触电专访｜林敏骢向演技出发　“只要做啱一样嘢，冇人郁到你”

一直以即兴风趣搞笑见称的鬼才林敏骢，近年开始转战演戏，2019年自导自演《如珠如宝》，笑中有泪令人惊喜，2022年做男主角演电视剧《下流上车族》，与鲍姐一场感人肺腑戏，一气呵成，好让人对他刮目相看。来到新上画电影作品《触电》，再次当男主角，一位中年大叔玩电竞，更由世代之争蕴酿出父女情，今次又会否成功打动你。

“要估你唔到，咁先贯彻我作风”

说林敏骢近年全力发展电影，其实一切都是无心插柳，对林敏骢而言，那些机会都从没有刻意安排︰“都系行到呢个位，遇到呢个工作机会就去做。”唯一分别是过去林敏骢演的都是林敏骢，搞笑无厘头，但近年开始见到角色的分野。“就系要估你唔到，你睇错晒，咁先贯彻我作风。写歌都系，最正经得，最搞笑又得，听到你唔喊唔笑都得，呢个经验引伸到演戏都可以，就算接演《下流上车族》时，都未谂清楚点演，笑多定笑少定点到即止，只见去到某些场口知道感情发挥就去。”

“要多谢自己啲作品”

其实林敏骢的作品偶然都会在影圈出现，《爸爸》的《这是爱》、《九龙城寨之围城》有《跳舞街》，都是林敏骢出品，数十年后以另一形式亮相。“所以我开演唱会时，每次都多谢歌手多谢观众，其实最应该要多谢系我啲作品，好似啲仔女咁，自己有手有脚识行识走，十年廿年后又会再流行番。首《跳舞街》hit到而家都仲hit紧，证明你只要做啱一样嘢，冇瘕疵就冇人郁到你，就算系我自己，都揿佢唔住，不受时间限制。”

“我走去写搞笑歌，你企咗喺度啦！”

情深作品可永恒，搞笑之作都一样恒久，一张90年代堪称神经错乱的专辑《有冇线电台》，便包涵多首搞笑经典，而当年有这决定都是要证明，自己的作品畀咩人唱都一样得。“我啲作品捧到咁多巨星，咁我求其揾个唱都得啦，结果曾志伟唱都卖廿几万张，之后仲有埋个节目。”

看似嚣张，事情上又的确抵佢嚣，“我正经写咗咁多，你又话你识写喇，大家拎十只廿只出嚟比，我都未惊过。当你话打和啦！我走去写搞笑歌你就企咗喺度啦！得个听字。啲歌初初拎版权好顺利，后来知道系我哋拎就问长问短，有啲仲唔肯畀。”问到当时可有行业觉得他搞乱档？“一定有人唔服气，但你又试下改番我啲歌，你又唔识呀。你改到咪改，睇下你改我快定我改你快。最经典系《酒杯敲钢琴》，大家听完《酒杯敲你阿嫲》，完全唱唔番原版，有仇报。”

“AI未填到广东词”

去到后来，林敏骢都填到冇满足，渐渐退出，不过都一直有留意市场发展，甚至尝试过用AI创作︰“AI写剧本系可以，拍短片、抖音，揾佢写剧本分场、大钢都有我。试过揾佢写份词，都似模似样嘅，不过只限国语，粤语未得，啲音准都未搞掂。”会唔会几年后已经追得上？“我都冇理佢啦，呢个市场（填词）都冇咗。”