吴家乐近日接受梁靖琪主持的网上节目《The MultiTalk》访问，大爆当年为了追寻演戏梦，毅然决然“举手”退出综艺科转投剧集组，结果换来的却是被定型兼无人敢用的残酷现实。为求演出机会，他竟然不惜放下身段，连续20年不怕面懵，亲自逐间监制房敲门“𢯎捞”。

音响幕后出身 曾嫌艺员人工低拒入行

吴家乐透露，最初其实是做幕后音响出身，根本没想过做幕前：“我初初入行本身系做音响，其实我入行系谂住我打份工㗎咋嘛！我见到班幕前嘅演员咁鬼辛苦，跟住我望一望，你个人工分分钟低过我！𠮶时我仲做幕后嘅时候，有的士单，OT又多，加埋个人工系好好嘅收入。当时艺员部叫咗几次去，但我都系推咗。”

直至后来正式成为幕前演员，头几年他也只抱着“打份工”的心态，白白流失了许多黄金机会。后来他才惊觉演戏才是真爱：“我谂咗好耐点解我仲要做呢行呢？系我发觉我真系好钟意演戏，呢个系我搣唔甩嘅嘢！”

转组无人敢用 被定型“搞笑主持”陷徬徨

当下定决心向剧集发展时，现实却给了他沉重一击。吴家乐直言当时举手退出综艺，专心入戏剧组（Drama），结果却换来数年的冷板櫈：“冇人够胆揾我。点解呢？‘家乐你做咗十几年，我揾你做啲闲角我唔敢，即使餐厅好多个show嘅我又唔敢揾你。’有戏做𠮶啲又觉得你似《EYT》主持，即系等同揾你同邓梓峰，好似一个巴斯光年，一个就好似搞笑成日扮女人，好难搞㖞！有阵时就系俾人形象化咗。”

由综艺跳去剧集组，瞬间变到无人敢用，令他一度陷入无比徬徨：“𠮶个阶段我谂我系咪拣错咗啦？自己好似拣错咗条路，但系又返唔到转头啦已经。说话难听嘅，但自己想继续行就争取啰！”

敲门20年求机会 感恩文伟鸿提携重拾自信

为了争取机会，吴家乐彻底放下自尊，主动出击：“你估我冇自己逐个监制房敲门咩！我做咗20年都仲有逐个监制敲门！我同佢哋讲：只要你畀机会我，我唔会say no！一个shot又好，一场戏又好，只有我一张相嘅，我都会接！今次唔用吴家乐，下一次有机会做嘅就会畀你，我要突破啰！”

最终，他的坚持打动了金牌监制文伟鸿（Jazz）。当时Jazz找他演一个阴阳怪气的杀手，《城寨英雄》中冯春美一角，他一度因为缺乏自信而想推却：“我个心开心咗5秒，跟住同监制讲‘唔好意思，我惊我做唔到，我唔敢接’，我即刻推番佢。我惊累咗人哋，我死冇所谓啊……但佢就畀咗好大信心我，佢话‘家乐唔好讲咁多，返嚟试造型先啦’。我真系由呢个剧开始就得到信心！”

视佘诗曼为EQ榜样 拒绝回望过去

在娱乐圈打滚多年，吴家乐坦言曾因自己EQ低而吃亏。他特别提到视后佘诗曼是他的最佳学习榜样：“我留意到我其实系一个IQ同EQ都几低嘅人，但系揾演员去学习，其中一个就系阿佘啦！佢系一个极高EQ嘅演员，我好欣赏佢。我觉得佢对于现场任何嘅一啲声音，或者负面新闻都好，你攻击唔到佢，你唔会影响到佢。可能返到去同啲friend炒虾拆蟹，但系喺公众地方、喺厂入边，你唔会影响到任何嘢。呢啲先系演员嘅素质！”

如今已经年过半百的吴家乐，心态变得更加澄明，不仅与好友梁思浩等人转战新媒体拍片，更拒绝缅怀过去的风光：“可能我工作上面行错咗好多步，但我份人呢就系唔会望返转头。我唔会睇返以前，因为以前嘅过去咗、机会过去咗就过咗，辉煌系过咗。我会不断学习，我会谂而家50几岁嘅我，就谂办法做返50几岁个人要做嘅嘢！”