唐安麒踢爆美容业劈场黑幕无惧寻仇 自豪做清流39年零投诉成功
“美容教主”唐安麒(Dr. Angel)日前出席慈善活动,安排旗下娱乐公司ACE Entertainment韩国偶像学院的学生及“Baby idol”到场跳舞助兴,而唐安麒接受《01娱乐》访问,讲到早前踢爆美容业界的不良“劈场”手法和黑幕,她直言多年来确实有人叫她封口,不过她无惧寻仇或威胁,会继续做美容业清流,保持39年零投诉金漆招牌,霸气表示:“我唔会因为咁样唔讲?我唔会,因为今年我哋公司39年,我创业39年,好多人好相信我,如果讲做美容业业界、健康业界,我相信我有一定嘅公信力喺度,所以我觉得我有呢个责任同埋义务,将我知道嘅嘢讲俾人哋听,我无惧,有啲咩嘢我会继续讲!”更教大家去美容院时如何自保。
JJ Baby韩国选秀胜出将两地出道 预告月底公布震撼消息
唐安麒透露早期培育的“JJ Baby”在韩国选秀节目胜出后,即将在韩港两地正式出道:“佢已经去咗韩国一段时间,加上佢喺韩国亦都有参加咗一个选秀节目,亦都赢咗,𠮶个选秀节目其中一个嘅评判,就系BIGBANG嘅大声,所以佢将会好快JJ Baby以团队形式会喺韩国同香港出道。”韩国每年都有大量女团出道,年纪又细,问到如何保持竞争力,Angel指最重要是了解市场变化,现时她亦积极拓展马来西亚及泰国市场:“月底我哋有一个大型事件会公布,𠮶件事都会令到香港嘅朋友几震撼几开心。”
踢爆美容业“劈场”手法无惧威吓:我会继续讲
此外,近年美容界连番爆出高压推销风波,例如数月前有妇人在沙田护肤品店门外跪地痛哭,控诉遭不良手法高压推销逾6万元产品。向来敢怒敢言的唐安麒,早前拍片揭露同行“劈场”恶行,被问到公开踢爆业界黑幕会否担心遭人追击或寻仇?唐安麒直言过去确实曾受威吓,甚至一度需要聘请保镳护身,但她强调绝不会因此退缩:“其实会嘅,但系我够胆讲嘢唔系一年半载嘅事,我从创业冇几耐我就讲,会有人追击我,叫我唔好讲嘢呢啲,其实以前已经有出现过,所以有一段时间我系有保镳喺身边。但系我唔会因为咁样唔讲?我唔会,因为今年我哋公司39年,我创业39年,好多人好相信我,如果讲做美容业业界、健康业界,我相信我有一定嘅公信力喺度,所以我觉得我有呢个责任同埋义务,将我知道嘅嘢讲俾人哋听,我无惧,有啲咩嘢我会继续讲。”
批不良美容院执完改名重开 唐安麒自豪39年零投诉
她又痛批部分无良美容院惯以“改名换姓”逃避投诉,并自豪旗下集团39年来在消委会保持“零投诉成功”的纪录:“我唔明白点解呢啲手法仲会继续!佢哋做法系今日开呢个名,然后有人投诉佢,就闩咗佢,开过另一个名,呢样嘢反复做咗好耐。我自己好自豪嘅就系,我哋到今日能够喺消委会零投诉成功,系唔容易做到,我自己好坚持,同埋我觉得对得住客户系好重要,我好开心一样嘢,我对自己身为香港人有一个期望,点解香港唔可以有正统嘅美容中心?我39年做咗畀大家睇,我哋做到呢一个良心事业,保持我嘅公信力……所以我认为,我做得到嘅就系替香港人对于美容业有一股清流。”
低价美容疗程暗藏高压推销陷阱 教两招自保
谈到最睇唔过眼的行业乱象,唐安麒直接点名批评俗称“劈场”陷阱,并提醒年轻消费者切勿独自前往或携带多张信用卡:“通常用好低嘅价位等你上咗去,上到去你除晒衫,佢就会批判话你好肥、你依度唔得……话唔系三百几蚊搞掂,叫你买几万蚊疗程,知你有卡喺手就夹硬碌爆卡,甚至有啲喺隔篱开一间财务公司,其实都系同一个集团。讲呢啲系好危险,但系我好希望特别系年青人,你哋要醒觉,我唔系叫你相信我,唔系叫你帮衬我,但系如果你真系想要帮衬一间嘅时候,你可以search吓。同埋我成日教人,你同朋友一齐去,千祈唔好一个人去,同埋唔好带咁多卡去,佢话390几蚊,你就净系带390几蚊。”她透露不少同业私下亦会向她请教营商之道,她亦不吝分享,深信只要对得住良心,任何人都可建立公信力。
带爱女巡视新舖传授营商心得 7岁已表明有意继承家业
唐安麒早前曾在社交平台分享带爱女前往粉岭新店视察装修、传授“拣舖”心得的片段,形容为“历史时刻”,问到女儿是否已准备好继承其衣钵,她笑言女儿目前仍在外国读书,修读Business与Media相关课程,现阶段似乎言之尚早:“佢自己话咗想嘅,但系到时睇吓点先,佢而家喺外国,不过佢每次返嚟,我都会慢慢慢慢俾佢去了解吓事业上嘅嘢。”
唐安麒强调自己从未强逼女儿接班,但忆述爱女小时候的一番童言令她感动至今:“我真系冇逼佢,好多人都问,你得一个女,系咪佢继承你?我真系冇谂过,但系我个女,细细个有人问佢,‘你第时系咪要帮妈咪做嘢、帮佢事业?’佢好细个,可能7、8岁,就讲话‘我唔做边个做呀?得我一个女咋㖞。’再大啲之后我问佢系咪真系想,佢话‘我会帮你,唔想你咁辛苦。’都几感动。”
俞可程曾接受旗下瘦身疗程 外貌被批评获唐安麒力撑:各花入各眼
此外,《女神配对计划2》参赛者俞可程(Kanis)早前去唐安麒旗下瘦身中心接受“10日瘦10吋”疗程,配合“宇宙饮食法”短短10日全身激减12.2吋、轻了4磅。问Angel有冇睇节目,她笑说:“有呀有呀,好似佢最近好伤心?系咪话Oscar同佢冇继续?”她赞俞可程为人乖巧:“我想讲我几钟意呢个女仔,之前佢嚟我哋度做Treatment,做咗之后有啲新闻出咗嚟,新闻出咗之后我话既然出咗,不如你就同我拍啲reels话俾大家听,咁佢又话肯㖞,我都几开心。”至于有部分网民批评俞可程的外表,唐安麒就认为是各花入各眼,自己都听过有人赞俞可程有魅力,而且她认为人品较重要。