无线恋爱真人骚《女神配对计划2》播出后话题不断，掀起全城热话，除了一众女神与“求爱勇者”的互动于讨论区洗版式讨论外，当中何沛珈更成为众矢之的，饱受网民攻击，甚至被冠以“绿茶婊”称号。身为主持的林盛斌（Bob），今日（1日）在社交平台发长文，透露与监制开会得知节目于上星期日录得最高收视19点佳绩。Bob除了多谢观众及网民支持外，亦深入剖白今辑的全新赛制，并罕有开腔为一众饱受网民舆论攻击的“女神”求情，希望大家手下留情。

解释《女神配对计划2》全新赛制

今辑《女神配对计划2》一改上辑作风，参加者的感情走向更扑朔迷离。Bob指出，今辑最大的转变在于打破常规，取消分组机制：“今辑同上一辑最唔同嘅地方，一开始已经讲清楚，今次系唔会有分组，亦即系话，大家自由选择，唔存在边个系属于边个，你拣人，人拣你。”他解释，随著拍摄推进，参加者无论是坚持第一日的选择，抑或转向认识新对象，都完全符合节目初心：“呢个真系绝对冇问题嘅，亦都希望大家咁做，我哋就系想所有参与嘅女神同埋咁多个求爱勇者，甚至睇紧我哋节目嘅所有观众同埋网友们，都可以勇敢去求爱，大胆啲去追求自己嘅幸福。”

强调没有剧本

面对网民在讨论区疯狂“入戏”、甚至对参加者的行为口诛笔伐，Bob坦言非常理解观众的“肉紧”：“就好似自己都有份参加咁，见到大家咁投入，我觉得台前幕后所有工作人员嘅努力付出，系冇白费嘅。”不过，他强调真人骚的吸引之处，正是其不可预测性：“真人show最吸引人嘅地方，就系因为冇既定嘅剧本，所有决定同埋选择，都系由参与者自行判断，如果喺个节目入面某某做咗一个举动或者改变想法，出嚟嘅结果唔系你预期又或者你唔认同嘅话，佢哋要面对公众嘅批评，面对舆论嘅压力，其实，都系非常唔容易嘅。”

对于外界对感情线的道德批判，Bob亦有一番见解。他直言求爱路上本就充满变数：“就系会出现‘我钟意你，但系你未必钟意我；钟意我𠮶啲，我又未必钟意’，呢啲都系大家可能曾经经历过嘅恋爱片段。只要你做嘅决定同选择，唔系专登蓄意去伤害对方，又或者涉及欺骗同埋背叛，其实男女之间嘅情爱，真系好难去界定绝对嘅啱同埋绝对嘅错。”

望外界对“女神”手下留情

眼见多位“女神”因在镜头前的取态而遭受部分网民人身攻击，身为主持的Bob直言心痛，主动替众女神向观众致歉并呼吁停火：“见到我哋咁多位嘅女神由节目播出开始到而家，每一位都各自遭受到部份观众同网友嘅批评同埋攻击……如果佢哋喺呢个求爱嘅过程，有啲乜嘢做得唔够好，可能佢某啲选择违背咗你本身对恋爱嘅睇法，又或者佢某啲决定令到大家唔系好满意，睇到好激气，我都代佢哋同大家讲声唔好意思，好抱歉。”他恳求网民：“希望咁多位都可以手下留情，评论系绝对欢迎嘅，但系去到恶意嘅人身攻击，我就觉得冇咁嘅需要嘅。喺我心目中，每一位拍摄我哋节目嘅女神，都系非常漂亮，亦都系有一颗好纯真嘅心。”

谈到节目的后续发展，Bob透露目前赛程刚好过了一半，接下来将正式踏入另一个白热化阶段。他更预告下半部将会有极具冲击性的神展开，甚至连身在现场的自己都被震撼：“我好相信，之后嘅故事发展，系你意想不到嘅，你系会‘哗，唔系呀话！？’、‘哦，原来系咁，唔怪之得啦！’、‘咦，有啲咁嘅事？’、‘嗯，咁咪几好啰！’，因为我一路拍，个心都系出咗呢啲心声。”并叫观众继续支持节目。