龚慈恩日前出席TVB台庆剧《璀璨之城》宣传活动，其爱女林恺铃为ViuTV拍摄《地狱大状》亦刚播完，网上有人形容她们是“母女跨台对决”，她笑说：“唔好咁形容，大家一齐有工作都好开心，都好感恩。”《璀璨之城》的性感戏风波近日闹得热哄哄，一度有指张曦雯临场被通知尺度要加大，使她拒拍，问到作为母亲兼演员的龚慈恩，若有日女儿面对“被加戏”情况，她会如何建议，她就表示：“演员一定要自己好接受，同埋好钟意先会演得好。”

相隔30多年再与姜大卫合作　龚慈恩剧透遭官家男人利用

龚慈恩今次是客串性质，与姜大卫（John哥）、张智霖（Chilam）对手戏较多，她饰演John哥多年前的女友：“我都知道以前有好多我哋啲原来钟意我同John哥一齐嘅，听到有机会可以同John哥一齐合作都好开心。”她指彼此相隔30多年再合作拍剧，问到是否跟John哥斗奸，龚姐表示：“有少少被迫嘅，开始嘅时候就系俾John哥利用，跟住就Chilam，每个姓官嘅男士，大家勾心斗角都有啲问题，我都俾佢哋利用到，但系因为我要帮个仔报仇，所以都有啲心魔嘅，所以就令到好多曲折嘅故事发生。”她又剧透将会跟Chilam有血腥场面。

赞林恺铃《地狱大状》演技进步　自认体力不及女儿：我输硬！

对于被指与女儿林恺铃（Ashley）跨台对决，她直认有睇完《地狱大状》，有机会也想跟女儿一齐睇《璀璨之城》，但就笑说：“唔好咁形容对决，大家一齐有工作都好开心，都好感恩，好开心佢可以有咁嘅机会，佢都越来越钟意演戏，有咁好嘅剧本、团队，又学到咁多嘢，真系好感恩。”她感谢有很多前辈指导Ashley，“佢嘅连接位我觉得真系做得好好，最尾有一场佢同姨妈（邵美君饰演）𠮶一场，我都好钟意。”龚姐又表示，觉得女儿其实比自己还厉害：“你哋有时话边个厉害啲，我可以话俾你听，我输硬！我冇可能有咁嘅体力，佢喺好短时间里面，40几日里面，仲要加埋《COURT!》，每一日见到佢都攰得好紧要，又要睇听日剧本，今时今日我系冇可能有咁嘅体力，负荷好犀利呀。”

林恺铃曾体力透支拍剧晕倒　感恩女儿获赞Package好

观众赞Ashley做贪钱mean爆律师形象有大突破，龚姐指剧本帮助大，但女儿自己亦做了很多功课，每晚拍完剧回家又准备明天的场口，甚至体力透支到晕低过：“有时佢同我讲，有啲场口佢觉得可惜咗，因为体力真系支付唔到。”她说相信团队已帮了Ashley很多，但女儿需要的是再累积经验：“佢钟意睇书，所以好多嘢都系里面出嚟，佢真系需要做功课同埋做好多准备，所以佢休息时间有时唔够体力唔够，好难。佢可以写咗好多笔记之后，侧面又画公仔，做好多呢啲嘢，𠮶啲都花佢好多时间。”近日有网民赞林恺铃Package好，土生土长、高学历、靓女、谈吐斯文、有气质等等，问是否为女儿感到自豪，龚姐说：“多谢，感恩感恩！ That’s all I want。”

看女儿咀戏不尴尬：妈咪后生都拍过，好明白

至于女儿与Jeffrey有咀戏，Ashley曾透露不敢与母亲一齐观看，但龚姐就不会尴尬：“唔会，妈咪后生都拍过，我好明白，咁嘅情况下，你所谓体感、情绪，都唔系喺𠮶样嘢𠮶度，你侧边咁多人照顾到工作，你系工作嘅模式。”龚姐也曾跟Jeffrey合作，听闻她对这后辈及其经理人女友Evelyn印象都很好，她说：“系呀，佢系我个仔，我都好钟意Evelyn，佢好叻女。”

谈加性感戏风波：演员要接受同钟意先会演得好

讲到《璀璨之城》因为有尺度大的场口引起热议，张曦雯更曾透露自己临场才知道一幕内衣戏变成一take过除剩内裤大露背，因而拒拍，不过监制之后就澄清，张曦雯因为情绪、走位等等的难度，担心自己演不来才拒绝。问到若Ashley将来可能都有机会面对性感亲热戏、临时加戏之类，龚姐既是母亲也是演员，会如何给女儿建议？她表示：“我谂好depends嘅，基本上我觉得一定系一个演员自己嘅个人意愿，因为佢要牺牲几多，或者做几多，当然剧本需要都好重要，我谂大家沟通啫。我觉得唔一定系尺度上面嘅问题，系大家沟通𠮶场戏嘅演绎方法，系咪大家沟通到，可能你会有少少觉得咁样好睇啲，可能我觉得咁样好睇啲，大家点样磨合，但系我应该讲嘅说话就系，演员一定要自己好接受，同埋好钟意先会演得好。”假如母女对接戏意见有分歧，龚姐指最终都会依从Ashley意愿：“最后都系佢自己，佢系成年人，而且我十分之相信佢好有分寸。我好放手，好多年前已经好放手相信佢，因为佢有分寸嘅。”