52岁刘恺威日前高调认恋细20岁、现年32岁的“第四代邦民女”黎纪君（Christy）。二人爱得火热，趁住万圣节，联同黄德斌、何启南等一班波友齐齐扮鬼扮马庆祝。昨晚（3/11）黄德斌出席《第四幕》首映，被问到二人交往的来龙去脉，德斌有如当事人一样处处显出尴尬，更表示自己一直只是专心打波。

黄德斌冇留意二人何时挞著︰我好专心打波㗎

黄德斌因为去柬埔寨推广香港电影，从而认识了导演王德健，于是昨晚现身首映支持入场睇戏。被问到早前公开一张万圣节合照，发现原来德斌跟刘恺威、黎纪君都是Pickleball波友，仲一齐扮鬼扮马庆祝。“我哋系同Team打波，两位都有嚟打波。”被问到开首可有留意二人有眉来眼去过电迹象？“我好专心㗎，因为我啲波唔得，所以我好专心打，其他嘢真系唔知。”

追问到二人擦出爱火花的时间线，德斌连番表示唔清楚︰“我真系唔知，系突然间有一日睇到报道先知。（记︰平时收得咁埋？打完波冇一齐食嘢？）食嘢咪食嘢，冇谂咁多嘢，而家就好觉喇。”再问到二人可有公开放闪？德斌再次尴尬笑︰“我冇留意呀，唔好意思，我唔会望住佢哋，但就觉得刘恺威球技有进步，因为有教练指点。我哋呢个Team全部都艺人叫A Team，即系解做艺员队。”

至于队友间可有经常拿二人的感情事开玩笑︰“我哋打波就打波，因为有教练在场，好珍惜练波时间。不过打Pickleball真系识到好多人，我都识到好多唔同界别人士，个圈子会唔同晒。最近仲研究紧另一新兴球类运动Padel，玩过一阵都几好玩。”

万圣节大合照全程糖黏豆 紧抱纤腰甜蜜满泻

在万圣节派对的大合照中，刘恺威与黎纪君全程犹如“糖黐豆”般形影不离。其中一张照片，两人双双踎在地上，刘恺威从后双手环抱黎纪君的纤腰，黎纪君则整个人小鸟依人地挨在男友身边，双手揽到实一实。而另一张企定定的大合照中，两人依然贴到实，刘恺威紧紧搭住女友肩膀，笑容灿烂，甜蜜满泻。