头文字D︱刘伟强访问自豪为漆黑山道添生命　感激飘移车手揾命搏

刘伟强与麦兆辉经典作品、寰亚电影《头文字D》今年上映20周年，世界各地“头D迷”（《头文字D》粉丝暱称）举办不同庆祝活动。香港作为电影的原产地，隆重其事，电影4K修复杜比全景声9月17日重返大银幕。刘导非常满意，赞叹：“好自豪，点解20年前拍到一部咁好睇嘅戏？真系揾命搏！”他坦言不会开拍续集。

未上映先兴奋，无论是正场预售，还是“头D迷”、AE86车迷、拓海粉丝等包场都反应热，甚至“斗爆金句场”门票都火速爆满，两度加场，全城沸腾。

刘导自豪地说：“一个日本漫画嘅故事俾我哋拍，90%香港演员，结果超乎大家嘅想像，20年后睇返都系咁好睇。今次4K修复版，提升画质比以前嘅版本睇多好多嘢，声音亦重新调整，感受好唔同，啲声喺前后左右冲埋嚟，呢个系我最高兴嘅效果。”他回味每一段配乐：“由开场，到周杰伦（饰演拓海）赢咗乐仔（余文乐饰演中里毅）......每次重睇都好似叹紧老酒，好醇、好好饮！”他透露与星级配乐师陈光荣仔细调整配乐和车厢内外的引擎声效，配合杜比全景声后“啲嘢出晒嚟”，感觉好正！

“无论AE86、GTR、Evanlotion都有性格，我哋冇当佢哋系死物，当佢哋都系有血有肉嘅演员。睇返飞车场面，依家拍唔返，速度感同埋每个人与人之间嘅感情，系我哋团队嘅骄傲。镜头穿过车辘到车厢，座山就拍到有生命嘅一样，车路就好似血管流动。多谢当年一班日本飘移车手，每个镜头都系佢哋好用心、用精湛技术、用生命去同我哋搏返嚟，因为一个唔小心随时就跌落山崖。”刘导表示每天开工前，工作人员来回山道仔细检查地面有否碎石，以确保安全。

据悉刘导专挑高危镜头亲自揸机拍摄？他承认：“因为我知道我自己想点，准确拿捏。”拍摄前，演员要训练、赛车要改装，就连“主角”秋明山都妆扮一下，刘导说：“座山完全冇灯，于是我同美术、灯光组一齐研究，用雪糕筒、街灯、广告牌、围栏、光管，每一区用唔同嘅灯光效果区分，好似画龙点睛，为一座黑鼆鼆嘅山添上生命。”