单立文（豹哥）与太太胡蓓蔚（豹嫂）昨日（29日）一同出席TVB新节目《夫妻肺片2》开镜拜神。这对结婚多年的圈中模范夫妻，在镜头火花十足，大谈二人独特又搞作多多的夫妻相处之道。

“语出惊人”只为博观众一笑

受访时，提到连“最佳主持”阿Bob（林盛斌）都自认主持功力不及豹哥，更爆料指豹哥差点在节目中讲粗口。豹哥笑言：“乜差啲，冇讲粗口！”豹嫂即时打趣回应：“系咪你同阿Bob主持啱啲呢？”豹哥随即发挥搞笑本色：“Bob做惯主持吖嘛，佢其实谂住剃光个头，连寺院𠮶啲主持都做埋，迟早㗎咋。”问到豹哥节目中有否语出惊人？他直言：“如果大家想睇娱乐性丰富啲嘅嘢，我觉得就要大胆啲，挖个肚皮畀你睇下啰。我觉得唔紧要嘅，平时我哋都系咁讲嘢啦，咁你特登修饰啲词语，观众睇到可能会觉得唔到肉，反而好似同朋友咁讲嘢，大家咪受落啲啰。”

豹嫂则坦言平时都有提醒豹哥要注意说话分寸，但她也十分理解丈夫的用心：“其实我哋都听惯佢咁讲嘢，不过有啲观众可能保守啲嘅，我都会谂如果人哋唔钟意咁点啊？但我明白豹哥，佢成日想人开心，大家笑一笑，希望现场气氛好。”

问到豹嫂录影时是否要“捏豹哥大腿”提醒对方不要乱说话，豹嫂笑言：“我搣都冇用啊。我哋日日喺屋企Briefing完都冇用！”豹哥随即妙回：“佢唔系搣大腿，佢系搣第二度搣耳仔！”二人一唱一和，默契十足。

单立文惊爆与太太胡蓓蔚已“冇晒Feel”

该集节目以“新婚夫妻”为主题，问两位圈中模范夫妻有何分享？豹嫂笑言：“分享唔到，因为我哋结婚太耐了。”豹哥则顺势爆料：“我哋见到何广沛，佢12月头结婚，见到佢都好开心、好兴奋。”豹嫂笑指何广沛笑得很甜蜜，很少见到对方这个表情。豹哥更不忘搞笑说：“所以你哋见到最好问下佢，我哋两个就已经冇晒Feel㗎了。”

豹嫂透露，二人结婚多年，现在各有各的生活空间与节奏：“我哋而家返到屋企咪一人一间房，你做你嘅嘢，我睇我嘅剧，有啲嘢要倾咪发短讯。”豹哥更搞笑地大爆：“我哋连叫外卖都系叫送到各自嘅房间，我哋系唔出去㗎！遥控开门畀外卖员，同佢讲走廊最后𠮶间房啊，跟住就敲门放低算了。”

传授婚姻之道：学习自我检讨

问到可有夫妻相处之道向新婚夫妻提供？豹哥认为婚姻是两公婆的游戏，外人不需要给予过多意见：“我点知你之前欠过佢啲咩、受过啲咩？你系知道个底先至好去畀少少意见，但亦唔畀得实，因为佢哋好返𠮶阵你就惨了，会问‘边个同你讲咁样㗎？系咪啊？’。”

豹嫂亦言婚姻其实是一个互相学习和检讨的过程，在错误中成长，并由心分享：“我哋都系咁样行过嚟。讲正经嘅，我哋一齐咁多年，我觉得最重要嘅系人要学识自我检讨。因为人好多时会好自私，只会从自己嘅角度出发，如果想婚姻长久，就要多啲检讨自己，咁样就会愈来愈好。”

《开心速递》完结后相处多 豹哥笑言想去麦当劳兼职

另外，谈到《爱·回家之开心速递》结束后，现在会否多了时间陪伴豹嫂？豹哥打趣道：“会，我哋系相处多咗嘅，闹交都多咗！”豹嫂笑著附和：“系咪好难受啊？我都好难受啊！心谂点解你唔使返工，喺我眼前笃口笃鼻嘅！”豹哥笑言：“咁点啫？有时我都谂过扮返工，或者喺麦当劳揾份兼职。”不过豹嫂随后透漏，豹哥近期其实默默为她的新音乐企划提供幕后协助：“最近我有个新嘅企划，老公有帮我手。（老公写歌畀妳？）系歌，但唔系佢写，不过佢帮我做咗好多幕后嘅工作，非常好，我对佢有少少刮目相看，感激佢！”