刘伟强与麦兆辉联手执导经典电影《头文字D》20周年，4K修复杜比全景声重返大银幕两个多星期，观众反应有增无减，即使有多套新戏陆续上映，仍无阻观众入场意欲，票房直逼$300万。日前刘导与麦导跑了多间戏院谢票，吸引“头D迷”带埋珍藏追捧，完场大排长龙签名拍照留念。期间麦导爆料，原定第二集在阿尔卑斯山赛道飘移赛车，因为不能以真车拍摄而告吹。

麦导第一次亲身体验“斗爆金句场”表示好感动，观众由开场就斗讲对白，就连叹气声、回音、喊声、作呕声都照跟，还大合唱插曲周杰伦的《一路向北》，非常投入。完场后，麦导对观众说：“好开心，好激动，成套戏由头到尾啲对白都可以背晒出嚟。最钟意边句？（观众：三万蚊过夜）你哋班咸湿仔呀！20年后再睇，套戏好似无落后咁。（观众：你哋走得太前！）”他捧腹大笑。

他续说：“你哋唔好再问有冇续集，系冇嘅！但其实有个第二集嘅故事，当年嘅合约系可以拍两集，拍完第一集后，容许我哋可以唔再喺日本拍。咁就啱晒，因为个尾系藤原拓海加入高桥凉介嘅车队，所以第二集一开始已经喺欧洲，喺阿尔卑斯山嘅夏天。第一个镜头就直升机shot跟拓海，唔系揸AE86，揸佢车队嘅车，喺阿尔卑斯山飘移落山，叫《头文字D：阿尔卑斯山赛道》。后来因为当地觉得太危险，唔容许我哋咁样拍，要我哋用一架camera car 喺度行，但所有车都用电脑画，我哋觉得无意思，所以就唔拍。”离场前，麦导呼吁珍惜在大银幕欣赏的最后映期，观众依依不舍大叫“唔好啦”！

有观众问到拍摄后赛车下落，刘导笑说：“本来谂住放喺公司，但我公司唔够大！”其实当年所有车都运返香港，以收录赛车声效等后期工作，他说：“因为每架车都要重新收音，真系喺将军澳飞车收音，啲响軚声系真。”