江美仪前年（2024年）拍摄TVB综艺节目《一个好人》，落区做义工帮基层灭虫，岂料相隔两年后，灭虫组织负责人陈家骆（阿臣）近日多次发长文，指当日她与制作组只是“做骚”，江美仪日前向《01娱乐》表示：“唔系事实嘅嘢，唔回应啦，多谢！”后，也于社交平台引用鲁迅《自嘲》中的经典诗句“横眉冷对千夫指，俯首甘为孺子牛”表态；然而阿臣仍持续狙击对方，甚至闹埋节目编审。江美仪近日两次出席公开活动都以不同理由未有受访，先是17日的《善心满载仁爱堂》，她在活动前透过公关表明不会受访及拍照，而今日（25日）的《璀璨之城》活动上，公关就指她要赶往下个工作未能留低做访问，令记者即使两次想请美仪姐亲口交代其版本的真相，也未能取得其回应。不过网上媒体《Chong San 冲先生》今晚发布江美仪访问片段，她展示节目当日的拍摄时间表，并以4点回应事件，否认迟到、做show，强调：“我要澄清，我喺呢个节目里面，我唔系去参与任何嘅义工服务，系做一个主持人去介绍呢一班嘅义工朋友。”之后她以四字总结目前心情——名誉谋杀。

为遭牵连工作人员决定开腔　展示拍摄通告否认迟到

江美仪指，自己本来不想回应，但发觉事情发展并不如想像般“谣言止于智者”，加上见到拍摄人员、身边朋友都被开名追击，于是答应冲先生访问：“如果我唔出声，好似对呢班朋友或者工作人员唔公平。”她列点回应事件，对于被指拍两、三小时就走，她展示拍摄时间表，当日上午9点至9点45分摄制队去对方公司做访问，而自己的通告时间为下午2至5时，“所以唔存在‘成个上昼等我都唔出现，其实唔系，我根本上冇需要喺上午出现。’”

被指只做2%灭虫工作　强调身份是主持而非义工

对于义工指江美仪仅做了2%工作，留下约98%工作要他独力在布满床虱的空间进行，江美仪澄清自己只是主持、非义工：“我只系接到一个job，去做《一个好人》嘅主持人，呢个主持人嘅工作系做咩㗎呢？就去介绍香港有一班义工朋友，好无私为贫苦大众或者低收入人士家庭提供义务服务。”她举例节目中接触过的其他单位和工作，再澄清：“我喺呢个节目里面，我唔系去参与任何嘅义工服务，我唔系去做义工，我系做一个主持人去介绍呢一班嘅义工朋友。所以我𠮶日拍摄要做嘅嘢就系去到𠮶个屋主𠮶度，去体验一下，你话你系灭虫嘅，究竟你系点样灭㗎 ？我去体验一下，通常有部蒸机，高温令佢冇得生存就唔会繁殖⋯⋯”

被多番追讨六件保护衣去向　称无需参与道具部份故不知情

第三项指控，该组织负责人多次表示节目组攞走他6件保护衣，并要求交代下落，江美仪回应：“绝对唔系我江美仪要求佢攞嚟啦，一定系制作单位𠮶边同佢安排，可能个保护衣系畀我，如果真系惊嘅时候可能要着住，我当时都系冇着，都系着返自己啲衫去做嘅。至于保护衣嘅去向我真系唔知道，我真系唔知道后来系边个出钱，边个攞咗我真系唔知。”她又补充，拍摄道具由节目组准备，演员并不清楚亦不需要参与此部份。

反驳“演完场戏就走”指控　称从未被要求完成全屋灭虫

至于第四点，该负责人狠批她“做骚”、“演完场戏就走”，江美仪反问：“其实间屋系咪完全需要清洁干净呢？我相信呢个系佢同屋主两个之间嘅一个协议，我冇收到通知我哋电视台呢边，要留低去负责做晒所有嘅灭虫工作，我亦都冇收到导演嘅指示，‘嗱，你今次过嚟系需要同对方一齐去清洁间屋，清洁完为止你先可以走。’我系冇收到嘅，至于系咪真系需要清洁晒，我谂呢个我唔会知道，我谂呢个系佢同屋主之间嘅一个deal，所以我唔认为我只系做show、拍两个镜头就走嘅呢啲指控。”

指传媒需跑流量　想解释却无发声渠道

冲先生之后表明身份，指灭虫组织的阿臣于网上有丰富泥浆摔角经验，曾有“雨果小子”等网名，自己亦与阿臣在微博上开战。冲先生续问江美仪可有想过向记者澄清，她指都曾试过了解阿臣目的、动机，亦有向部份记者展示对方过往的留言：“但系我谂，因为而家嘅传媒要流量，可能佢要有流量先可以保住份工，又或者有流量佢先可以咁样继续经营，似乎喺传媒方面就冇人帮到我。我系去到一个位，就算我想解释返件事，都似乎冇乜渠道俾我。”

自觉遭欺凌及“名誉谋杀”：我觉得佢直情杀咗我

被问目前所遭遇的算不算网络欺凌，江美仪认为“名誉谋杀”四字更为精确：“我觉得佢直程杀咗我，冇人care件事系点样，只系信一面讲，每日打开媒体，不断有人闹你，而闹𠮶样嘢，你知道𠮶样嘢系你哋唔明㖞，你哋唔知道件事，我觉得呢个系一个欺凌。”她表示不期望大家睇完访问就会从不喜欢她到喜欢她，亦非要任何人改观，不过想借此机会还原当日事件，为身边朋友讨回公道：“你可以继续话呢班人多事，可以继续话我系假善心嘅人，但系我觉得我需要为自己讲返少少嘢。”