蔡卓妍（阿Sa）今日（27日）以“形象大使”身分，到湾仔出席“莎莎妇女银袋日 2026”记者会。一身粉红造型的阿Sa，大露小蛮腰，状态大勇。阿Sa接受访问时，透露活动当日将与好友关智斌（Kenny）一同出席，非常期待对方当日的穿搭：“我都真系几期待见到一整条粉红色嘅Kenny！同埋唔知佢会唔会带帽呢？好期待！不过佢咁靓仔，著咩都靓嘅啦，成个阿Ken（芭比娃娃）咁啊。”

爆关智斌穿搭风格转变

阿Sa指Kenny近年穿搭有道，大赞：“佢以前真系冇咁多颜色嘅，尤其呢一、两年，我发现‘哇！点解你屋企有咁多颜色嘅衫嘅？’同埋佢系好钟意衬衫嘅，即系佢不知点解有一啲核突啡色呢，唔知点解佢又会衬到一对核突啡色鞋。点解可以屋企有咁多颜色嘅嘢？好犀利呀佢！”

与老公买波“小赌怡情”

问到老公当日会否陪同出席？阿Sa 笑言：“应该唔会呀！费事畀记者朋友喺度影住，好尴尬嘅大佬！同埋可能佢会好周身唔自然。（可能佢想呢？）我谂下啦。”阿Sa透露两公婆都会小赌怡情，如之前世界杯都有一齐“买下波”，各有赢的时候，不会意见不合闹交。

为“Sidetrack”演唱会歌词苦恼

谈到Sidetrack演唱会的准备进度，阿Sa表示贺岁片的拍摄部分已经完成，目前正集中精力演唱会排练，大爆录音时与阿娇（钟欣潼）及音乐总监在对歌时遇到的爆笑困难：“阿娇啱啱返嚟，我哋都做咗几日演唱会嘅宣传。我哋终于都对晒啲歌啦，因为有一啲歌真系实在太旧，要揾返𠮶啲歌词都有啲难，同埋发现原来都有好多歌词系写错嘅！所以我同阿娇，仲有音乐总监，我哋三个人六只耳仔一齐喺度听。但系有啲歌，以前特别系我，好多懒音嘛，我听嚟听去都听唔到呢个究竟系咩字，差啲打去畀啲填词人呀！”

被问到有没有哪一首歌是听完之后完全忘记自己曾经推出过的？阿Sa坦言：“有呀！因为有睇啲粉丝嘅post嘛，佢哋写有啲歌好想我哋唱，跟住我同阿娇都搲爆头：‘究竟呢首系咩歌？’跟住揾返嚟听先知：‘哦！系呢首！’”

双重飞债缠身

至于演唱会门票，阿Sa直呼“飞债”让她极度头痛：“我啲飞债系一波未平，一波又起啦，即系我自己𠮶啲都未处理得点，跟住容祖儿𠮶个又嚟了。因为其实我之前已经同我所有嘅亲戚朋友同埋好朋友讲晒：‘其他公司我而家一律唔会帮任何人买，因为实在太烦，呢个世界最烦嘅事就系买飞！’跟住大家今次因为冇计啦，阿祖系自己公司，跟住啲friend而家声大夹恶，‘你自己公司𠮶㖞！’我话：‘我够知啰！’我而家已经争取几百张，但我都系唔可以guarantee（保证），我写就写低咗先，但系冇飞我都冇办法。Twins𠮶啲我就叫佢哋一律揾我助手。”

阿Sa更抱怨有些朋友平时不联络，一发讯息就是求票：“从来同佢个chat呢，系乜都冇讲过嘅，净系‘Hello’跟住就系‘买飞买飞买飞买飞买飞’，实在太冇礼貌啰我觉得！所以我直接唔理会。”

为个唱积极收身

为以最佳状态迎战12月演唱会，阿Sa拍完戏后便火速展开收身计划。记者赞她身材变瘦，阿Sa开心回应：“因为12月就要演唱会嘛，都尽力嘅啦！（露腰展示成果？）腰一系露一系唔露嘅啦，好正常嘛！我觉得依家个年代，‘靓’系冇一个标准嘅啰，即系唔系话你好瘦就会靓，或者肥就唔靓。咁我觉得最紧要系健康啰！我自己我都唔系话要追求好瘦，我只不过系想希望练返一啲线条啰，因为我依家嘅手臂确实系冇乜线条嘅，你见我都要遮一遮。我希望练返有啲线条，咁我到时演唱会我就可以著多啲唔同类型嘅衫啰。”

阿Sa更透露目前正在进行锻炼，由教练老公亲自监督日程：“一拍完戏就冇借口啦！（老公会唔会都锡住妳？）冇㖞。健身𠮶阵佢就系我教练。（敢唔敢闹你？）我都系一个好认真嘅人嚟嘅，我又唔系Hea住𠮶啲嚟嘅。佢专业之余，我都专业嘅！（使唔使加操？）要啊？佢已经Mark晒我啲期啦，直头有一日食完饭捉住我：‘嗯，我哋依家要Mark期！’我话：‘下？咁认真？’佢话‘系！’而家一个礼拜操几日啰。”

拍戏大尺度事前必定要讲清楚

此外，谈及TVB台庆剧《璀璨之城》中女演员的大尺度性感演出引起热议，甚至爆出张曦雯（Kelly）拍摄时被临场加戏“剥剩底裤”。阿Sa被问到过往拍戏有否遇到临时被要求加“大尺度”戏份时，斩钉截铁地表示，大尺度戏份必须事先沟通得一清二楚：“如果系呢啲大尺度嘅戏份，基本上一早已经要倾清楚晒啰！无论系导演同我啦，佢哋其实都要同我公司过五关斩唔知多少将。我就冇发生过大尺度嘅戏要临时加啰，你都要啱个剧情㗎嘛，你唔系话无啦啦煮煮下公仔面跟住除衫咁样嘛！咁系make sense嘛系咪先？”

虽然没有临时加过性感戏，但阿Sa透露试过被临时要求拍高危动作场面：“我有试过去到现场先同我讲：‘喂，你今日要跳海㖞！’然后畀件Dry suit我；又试过‘你今日要跳楼㖞！’我话：‘下？我畏高㖞！’系呀，好刺激㗎！（最后顶硬上？）因为个剧情系需要嘛，你都要嘅啦。所以我拍𠮶套戏我系出咗一年半风癞，太过大压力啦！”

阿Sa补充，若在现场遇到不舒服或不合理的范畴，绝对会说“不”：“如果我唔舒服我一定会即刻 Say No啰！就算我唔 Say，我谂我助手应该都出咗嚟阻止呢件事发生。如果对方坚持嘅，咁我谂我都要打畀经理人嘅啦。”

爸爸庆生惊喜变“惊吓”

谈到刚过去的Sa爸生日，阿Sa特别为爸爸准备了金咪蛋糕庆祝，并亲自到场贺寿。阿Sa笑称：“𠮶日都几高兴嘅，不过我阿爸就呃我啰！佢本身同我讲话同‘屋企人’庆祝，点知我去到只系见到得几个屋企人，跟住全部都系佢啲friend！同埋佢另外个friend嘅生日，所以系再加埋佢另外个friend嘅屋企人，同埋佢哋啲friend！我屋企人𠮶边得我啦、我姑妈、我阿嫲同埋我表姐啰。佢本身系同我讲系同屋企人嘛，好彩我𠮶日有化妆咋！算啦，我惯咗啦。我都已经同佢再三讲多次：‘喂，其实你可以话畀我听咁嘛，畀个心理准备我呀，唔洗咁样吓我嘛！’”

虽然过程闹出笑料，但阿Sa表示爸爸看到金咪蛋糕时非常开心，蛋糕造型与爸爸简直一模一样。问到自己生日会希望收到什么样的蛋糕时，阿Sa笑言自己要求很简单：“我唔洗嘅啦，我其实我好简单嘅啫，你买个莎莉蛋糕畀我我都 OK 嘅！（要Keep Fit？）因为我本身我都唔系食好多嘅，讲真一个蛋糕咁多人分，你每人切都系切得𠮶一片嘅啫嘛，咁𠮶啲都 OK，行两步就冇咗啦！”今年是婚后第一个生日，阿Sa期待收到老公惊喜，“佢巨蟹座，OK的。”