1990年亚洲小姐冠军吴绮莉近日现身伍咏薇、李凯贤（Brian）的HOY节目《九运会客室2》受访，大爆选美及电视台黑幕！她提到当选后参与亚视台庆直播，当时与另一位非同届亚姐扶住林百欣出场，著住高踭鞋的她，忽然被该亚姐推跌，更一下仆在摄影机，丑态全入镜，随即被工作人员拉走及“照肺”。吴绮莉指事后幕后人员明知那位亚姐推她，但包庇对方，更捉吴绮莉出去后巷闹足半个钟，逼她承认是自己做错，令她委屈爆喊：“𠮶件事我真系好大阴影，好唔钟意俾人屈！”身为1989年亚洲小姐最上镜小姐的伍姑娘，不断追问吴绮莉对方身份，轻易掌握4大线索锁定嫌疑人，推测对方同为1989年亚姐：“同我差唔多高，个名又少一粒字。”更反问：“可以咁得戚嘅人有边几个吖？”

选亚姐离奇不见泳衣　吴绮莉忆台庆扶林百欣出场突仆倒

不过，伍咏薇就指听闻吴绮莉那一届亚姐很多“松踭”事件，问她可有遇过，她说：“我试过泳衣唔见咗，净系件泳衣，冇咗上身，剩返条裤。”幸好节目组即时安排第二套泳衣补上，而她又自言比较文静内向，会躲在角落不social，所以未目击太多黑暗事件。然而，她当选后参与亚视台台庆直播，就发生了一件事，令她留下阴影！吴绮莉说：“你知通常选完之后，头三名，台庆，梗系老板出嚟，冠军亚军一定扶住老板，𠮶时系林百欣，有几级楼梯，啲楼梯喷晒烟，我就着住高踭鞋，扶住林百欣，啲机喺我前面，1号机、2号机、3号机咁样，着灯啦，我就企定定扶住林柏欣。出咗场，3、2、1，嚟喇，登登登凳！企喺度，司仪开始讲嘢，我就扶住林伯，中间部机着灯，一着灯𠮶阵时，我就成个人仆咗埋部机度！”

遭非同届亚姐从旁推撞　吴绮莉跌向摄影机即被拉走丧闹

伍咏薇惊讶问：“点解会咁样？”吴绮莉说：“我已经着高踭鞋唔惯，再俾人一嘢㧬我，我又冇理由扯住林伯一齐跌，我即刻放手，一嘢俾人㧬，成个人揽住咗部机。（伍咏薇：边个㧬你？）某人啦，艺人嚟嘅。（伍咏薇：如果你系冠军，你拖住林伯，预备出场stand by，有人㧬你后面𠮶个，一定系一系亚军一系季军。）kind of啦，唔系我𠮶届啦。（伍咏薇：即系我𠮶届啦，应该系。）咁上吓啦。”吴绮莉身高5呎10，她指可能自己着完高踭鞋更高，遮住人惹不满：“遮咗人哋，你明唔明呀？𠮶个系我老板好朋友嚟㗎嘛⋯⋯冇理由见唔到佢，咁我真系俾人一嘢咁样……”吴绮莉续说：“所有工作人员企喺度，大家都好愕然，我已经俾隔篱𠮶个人一扯扯咗我出镜，因为我扑咗埋个镜头度，我挡住咗个镜头，咪就系扯我出去，跟住我就唔喺林伯隔篱。（伍咏薇：𠮶个人系咪上咗嚟？）我估系啦，我就俾人捉咗去后巷闹，闹咗半粒钟，妆都落埋，唔使出镜。”

被屈缺席彩排留阴影　吴绮莉喊足半小时：好唔钟意俾人屈

事件发生在直播时候，所以非常“大镬”，而亚视向记者交代指吴绮莉当日冇彩排，对此她非常委屈：“𠮶件事我真系好大阴影，好唔钟意俾人屈！佢话‘嗱，你今日冇嚟彩排，系你错呀！’系咁闹，我咪喊足半个钟，因为我有彩排，一早喺度化晒妆set晒头，所有嘢都做晒，点解要屈我话冇彩排？𠮶时我好唔开心，又唔可以出声。几十年后我见到𠮶个拉我出去闹𠮶个人，我都系唔打招呼㗎。”伍姑娘问，这是否代表闹吴绮莉那位幕后都知道她被人推跌而选择包庇，吴绮莉说：“梗系啦！（伍姑娘：可以咁得戚嘅人有几个吖？）”

伍咏薇追问涉事亚姐身份　4大线索锁定嫌疑人

伍姑娘几度追问推跌她的嫌疑人身份，又说：“㧬你𠮶个我知边个，即系89同90年之间啦，𠮶个人一定系我𠮶届嘅！”吴绮莉似是不敢回答，说：“咪就系你啰。”之后吴绮莉再多给一个提示：“𠮶个人仲要矮我好多，佢矮过你。”但伍姑娘却纠正：“其实同我差唔多高，个名又少一粒字𠮶啲啦，唔好讲佢喇都系。”综合二人答案，可以得出的结论是，推跌吴绮莉的是1989年亚姐、名字两个字、身高与伍咏薇（官方高度166cm）差不多、与林百欣关系密切。