9年前的《优兽大都会》（ZOOTOPIA），成功晋身为迪士尼受欢迎的动画系列，来到今年更发布第二集，而9年前为阿力及朱迪配广东话的两大巨“声”，黄子华和天后容祖儿再度合作。9年过去，大家都有不同改变，唯一不变，竟然系把声仲好似9年前一样，容祖儿︰“惊人大了把声沉了，原来冇乜变。”

鸣谢︰
化妆︰Angel Mok（容祖儿）
发型︰Angus Leung@Artify lab（容祖儿）

两集电影相隔９年，但其实剧情只发生了一个星期。上集讲到狐狸阿力做好人，成功投考到警队，仲同朱迪行孖咇拍住上。不过只系一星期，二人就开始觉得有点地方不太夹。祖儿︰“我仍然系干劲傻劲，咩都齐嘅朱迪警长。而阿力眼中依然认为朱迪太幼稚，太理想化。”

揾番9年前把声

事隔９年再配，祖儿都认同要花时间揾番当年的声线︰“好惊把声会变咗，人大了把声会沉，说话嘅能量亦跟９年前不同，于是花了点时间去揾，但原来冇乜变。只系激动起嚟，把声会‘跣軚’。而今次剧本仲加料多咗好多对白，我平时讲嘢好窒，但朱迪好精灵，说话好清脆，要捉紧个节奏。”

至于子华，他冇担心过声线问题，但问题却又降临到自己身上。“好犀利，我配音前拍完套戏，把声一直好地地，仲有两个月时间休息，日日都好健康。直至话要配音喇，先嚟喉咙痛，已经立即去睇耳鼻喉专科，都冇办法，有啲沙沙地。无办法啦，人生就系咁。但入到配音室，又谷番道元气出嚟，偶然都有一两下会沙，只要NG嚟过就OK。”

向往失去的冲劲

祖儿配的朱迪警长，是个入世未深，全脑冲劲的小伙子，不少人都觉得有点似初入行的祖儿。“而家得劲，唔冲喇！哈哈……”就是这份坦率的态度，自己仍会怀念吗？“怀念呀！身体真系好诚实，那几日围绕这个配音工作，当每日都对住呢啲画面，同埋好积极嘅对白，全都是自己向往嘅世界，𠮶几日特别开心。而且仲有一句对白，我都讲到眼湿湿，就系︰‘如果呢个世界冇人肯去做啱嘅事，咁个世界就唔会咁美好’。”

相比起狐狸阿力，子华觉得角色相当真实，切切实实是社会上有的人设。“佢好现实，比起纯讲理想嘅朱迪好唔同，始终真系出嚟混过，好有Street Smark（街头智慧），醒目仔一名。见到朱迪下下揾命搏唔系办法，所以呢个角色都几似我。”

子华︰我本人就系阿闪

讲到似，子华更觉得树懒阿闪更似自己，“其实我本人就系阿闪，无论讲嘢、食嘢、行路都系慢啲，本身个人就系咁，天生节奏系咁慢，只要冇嘢逼自己的话，我就会慢慢来。其实阿闪系极度活在当下，佢每讲一粒字，都系享受紧每粒字嘅美丽，所以先会咁慢，我都想学佢咁。相反，我会好惊做嘢好快好急嘅人。”

祖儿都一样，快与慢对她而言，只要不影响工作进度都无问题。“快同慢都冇所谓，但要清晰，团队工作各人总有自己的节奏，但只要清楚自己要赶及某个时间，不影响团队工作就可以。相比之下，我好怕不断催促进度的人，都未到Deadline就开始催嘅，我好怕。”

落晒闸只限幕后合作？

两度跟子华合作配音，有冇打算来一次幕前合作，尤其现在的子华已成为票房灵药。祖儿︰“我想合作系好正常，系子华想唔想先得？”呢刻子华都欢迎，但合作的范畴竟意料之外︰“睇下几时可以合唱，排番只舞，不过都要等3、4年时间，我系零舞蹈嘅人。”

祖儿听到有声气，打蛇随棍上︰“其实我栋笃笑系OK的！”只可惜子华又立即落闸︰“我呢样退咗休，唔好意思。”祖儿︰“你睇下，落晒闸喇！”子华︰“拍戏啦！你返去同老板倾倾。”事实上，《破。地狱》都是英皇出品，要跟子华幕前合作，又似乎冇想像中咁难，续集有冇得谂呢……杨老板。