇吓我哋系咩料！’我哋系抱住呢个谂法，但系我只可以话，我觉得我哋嘅表演，只系会越嚟越好，好有呢个信心！同埋我觉得我哋下一次再踩上一个大台嘅时候，我哋会比启德做得更加好！”