马赛剖白艳照流出低潮 毕生感谢许鞍华邀试镜:觉得仲有少少价值
马赛近日作客由李凯贤(Brian)、伍咏薇(伍姑娘)的HOY访谈节目《九运会客室》,期间剖白2014年艳舞片段流出的事件,透露在报道出街前一晚收到通知,忆述当下心情:“我比较难受嘅系唔知点样面对对屋企人,面对公司,因为呢啲系好private嘅嘢,我冇可能同屋企人或者公司讲曾经有件咁嘅事,但系我知道,死喇,我好对唔住佢哋嘅栽培,呢个系我第一个反应,我会影响好多人。”她指是自己决意开记招一次过回应,以为答完事情就会了解,后来回想自己其实处理得不好。马赛坦言事发后她躲在家中一星期,关实窗帘不敢见人,但感激有圈中人上她家陪伴,并点名感谢胡杏儿在微博发文力撑,不过在整个低潮中,她终生都感激的是许鞍华导演(Ann),对方竟于事发后一星期找她为电影《七人乐队》其中一个单元试镜,因为在马赛深深自我怀疑时,是许鞍华的机会让她觉得自己尚有“少少价值”,并直言:“我话我一定系永世感谢你,如果冇咗呢一个目标同埋理念,觉得自己仲有少少价值,系真系好难撑落去。”
报道刊出前7小时获通知 否认以私密片段炒作博上位
马赛回想出事一刻仍记忆犹新:“𠮶时出事嘅时候我系好shocked,我记得好清楚,我喺几个钟之前知,因为我契妈有识一啲传媒朋友,收到传媒朋友话唔好意思,我哋听日六点几钟要出杂志,前一晚11点左右,我知道七个钟之后会发生呢件事。人哋话‘唔好意思,呢个系上面话必须要出’,真系好似讲返故事咁,好似好dramatic,我哋几个钟之后要出马小姐呢篇报道,对唔住,上面一定要出,单声,叫你有准备。”
伍咏薇追问当时如何处理,马赛强调自己当时发展平稳,甚至被指“出道即巅峰”,不可能流出这些照片搏炒作去毁掉自己事业:“当时所有风波,𠮶条片,我知边个人有嘅,梗系唔系话我send俾报纸所有人,要报纸写我,𠮶个系好私隐嘅片段。”伍咏薇亦直言:“成熟嘅人谂,得你同我,两个人,点会出到街呢?”暗指是对方流出。
自责连累家人公司默默落泪 主动开记招以为事件会告一段落
得悉报道势必出街后,马赛已“心中有数”,知道事件必定会“爆煲”:“冇嘢讲,我比较难受嘅系唔知点样面对对屋企人,面对公司,因为呢啲系好private嘅嘢,我冇可能同屋企人或者公司讲曾经有件咁嘅事,但系我知道,死喇,我好对唔住佢哋嘅栽培,呢个系我第一个反应,我会影响好多人。首先我影响咗我公司,我个copyright喺公司,第二我会影响咗屋企人,咁private嘅嘢,所以其实当时我层楼住咗个邻居系律师,我就有谂系咪揾法律上嘅处理定系点?我好冷静,其实我有冇喊,当晚𠮶时我冇歇斯底里𠮶种喊,我默默流泪,当日开始我就食唔到饭。”
当时马赛在香港只与工人姐姐及一只爱犬同住,家人长居外地,她坦言根本无勇气提前向父母交代这件事,冷静思量后,她向公司提出开记者会。如今回望,她直言:“其实我讲嘅每一句说话都系我真心想讲,公司唔系好识点样处理,好多记者去问曾醒明先生、乐小姐攞马赛嘅feedback,我电话爆炸咗,好多message我都唔敢睇,其实我系唔识处理,如果我可以多啲智慧去处理呢件事情,可能我会处理得更加好。但系当时就系要面、要赢,所以我要企出嚟开记者会,公司话你真系要开记者会?我话我想有一个了结,讲出嚟,我冇呢条片,我冇乜乜乜,我冇乜乜乜,讲完,结束咗。”
闭关闩窗帘避狗仔队 陷自我怀疑最感谢胡杏儿力撑
记者会过后,马赛足足一星期不敢踏出家门半步,全日拉实窗帘避开楼下五、六架狗仔队采访车;虽然那段时间每日都有圈中同行上门探望,但大家亦爱莫能助。被伍咏薇问到当时有否见尽人情冷暖、或是昔日好友“鸡飞狗走”,马赛指自己向来目标明确,入行只一心想做好份工,平日极少与圈内人埋堆玩乐,因此出事时本来就没有太多深交的娱乐圈朋友。她透露2013年经历绯闻报道后,2014年事发前已开始看心理医生及写感恩日记,为了撑过这段黑暗日子,她便写日记自我疗愈:“我mark低边啲人我要感谢,其实都训练紧自己唔好Focus喺负面嘅嘢,有两个月杂志基本上全部都系我,负面嘅,各种各样都系我,我有时睇啲有时唔睇啲,令到我𠮶段时间有一个精神上嘅压力同埋幻觉,其实我唔知我究竟系边个。我系咪真系咁样呢?点解佢要咁写我呢?究竟呢个系咪我呢?”期间有朋友离去亦有朋友变得更亲近,而这场“事故”最终演变成她人生的“故事”。
马赛点名感谢胡杏儿:“杏儿真系有喺微博上面撑我,公众平台撑我,我记得当时嘅杂志有80%都系Negative,可能20%都会有啲人支持,但系好细声,好多公司睇住我出道嘅高层、监制,佢哋都好撑我,了解我嘅性格。”
人生最低谷突获许鞍华邀试镜 得悉与吴镇宇合作喊住答应
在躲在家中避世的的最低谷时刻,马赛人生突然迎来一线曙光:“就系我经理人打俾我,佢话‘赛赛,头先许鞍华导演,有个短片想揾你拍,你有冇兴趣呀?’”马赛2014年开始学佛,每当钻牛角尖时便播放《心经》,她深信有一股力量与自己同在,才会出现这个机会:“佢话阿Ann想揾你拍戏,你介唔介意,有冇心情去做casting ?男主角系吴镇宇,我话‘哗!OK啦 OK啦。’一路喊住话OK,好似拍戏咁样。”
终获选中演出重见阳光 英国避世回港搭的士发生尴尬一幕
答应试镜后,马赛激动得开心大哭了10分钟,但随即提醒自己不能再哭,因为当时已有一段时间吃不下咽,再哭下去身体会垮掉。由于试镜定在一星期后,依然不敢拉开窗帘的她,每天强迫自己吃东西撑下去。一星期后,她终于在文化中心一间咖啡店见到许鞍华,自己紧张而不敢作声,并形容如果这是一套属于“马赛”人生的电影,这一幕剧本想必是讲到主角很久没见到阳光:“佢坐喺度,背景好似出现咗耶稣光咁,因为阳光晒到湾仔个海面,我会觉得原来呢个世界仲有光嘅。但系佢casting好多人,佢就话有机会再通知你,我𠮶时就决定我离开,我就去咗英国,同公司话我请假。”
她坦言去英国一个月所谓“游学”进修舞台剧,其实心态上只是想逃走、静一静及不想见人,直言若人生如戏,自己角色当时只求活著:“我呢个角色得一个目的,就系生存落嚟,活着,拍好许鞍华。”人在英国期间,她于10月3日突然收到通知获选中演出,为配合吴镇宇档期随即订机票返港,开工首日更发生极具戏剧性的一幕:“我记得拍戏第一日,我搭的士,广播电台就系,‘今日新闻到呢度’之后有个速报‘纯纯兔马赛返嚟啦!’我坐喺后面好尴尬,你明唔明?我坐的士去开工,佢个Radio,话马赛返咗嚟香港。”
因许鞍华邀请重拾自我价值 马赛永世感谢:否则好难撑落去
她坦言当时觉得人生完全不受控制,仿佛成了任人书写的故事主角,直至拍完该片,才重拾少许自信,自己终生都感谢许鞍华导演:“其实好感恩,阿Ann我依家仲有联络,我不停喺呢十几年都有同佢讲感谢感谢,佢话‘你唔好感谢我,我只不过觉得你个样好似60年代𠮶个人嘅样,比较老师,有书生嘅味道,系咁样啫。’但系其实我觉得只不过系一个善良嘅人佢嘅说辞,其实佢真系帮咗我。我话我一定系永世感谢你,如果冇咗呢一个目标同埋理念,觉得自己仲有少少价值,系真系好难撑落去。”她表示当时蒙查查入TVB、选港姐,所有际遇都推她上高位嘅时候,但同时令她觉得“我所有价值就系我戏好唔好睇、观众钟唔钟意我、媒体点样写我。”直至不愉快事情发生,媒体态度180度转变,她不禁反思究竟自己还剩什么价值,结果发现原来只有深刻的自我怀疑:“佢将你觉得你执着嘅名利、金钱、朋友、人哋嘅睇法全部攞走晒,咁我仲剩返乜嘢?我由阿Ann呢个电影,揾返咗我仲有少少价值喺度,拍完呢个之后,珍姐𠮶边又开咗套《东坡家事》,系黄伟声导演。”
伍咏薇安慰没有做错 马赛反认任性:我冇话AI合成,系我我就认!
伍咏薇安慰马赛,指其实她没有做错任何事,马赛却回答:“但系其实系我唔识得处理,我有冇任性?有冇唔听大家嘅说话去做一啲嘢?我觉得我有,入世未深,我哋叫吃亏啦,你系要吃嘅,吃咗就认,我觉得系要认,认咗之后我觉得任何所有嘢你都要接受,系我嚟嘅,我又冇话系AI合成,系我我就认!”
杜琪峰电影戏份遭删诬蔑戏屎 感叹跌入谷底“一沉百踩”
拍毕台庆剧《东坡家事》后,杜琪峰监制的电影《七人乐队》及《三人行》(赵薇、古天乐、钟汉良主演)曾透过朱淑仪(Elaine)找无线艺人客串,马赛亦欣然答应参与。不过由于当时剧本边拍边写,待她从内地工作返港后,才获告知其后续戏份已被删减。这件事却令她再次体验到娱乐圈的残酷:“我记得好清楚,杂志好大本就写我话我戏好屎,俾人cut咗,所以你头先问我边啲朋友好、边啲朋友唔好,其实我心中有数,不过唔好嘅人我唔会再俾佢留喺我生活当中。当时有句说话叫一沉百踩。譬如我拍到阿Ann呢套戏,就话我唔知用啲乜嘢计谋去氹阿Ann嘅Assistant,杜sir嘅戏又话我戏好差俾人踢出剧组,后尾就觉得我企喺条街度都系错。”
青海支教成人生转捩点:所有自我执著都系Bull shxt
其实当时无线依然给予她不少机会,娱乐新闻台监制更安排她担任直播主持,令她感受到身边仍有许多人爱锡自己。然而完成节目后,她主动向公司提出请假:“我今年嘅show做完,不如真系俾我静一静,因为我出亲嚟都系累人,拍一套阿Ann嘅戏,又话我要出古惑,拍杜sir嘅戏又话我乜嘢,任何人嘅新闻,我黐埋去都系唔好,我企喺度好似将成个event变咗绯闻、是非,我话不如我嘅show做完我请假,就去咗支教,去咗青海,𠮶个经历改变我好大,之后我就冇再食精神科药物。”青海的纯朴生活彻底治愈了她的心灵内耗,她领悟到:“之前所有所有嘅执着、谂唔开,都系自我嘅执着,系bull shxt!因为我生存其实冇发生任何问题,只系我个脑不停谂,‘马赛系点样、香港小姐系点样、我建立咗咁耐嘅观众点解唔再钟意我,我究竟系点样?’其实系bull shxt、系幻觉,你喺𠮶度生存,每日最简单,其实人生除咗食得好瞓得好,有得疴之外,心情好,其他嘢都系bull shxt。”直至2015年公司与她洽谈续约时,马赛自觉心灵已无法再应付这个复杂的环境,最终毅然一走了之,留下一句:“对唔住,我要靠自己,我要生存先!”之后全力在北京重新开始。