2026年的贺岁片《金多宝》，由金燕玲、钟雪莹、吕爵安(Edan)及李尚正主演，故事讲述一家人以为自己中咗六合彩8000万，但其实是孙女钟雪莹冇买到，结果要用尽方法去骗开始有脑退化的嫲嫲，希望她在人生最后一段日子过得愉快。金燕玲向来有一股强劲的气场，今次要饰演亲切的嫲嫲，她坦言一样冇变，片场的气场依然。不过她其实口硬心软，而从今次合作，更对三位后辈有不同的点评，从细微看到几位的优点。

钟雪莹开工即中六合彩

电影讲一家人中六合彩，那么几位现实中又有冇横财运呢？金燕玲一马当先抢答︰“我好犀利㗎，可以一个都唔中，你跟我买冇买𠮶啲就得。”阿正都坦言欠横财，原因可能是一次将财神拒诸门外。“之前中过几百蚊，仲系用纸的年代，结果冇去领奖，从此就冇再中过。”Edan都是冇横雕，四位当中唯一钟雪有，还要在开工当日就拎到好意头。“套戏的开工利是是一张六合彩飞，结果全组得我一个中，都系安慰奖几十蚊，但已经好开心。”

金燕玲自认气场大︰我一工作就好专注

玲姐向来予人气场大的印象，对此她直认不讳︰“我一工作就好专注，如果身边有人倾偈，我都会出声︰‘背紧对白呀，唔好嘈！’我唔系要闹人，系工作时需要全神贯注。”几位后辈都深表认同，开工时都未敢打搞玲姐，唯独钟雪是比较勇敢的一个︰“我算最敢𠮶个，戏外都敢同玲姐倾偈。”

有这份胆量，源于玲姐对她的特别疼爱。金燕玲︰“之前都冇同佢合作过，系有次编剧会聚会，陈茂贤带我去个饭局，当时成围人个个走去食烟，得番我同佢，佢就主动走过嚟自我介绍，又陪我坐。我当时已经知佢系边个，因为苏施黄睇完《填词L》有赞过佢。另一次又系电影宣传，又系其他人唔知咩原因行开晒，于是佢又走埋嚟陪我坐，倾下偈。系好小事，但就见到呢个小朋友好有心，见得我一个老人家就嚟陪下我、照顾我，所以对佢印象好深！”直至导演翁子光找玲姐拍戏，问到会由哪位演员演自己孙女，得知是钟雪便直呼︰“好呀，我钟意佢，本身都钟意佢，所以拍到一个嫲嫲点样锡个孙时，唔使专登去演，好自然。”

Edan自带“乡音”演土豪︰合作过先够胆向导演提出

既然玲姐力赞钟雪，记者便追问对另外两位后辈又有何睇法？金燕玲︰“Edan合作前，我都知佢系边个，第一日见面就系喺大宅，佢个土豪造型令我好惊讶，我知道佢系偶像唱歌，能够可以冇偶像包袱去演角色，系做演员嘅先决条件。做演员嘅，能够做到每个角色一出嚟就知系边个角色，就系成功嘅演员，我唔知佢接呢个角色公司有冇畀压力佢啦，但见到佢系好搏好投入。”

原来土豪造型都是Edan向导演建议︰“本身剧本写个角色系冇乡音，到第一次见导演就建议加入去，导演又觉得好。其实因为之前同导演合作过，我先够胆向佢提出，事后延伸到演呢个角色时，到底几时要有乡音，几时冇，都几有趣。”

李尚正搞笑能力MAX　吕爵安︰喺佢面前唔好讲我搞笑啦

至于阿正，玲姐坦言未看过他的作品，但当知道将要由阿正饰演自己儿子，便专登找他的访问看。“睇下佢做访问，听下佢讲嘢，有工作接触前，要先多啲了解对方。知道后生点谂，我都要学下后生啲讲嘢梗式。”对于阿正的搞笑功力，Edan都自愧不如︰“喺佢面前唔好讲我搞笑啦，佢系泰斗呀，喺佢面前我系喽蚁。”虽然今次是继《死尸死时四十四》，二人再次合作，但Edan觉得今次才正式享受到那份火花︰“上次合作完好似冇合作过咁，因为自己太紧张，个角色又要饮酒又盛，自己又新人一个，所以合作时冇乜感觉到。”呢刻阿正都不忘抢口︰“我印象好深呀，话晒都系同明星合作。”对于钟雪做自己女儿，阿正都有另一款抢口︰“我冇演过老窦角色，都系跟雪姐学嘢啦，我都怀疑自己现实中，如果真系有个仔有个女，我都未必做得好。”

对于有网民看过《 金多宝》的预告，便称剧情似《富贵逼人》欠新意，金燕玲都有听过︰“首先我冇睇过《富贵逼人》，唔知似唔似，但部分人睇完预告就已经话好笑咩？咪又系呢啲戏……你都未睇，畀个机会大家，睇咗先吖。我觉得唔理似定唔似，重点系部戏想表达咩，呢部系可以令观众笑同喊嘅戏，喊唔系凄凉嘅喊，系感人。”

鸣谢

场地︰Lubuds Group, FWD House 1881

金燕玲
化妆︰Stephen Lau @Stephenmakeup

钟雪莹
化妆︰Vanessa Wong
发型︰Hillnex Lee

吕爵安
化妆︰San @powderclub_hk
发型︰Man Chan @CHIC PRIVATE i salon
造型︰Anson Lau
服装︰Jw anderson from ITHK, Teamwang from Harvey Nichols HK, Kinks lab, Both paris

李尚正
化妆及发型︰Yaku