《璀璨之城》今日于商场举行宣传活动，张曦雯（Kelly）未播出的一幕性感戏成为焦点，日前她在访问中透露自己知道这幕一shot过、不能借位，只穿内裤及大露背时感到很意外，并拒绝说：“No, I don’t think so. I am not going to do it.”之后张智霖、吴卓羲、陈维冠倾好后游说她，她心想：“点解冇同我倾？”剧集及后因改剧本停厂，再复工时又轮到江美仪及张智霖老婆袁咏仪做“说客”，最终张曦雯答允演出，但外界就认为众人是用群众压力向她施压，不过张曦雯今日（25日）与绯闻男友吴卓羲受访时，就强调是自己主动向江美仪、袁咏仪（靓靓）咨询，因三人拍毕《模仿人生》后成为好友，无所不谈，不希望大家误会两位前辈：“佢哋同我嘅friendship，我自己都好value，因为我讲嘅说话伤害到佢哋，我都好唔想。”至于张智霖曾笑指张曦雯是见到陈滢、陈晓华都有性感戏，激发斗心“唔执输”，她就否认：“冇冇冇，女演员一定唔会斗除衫！”

初收剧本对性感尺度有犹豫　澄清停厂与拒演无关

张曦雯与吴卓羲受访，张曦雯透露这幕戏将于剧集尾段播出，被问拍摄前是否很挣扎，她说：“我一收到剧本of course有hesitation，因为自己未试过，个尺度系性感嘅，所以𠮶一下我系say咗no。”不过她称自己并非去到现场才知道尺度：“唔系唔系唔系，其实剧本冇写明要着啲乜嘢，但系我嘅幻想……同埋唔系临场去倾，系拍之前几日去倾嘅。当我同佢讲我no嘅时候，大家已经揾到另一个方案去拍𠮶场戏。最后第一round冇拍系因为过两日真系停咗拍摄，但系完全唔系因为𠮶场戏嘅关系，只系种种因素，剧本嘅修改，我哋就暂停咗。”

主动请教江美仪袁咏仪非被施压　珍惜友情不愿前辈受伤害

她又澄清现场没有人向她施压，至于是否由江美仪及靓靓亲自游说，她指是自己主动请教两位：“美仪姐同靓靓，我哋系好friend，由我哋《模仿人生》，即系《璀璨之城》之前拍，都系我哋三个人一齐拍《模仿人生》，有个friendship喺度，佢哋亦都系好锡我、好照顾我嘅前辈，其实我咩都同佢哋倾，唔好讲话做戏定乜嘢，我personal嘅嘢，我嘅心事都成日揾佢哋倾偈。所以第二round去拍嘅时候，因为剧本系有修改，从角色出发，点解我会谂住再去问佢哋攞advice，其实唔止系性唔性感，因为𠮶场戏好多情绪，亦都对我嘅角色好重要，所以除咗场戏，我都有同佢哋倾其他场口，只系呢场戏我收集佢哋俾我嘅Advice，我有自己去衡量，从剧本出发，我觉得系合理。加上我哋停咗𠮶两个月，一路都同监制、其他演员keep in touch，因为我系第一次同呢个监制合作，喺pause𠮶段时间我哋都有联络，同其他演员又沟通多咗，个信任会同头𠮶round开工嘅时候唔同。种种嘢加埋，基于自己感受，最后拍呢场戏。”她又补充，感谢大家的关心和疼锡，但不想影响到两位前辈：“靓靓姐同美仪姐，因为佢哋同我嘅friendship，我自己都好value，如果因为我讲嘅说话伤害到佢哋，我都好唔想。”

吴卓羲分享拍《大唐双龙传》露股经历：有用就值得拍

问到吴卓羲有否畀意见Kelly，他指对方冇问，但就分享自己当年拍《大唐双龙传》都要露股：“我心里面，第一，𠮶场戏其实连带关系有好多嘢发生，可能有呢场戏发生嘅时候，后面嘅张力比较大啲。我觉得一个演员，佢肯做，当然系一个好专业嘅演员，我以前拍都有试过，就系朝头早话畀你听下昼要拍露pat pat，我都试过。因为冇剧本㗎，𠮶个系衍生出嚟，我哋𠮶时都守身如玉㗎，我同林峰谂谂吓，‘喂，点呀？’佢讲咗剧情话畀我哋两个听，我哋觉得系有用嘅，值得系咁样拍，出到嚟冇乜问题，又唔系唔见得人，所以就拍，呢个系演员需要嘅嘢。”

张智霖指被陈滢陈晓华性感激发斗心　张曦雯：女演员唔会斗除衫

至于Chilam在与陈滢的访问中，忆述自己曾游说张曦雯，指：“佢开头都say no，but到后期少少，当佢见到陈滢同晓华咁样，wait a minute……”当时主持人梁丽翘笑说：“我都唔好执输！”张智霖补充：“佢就话‘我可以’，所以，除咗戏里面咁精彩之外，其实佢哋戏外𠮶种斗心，我真系好崇拜。”问到会否觉得Chilam这个“雌竞”言论不妥，张曦雯表示：“冇冇冇，女演员一定唔会斗除衫！每个人，唔好讲演员，每个人都系做紧佢为个角色适合做嘅嘢，for𠮶个剧情，呢啲冇得斗。”

冇担心裸露戏被内部传阅　盼观众留意剧情勿著眼于性感度

近年无线剧集偶尔会加入AI元素，例如今次《璀璨之城》都有AI生成姜大卫年轻样貌，讲到其实裸露戏会否可以用AI，Kelly表示：“呢个我唔知㖞，我唔系好叻用AI gen嘢，所以我唔知而家可以做到点样。”对于梁靖琪（Toby）访问陈滢时大爆导演四围传阅陈滢的公裸片花，问张曦雯会否担心自己的性感戏也被幕后人员流传，她回应：“其实我拍𠮶时好安全嘅，我冇担心过呢样嘢，因为会打晒底，安全嘅情况下。”她预告自己这幕突破戏码约于17至18集播出，叫大家不要只著眼于性感与否：“你睇落去就会觉得呢个角色好惨，我觉得个重点完全唔系喺性唔性感，系𠮶个剧情推进，爱佢老公爱到几尽，可以几扭曲。”至于会否担心步陈滢后尘接获观众投诉，张曦雯坦言难以控制，但情节并不相同，最后，问到现时闹出风波，剧组会否删剪或“减盐”出街，她说：“呢个要大人决定，我唔清楚，当然希望可以播。”