张继聪、黄浩然、张文杰、小野卢镇业等香港演员昨日（10日）出席时装鞋履品牌活动开幕派对，众星以美式休闲造型亮相，配衬品牌标志性皮靴。张继聪作为巡航电单车爱好者，一身美式复古牛仔造型简直衬到绝，他在活动现场接受传媒访问期间，大谈衬衫品味之余，亦分享主演作品《金童》即将面世的喜悦与坚持多年背后辛酸。

张继聪接受访问时表示一直为品牌忠实拥趸，拥有十多对不同款式的皮靴，配衬骑电单车造型最适合。阿聪热爱美式复古造型，更透露牛仔裤与外套都要靠“养”形成个人风格：“如果大家有留意呢大半年其实我都系着呢套衫呢条裤！”更笑指因保养牛仔裤长时间不洗裤：“以前我真系几年先洗一次，依家唔会喇，日日著、个零两个月洗一次，开始feel到有阵味咪洗啰！”幸好未被太太谢安琪与仔女嫌弃！

张继聪主演拳击港产片《金童》即将上映，笑言靓衫依然要著、不敢骚肌肉：“冇咗啦我𠮶个身型！一定唔系𠮶时嘅状态！我自己嘅品牌都会出啲靓T裇，谢票时送畀观众，剩系著条Boxer裤会好易冷亲，戏院啲冷气好劲！”电影酝酿六年终于面世，阿聪表示成为生涯最期待的作品之一：“因为每一个环节我都有参与，完完全全系我自己嘅BB！希望男女观众睇完都会觉得热血，始终系励志片嘛，我本身真人呢单嘢都好热血啦！”

张继聪曾透露电影于后期制作阶段一度资金不足，更自资六位数完成作品，但笑指老板是谢安琪：“真正嘅老板唔系我，因为我每个月啲人工系直入老婆户口，我啲钱系老婆嘅，我老婆啲钱系佢自己嘅！佢话得、我撑你，然后咪签cheque找数啰！”近年香港电影票房惨淡，阿聪坦言投入的六位数资金难以回本：“完全冇惊过！因为预咗返唔到嚟！”更续指：“依家票房有100万都值得庆贺，我都预咗可能系咁。但系套戏系励志片、我𠮶日都系励志片，如果够钟意一件事就All in去做，未必系大团圆结局，但尽力做到最好我都觉得无悔。”张继聪直言在奖项方面亦未抱有期望，表示作为金像奖董事一员，大会仍会继续努力办好金像奖，目前已展开明年颁奖礼的初步筹备工作。

张继聪亦透露太太在批出资金外，亦有全程支持《金童》制作，包括看过无数个剪接版本：“其实我老婆好好，同我一齐睇套戏过百次！初剪、顺剪再到做晒所有后期，佢到依家睇都好震撼好感动，仲系会睇到喊！”当年拍摄《金童》期间，阿聪为打造铁血身型操肌两年，笑言太太最受影响：“佢瞓喺我隔篱睇佢㗎嘛！瞓到张床侧咗，最受影响系佢啦！佢后尾先讲惊我减唔返，因为上到二百磅条腰真系好粗，好彩最后都还返个正常嘅老公畀佢！”

在《金童》以外，张继聪与谢安琪一同参与配音的港产动画《世外》亦即将上映，然而近日不少观众网民在预告释出后，针对配音作出不少负面评价，阿聪表示亦有留意相关消息：“多咗唔同社交媒体，容易听多咗好多声音，制造好多话题都系一件好事，但我觉得观众可以入场睇咗先，因为入场就会知道点解把声咁样处理。我觉得讲咩都唔紧要，你最后有入场就OK！”