《寻秦记》电影版自去年12月31日上映后，至今两星期内大破6600万元票房，大受观众欢迎。《寻秦记》剧组今日（13日）举行台前幕后慰劳宴，总监制兼男主角古天乐携同林峰、宣萱、郭羡妮、滕丽名等一众演员出席，更获剧集版“雅夫人”雪梨到场支持！林峰、雪梨与徐伟栋于宴会前合照，促成“赵盘雅夫人”母子及雪梨现实母子同框奇景，两位孝顺仔更一人一边啜妈妈的面珠，场面非常温馨！

雅夫人首映锡项少龙　雪梨：饮咗白酒冲口而出、冇心嘅！

林峰、雪梨与徐伟栋于宴会前接受传媒访问，雪梨继上次首映后再露面，被问到锡古天乐面颊引起疯传的片段，雪梨回应表示：“上年嘅事喇，过去咗、抹咗佢啦！（今年再锡？）梗系唔会啦！（当日为何有兴致？）廿五年冇见啦，同埋饮咗少少白酒、咁就冲口而出、冇心嘅！”儿子徐伟栋随即开玩笑：“后生女唔好乱咁饮酒呀，酒后乱性㗎！睇戏就唔好饮哂嘛！”雪梨难得与林峰、徐伟栋同场，对于两位“囝囝”一齐出现，雪梨欣喜地表示：“几奇妙㗎！一个系戏里面个仔，长大、成熟咗咁多！（林峰：仲生埋须！）系喇！咁呢个就做奸角，几错综复杂。”

雪梨戏瘾大接拍新戏：著旗袍要减30磅！

雪梨多年未有演戏，表示欢迎外界请她演出：“我不嬲都有戏瘾，不过肥咗啫！我都有接一部戏，唔知几时开，喺宁夏拍摄，到时要著旗袍，所以要减肥！（要减多少？）30磅！要减好快㗎咋！”当年饰演赵倩公主的郑雪儿在《寻秦记》第二结局里惊喜现身，雪梨当年与雪儿对手戏份极多，兴奋地表示：“好靓女呀！佢染返黑头发好靓！（续集加入？）要古老板揸主意，我揸唔到主意呀！”

谈到《寻秦记》有机会推出加长版，林峰表示心目中有一场戏非常希望能够加插：“我最想睇一场戏，唔讲得系乜，但系陶总管𠮶条line嘅，大家估下系讲咩啦！”林峰亦就网上疯传疑似演员片酬榜，回应表示：“除非系官方啦，如果唔系睇下就算喇！不过证明大家好在意我哋套戏，我自己嚟讲演好戏就最紧要！”

林峰乱讲有味笑话被雅夫人出手敲头壳

徐伟栋自去年起与姚子羚传出绯闻，徐伟栋表示未知绯闻女友有否入场观赏新作：“吓？唔知㖞……不过佢自己公司咁出名嘅戏（剧集衍生），佢应该会睇嘅，不过唔知系唔系睇我啫！”妈妈雪梨被问到姚子羚时，则表示未见过面：“冇呀，冇见过！我唔理佢有冇女朋友㗎㖞，最紧要佢独立、身体健康，佢要拍拖系佢嘅事。”林峰随即开有味玩笑指：“揾到女朋友证明身体都好健康！”雪梨见林峰乱开玩笑，随即出手敲“盘儿”头壳！

林峰最近忙于宣传，谈到带妻女观赏新戏的机会，他透露：“最近忙紧报小学，但我老婆有带佢去睇。（会怕爸爸好恶？）唔恶，𠮶啲系帝王嘅气势！我平时喺屋企地位好低！（有否重温剧集版？）睇返依家呢个新版本啦，起码演技我会有信心啲！”当年同场演出的雪梨则表示：“当时佢都好演技，叫我真系打佢块面，我话‘阿仔…会晕㗎㖞！’”林峰随即双眼发光，表示记忆犹新：“我好记得呢一幕，啪一声打落嚟，我真系停顿咗一秒！劲㖞真系！但个头套仲喺到、冇飞甩！”对于妈妈在剧集的演出，徐伟栋则表示：“以前细个有睇呀，我阿妹（徐颖堃）仲记得睇到佢畀人凌辱然后死，我哋揾张被冚住个头，唔敢睇落去！但最近重新睇一次，就敢睇埋落去喇！”