《璀璨之城》今日于商场举行宣传活动，焦点之一为陈滢。早前她的一幕除衫戏成为热话，剧情讲到她为帮好姊妹陈晓华复仇，脱光并“腿张开”让张智霖饰演的官孝贤影裸照，尺度令观众哗然，通讯事务管理局更接获25宗投诉。而事后陈滢接受梁靖琪（Toby）网台节目访问时讲到这幕戏，Toby大爆：“听闻有导演猛咁俾人睇，话‘佢做到咁样㗎可以！’”陈滢当时有点尴尬，做出抹汗动作，不过今日她受访时，解释当时其实冇听清楚Toby说的话，表示：“其实唔可以咁样传，犯法㗎 ！未播之前系唔可以做呢件事，如果真系咁儿戏，唔净止我哋有睇过，其他人一定有睇过，所以冇发生过。”对于演出被投诉，陈滢指自己已尽演员本分，其他事控制不到，亦不同意外界所指剧集卖弄色情，又表示：“我唔希望大家将一半戏净系缩窄于女演员着紧啲咩服装，因为其实成段戏的而且确好难演，情绪亦都好复杂。”

陈滢在活动上以揽住高海宁（高Ling）方式预告下周剧情，问到有什么意思，她指自己今日特地穿著低胸西装，中性而散发女人味，“hint少少下个礼拜我会多少少自己特征透露出嚟，希望大家会钟意嚟紧呢个礼拜嘅戏。”至于是否表示角色是同性恋、双性恋，陈滢就大卖关子。而讲到她脱光让Chilam影裸照一幕成为热话，她在访问中否认这场戏为“牺牲”，她开心大家喜欢及讨论，但坦言不想大家只谈论其性感度，“成段戏的而且确好难演，情绪亦都好复杂，因为Sarah个角色系要完全放低自己所有嘢去演绎一个角色比官校贤去睇，令佢相信佢嘅一举一动，每句说话，只要握观效应，亦要扼杀所有观众，呢场戏真系好难影，所以当完成咗，大家睇完、钟意对我嚟讲都系好大鼓励。”她指这场戏最难是情绪，要在张智霖面前强作镇定去欺骗他，“拍完会有一个‘我完成咗喇！’我好Proud我自己可以完成咁难演嘅戏。”

虽然陈滢有重大突破，亦下足苦功，但最终外界将著眼点放在除衫戏，她理解每个人有不同看，认为观众有选择权，不过她自己就收到很多好友的鼓励和赞赏，赞她演得好和有进步。问到事前有否预计过自己孭飞的情节，遭观众投诉，她直言：“我系演员，我嘅职责、责任就系演好一段戏，至于呢段戏系几时播，喺边度播，唔系我控制范围之内。（记者：会唔会夜啲播放比较适合？）我做演员个只可以演好呢套剧，演好呢个剧本，见到场戏应该点样拍我就做到最好。如果呢套戏网上播，系咪就唔会咁话呢？都唔到我控制。”

Chilam曾透露本身以为除衫就完，谁知原来还要加“攞电话影裸照”情节，陈滢相信对方是讲笑：“佢点会唔知！我收到剧本嘅时候，判断自己想唔想演呢个角色之前已经收咗剧本，睇咗大概要拍啲咩，所以佢一定知道，可能搞吓gag啫。”陈滢又透露，监制对于画面呈现有征询其同意：“监制绝对有俾我approve咗先，佢话‘阿滢，到时会系咁样，你OK吗？你舒服吗？’我话OK，it looks good.”问到剧组中有冇任何人曾出口游说她加大尺度，陈滢思考逾10秒，再说：“我记得有一段戏我同美仪姐拍，要打嘅，有一段争执，𠮶段有啲意见话点样去打，我有input，想用某一个take，呢啲discussion或者想点样拍，导演会有、演员会有，我谂到嘅就系呢一场。”

有观众放大陈滢内衣的一幕，发现背影的内裤两次出现有分别，质疑是否有AI或替身，陈滢直认：“的而且确系，我知道网上版同电视版有少少唔一样，至于有咩唔一样？观众要自己留意，因为我都冇分析得太清楚。”《璀璨之城》开播以来被指多次大洒盐花、卖弄色情，陈滢强调不认同：“我都唔认同，我觉得呢套剧系反映人性，唔系净系开心𠮶面，有好多差嘅一面，变成恶魔嘅一面，人唔同时候会突然有恶魔同你讲话‘不如咁样咁样……’，你会思考点解自己有咁嘅谂法，但系人生系会发生，正如你会冲凉，必须要除衫，人生要做好多唔同嘅嘢同埋行为，只不过我哋套嘢系好现实咁将呢件事show咗出嚟。”

讲到Toby访问陈滢时在大爆，导演四处传阅陈滢的全裸片花，她指：“其实成段访问佢问我问题嘅时候，又冇好留意到呢一句，而我相信系冇发生到，我净系Focus去讲解我拍呢套剧嘅感受出嚟。（记者：你相信系冇传阅？）其实唔可以咁样传，犯法㗎 ！未播之前系唔可以做呢件事，如果真系咁儿戏，唔净止我哋有睇过，其他人一定有睇过，所以冇发生过。（问：会唔会私下传阅呢？）我觉得唔系，我明呢套剧有好多话题、回响，当我哋做演员出嚟宣传嘅时候，可能我哋讲嘅嘢，cut咗一句，净系听𠮶句你有好多遐想，或者发酵成另一个topic，大家讨论呢套剧我哋好开心，但系我最唔想嘅系我哋讲过嘅嘢会发酵或者扭曲成一个负面嘢，我哋做演员系想套剧好，唔系想套剧差。”对于今次之后，下次拍性感戏会否有所顾虑甚至不再接拍，陈滢表示视乎剧本有没有需要：“呢一套戏我做嘅所有决定，我嘅角色做嘅所有决定，我觉得系合理。”

最后，陈滢刚度过37岁生日，并发布多张庆生照，她说今年想过不一样的庆祝，飞去阳光与海滩的地方度假：“过往都系一班朋友去玩，吃喝玩乐，今次想健康啲，所以成个礼拜就做瑜伽、sound bowl，meditate，食啲健康嘅嘢，好早起身去游水、打坐，成个礼拜就系咁样过，返嚟就系觉得好健康。”IG所见，她捧著一大束鲜红色玫瑰，问是否追求者所送，或有冇男士趁机向陈滢表白，她甜笑说：“系有异性送花畀我嘅，系开心嘅，但系亦都有女士送花俾我，男女都有。有啲朋友都话唔知买咩俾我，我系好钟意花，所以𠮶晚就喺birthday dinner surprise我，成个area都好多花，都真系好开心。（记者：有冇啲有发展可能性？）下个礼拜回应你哋！”