著名动作演员及龙虎武师何麦（Mark Houghton）早前离世，其女儿何慈茵（Charlene）昨日（6日）在社交平台撰文，宣布继承亡父遗愿，正式接任“岭南黄飞鸿洪拳传人-刘家洪拳”的承继人。翻查资料，何麦生前正式拜师成为“黄飞鸿第5代传人”，如今Charlene接棒，顺理成章成为黄飞鸿洪拳的第6代传人。

Charlene接受《香港01》访问时，除了大爆亡父“女朋友”Christie在丧礼上自作主张外，更踢爆对方原来连武馆都想“谋朝篡位”！最终在众徒弟的力撑与求救下，她决定挺身而出接管亡父遍布全球的武馆，延续爸爸的武术精神！

揭亡父无留遗产：我同妈咪私下一直经济支持佢

被问到爸爸离世后是否有留下遗产，Charlene坦言爸爸并没有留下太多财产，更爆出原来爸爸生前一直靠她们两母女接济：“好彩爸爸唔系话有好多财产净，因为我知道爸爸在世嘅时候，都系我同我妈咪私底下喺经济上支持佢嘅，佢女朋友唔知㗎！所以我哋都知佢冇咩钱剩。”

她指爸爸或许只有一些非现金资产，但她亦无意跟Christie争夺：“可能佢有架车、有部快艇，但我哋都觉得算啦，如果Christie想要嘅就畀佢，佢自己攞去，𠮶啲都唔系太多钱。丧礼𠮶度我已经谂唔出声，算啦Christie你自己搞，总之唔参与，因为我真系觉得好失望同不被尊重。”

踢爆女友欲揽权搞武馆 遭徒弟群起反对求救

原本对丧礼及遗产都不想再理会的Charlene，最终却因为亡父的心血“武馆”而被迫挺身而出。她大爆Christie对武馆亦虎视眈眈，企图以“师母”姿态掌权：“爸爸武馆𠮶度，Christie又要谂住做Leader（领导），想带起成个刘家班嘅团队。”

Charlene指自己起初并没有打算高调争做承继人，但爸爸的一众入室弟子却私下找她开会大吐苦水：“其实我本来冇打算打篇文出嚟话做承继人，系因为爸爸啲徒弟私底下揾我开会。佢哋话Christie加入咗，但佢所有嘅计划都极不合理，一嚟就净系讲钱，当做生意咁，所以佢哋对佢嘅行为好反感！同埋Christie对功夫都唔系好熟，但佢可能又想有啲嘢可以话事。所以啲徒弟就叫我快啲解决呢件事，叫我快啲做爸爸嘅承继人。”

5岁习武接棒第六代传人 誓保亡父欧洲分馆心血

得到众徒弟的力撑，加上深知这是爸爸唯一的遗愿，Charlene最终决定肩负起这个第6代传人的重任：“其实我都有责任，爸爸在生嘅时候，都系想将来由我去接手功夫嘅嘢，帮佢宣扬出去，所以我都觉得我应该负呢个责任。我知道呢个系爸爸唯一一个心愿，佢一生人就系对功夫好热诚，对佢师父刘家良亦好忠诚。师公刘家良𠮶边啲女都冇加入我哋功夫圈子，都系外边啲徒弟接手，所以我知爸爸好想我自己亲自去接手，一代传一代咁承继落去。”

作为洪拳正宗传人，Charlene的武术根基绝对深厚：“我五岁就开始接触，断断续续去到中学十四岁嘅时候，就正式跟爸爸拜师学艺，一直跟爸爸学到而家。” 面对爸爸留下的强大武术版图，她坦言压力甚大，但绝不退缩：“佢而家喺欧洲地方，英国、法国、德国、瑞士等都有武馆，佛山𠮶度都有一间。其实压力都几大㗎，但我都想帮佢完成心愿，继续将功夫宣扬出去！”