郑希怡（Yumiko）近日接受伍咏薇（伍姑娘）、李凯贤（Brian）主持的HOY节目《九运会客室2》访问，当中就大谈2006年她在《欢乐满东华》直播中，空中飞人“甩裤”事件的感受，她透露当时“唔知点算，好乱，净系识得喊。”事后躲在家中不敢出门，幸好容祖儿、蔡卓妍都上门陪伴，什么都没说，就只是陪伴，令她感觉没那么孤单。不过事件后Yumiko都有阴影：“以前出街见到大家望住你Smile，你觉得打招呼，好Nice，𠮶排之后我再出街有时见到其他人，你再同样嘅表情，我会觉得系咪笑紧我。”幸好她用了几个月终于走出阴霾，因为她知道自己没有做错任何事：“我冇怪过任何人，亦都唔应该怪自己。”

空中飞人意外甩裤　忆当刻脑袋空白不敢起身

Yumiko当年为慈善参与《东华》空中飞人环节，由钱嘉乐、黄德斌拍住Yumiko、Amanda S及胡定欣表演，当黄德斌接住Yumiko后，要于半空“揈”给钱嘉乐，但钱嘉乐捉住Yumiko大腿后，不慎扯甩其裤子，令她春光乍泄。回顾这个时刻，Yumiko经历不同情绪变化，第一反应是一片空白：“同埋𠮶时我个头喺下面，掉转咗，我完全唔知发生咩事，但系就觉得有啲嘢发生咗，跟住就跌咗落去下面。佢掹住我只脚，我应该揈过去捉住其他人，但系当时我知发生咗一啲事，佢放咗手，跟住我跌咗落个网。我唔知点算，我又知直播紧，但系又咁样样，我唔系好想起身，我唔知点面对呀当时。”

曾志伟当年要求慢镜重播　伍咏薇不开名批：Bull shxt！

伍咏薇指自己当时有睇电视，的确觉得愕然，心想：“点解会咁㗎？”但又觉得Yumiko身形几好，虽然她明白事情发生一定会尴尬，但其实表面看来只觉得是件One piece泳衣，绝对不会是“核突”。事后主持曾志伟说：“有冇得慢镜睇多次？”伍姑娘就不开名说：“𠮶啲都Bull shit嚟㗎！人哋咁尴尬一个细路女、后生女，一个唔关佢事嘅失误……”问到Yumiko当时的感受，她说：“我唔知点算呀，好乱呀，净系识得喊，当时。当时有喊，直接喊，仲要一见到公司啲同事就即刻喊，我话我要返屋企，我净系知道我想返屋企。但系夜晚公司再叫咗我出去讲几句，交代返件事。”

感谢阿Sa祖儿陪伴　事发后曾怕街上途人笑容是耻笑自己

Yumiko忆述，自己是在节目一个月前收到公司电话，说下个月她要表演空中飞人：“我话吓？你讲多次？空中飞人？我细个到而家都未睇过三次，呢个唔系马戏团先有嘅咩？我要去参加？佢话‘系呀，练啦。’我话好啦，咁顶硬上。”两位主持亦说：“唔系练咗就乜都得㗎嘛。”她坦言：“我𠮶时以为乜都得㗎。”又讲到自己练习时都著住同一套衫，但没发生过任何事，所以都冇人意识到会有什么问题，她剖白：“点知真系到咗现场呢个意外就发生咗。我其实……我有唔开心，我唔敢出街𠮶排，楼下好多狗仔队。（Brian：系hurt定尴尬？）都有，我知出面好多人讲紧呢件事，我又出唔到街， 阿Sa、祖儿佢哋有嚟我屋企，其实佢哋咩都冇讲，净系陪我敷吓mask，陪我嘅啫，身边有人陪呢个好紧要！冇倾过任何关于呢件事嘅嘢，但系我自己觉得真系争好远，同埋我𠮶排……唔知呢自己可能唔识谂，以前出街见到大家望住你Smile，你觉得打招呼，好Nice；𠮶排之后我再出街有时见到其他人，你再同样嘅表情，我会觉得系咪笑紧我。”

花数月走出阴霾不再自责：我冇做错就得

不过Yumiko很快就走出了这个阴霾，她说大概几个月左右，表示：“我同自己讲，我冇做错，我做紧善事㗎㖞，我筹到钱又帮到人，呢个系一个意外， That’s all，我冇怪谁。我冇怪过任何人，亦都唔应该怪自己，我觉得我冇做错就得！”