贺岁片《夜王》早前攻破1亿票房，截至前日（8日）为止票房为$107,349,420，昨晚（9日）导演吴炜伦与“欢哥”黄子华、“V姐”郑秀文、廖子妤、卢镇业、何启华（Dee）、杨偲泳（Renci）、谭旻萱（Mandy）、李芯駖、林熙彤去尖东派鱼蛋，并正式宣布将有162分钟的导演版（Director’s cut），更多吸睛场面即将出土，以及从未曝光的神秘嘉宾！

阿Dee赞子华神找数真汉子　豪言两亿票房联络NASA登月

谭旻萱（Mandy）、杨偲泳（Renci）、何启华（Dee）、李芯駖齐齐受访，讲到早前子华神开玩笑派鱼蛋，结果真的成真，阿Dee说：“因为系子华发起，大佬真系找数真汉子，我哋要畀啲掌声，找数真汉子，子华好嘢！”Renci表示：“以后唔可以乱讲嘢，原来真系认真，而家开始谂啲实际啲嘅想法，唔敢乱咁开空头支票。”不过讲到有2亿票房会如何庆祝，Dee就许下更大承诺：“应该要搞火箭升空，最近NASA都射咗上去月球兜个圈，我哋可能同NASA联络下合作，但系可能未揾到佢电话Number。”

三级版解封亲热戏　Renci倡设“蒜蓉白菜”谢票场

4月16日上映的导演版为三级版，令外界揣测观众期待已久，Renci的性感场口，以及与阿Dee的亲热戏终于可以解封，Renci说：“真系唔知，今次睇咗好多人嘅意见，大家都好想睇多啲关于一班公关小姐嘅故事，所以导演应该精挑细选咗，介绍返我哋咁多个公关小姐系点样成长，有咩困难。”阿Dee亦玄妙说：“冇嘅嘢就会有，有嘅嘢都有机会keep住有。”过往Renci曾投诉阿Dee在二人拍激吻戏前食蒜蓉白菜，问到“蒜蓉白菜之吻”是否都会出现在大银幕，Renci笑说：“我谂𠮶盒菜会出现，𠮶盒菜会有close up。”Dee：“依家可能AI技术，加啲AI嘢，一路蒜蓉白菜紧，就有啲蒜蓉白菜飞出嚟。”之后四位愈讲愈远，指可能会变“4D”电影，全场弥漫蒜蓉白菜味，阿Dee：“一到𠮶幕就打开呀嘛？其实我觉得可以部署吓。”Renci再建议可以整一场“蒜蓉白菜谢票场”。

芯駖率先补配音剧透惊喜　预告全新开场会以为入错戏院

其后阿Dee认真表示，加场版其实有很多演员演出，包括他饰演的Ace、煲煲（Renci饰）、Chiling（Mandy饰）和水晶（芯駖饰），大家的角色都会更立体，他也怕观众睇完他的戏份后，他会被打。芯駖就剧透：“我已经率先底咗少少，因为我要去配音。（阿Dee：咁佢一定有加戏！我哋都冇配音，得佢有！）唔系呀，因为我哋桑拿𠮶场有啲水声，有啲嘈，所以要重新配过𠮶段，但系导演话大家嘅戏都会出返晒嚟，但系我觉得最精彩都系个Opening，我偷睇咗，睇完之后我觉得……导演果然好犀利，咁都俾佢谂到！”阿Dee和芯駖皆指出，今次的开场会令观众以为入错戏院，在睇另一套戏。

Mandy还原爆粗戏份　承诺谢票送“粗口祝福”：唔可以嬲我

Mandy就说：“我知道啲粗口返晒落去，因为导演有同我讲呢句，佢话你某某哔哔哔哔同埋哔哔哔哔，我剪返晒落去喇，我话‘咦？咁多谢？好㖞！’啲粗口会入返晒去。（问：唔使补配音？）因为好似好Firm！好收得（音）！”Mandy就戏称自己平时不讲粗口，一讲都想呕，会打冷震，Renci笑著附和：“佢演得好好，佢本人唔讲㗎，练习咗好耐，问我哋点样发音，佢平时一句都唔讲！”当问到谢票福利可否是被Mandy用粗口“祝福”，她爽快表示：“即刻赠！你嗌到，即赠！但系你唔可以嬲我！我有呢个权利喺度，想被祝福可以祝福，我今晚返去train返，我唔记得晒喇，今晚要返去再睇返，睇吓大家想要咩version，唔同感觉都有。”她之后更建议芯駖可以围住浴巾去谢票当福利，芯駖听罢即大笑，说自己可以一字膊，更叫Dee哥都要一起围浴巾。

ERROR缺席《CHILL CLUB》记招　阿Dee：好似几正常

最后，《CHILL CLUB 推介榜年度推介25/26》记者会将于明日（11日）举行，但出席名单上未见ERROR，阿Dee就回应：“我哋《CHILL CLUB》系一个好公道嘅音乐节目，唔系话自己人就一定摆上去，我哋宣扬紧世界各地嘅音乐同埋唔同种类都会支持！今次我哋ERROR冇出现，好似都几正常，我哋都未有啲新音乐俾大家听，所以都冇办法。”不过ERROR队友肥仔（梁业）和193（郭嘉骏）其实都有出歌，阿Dee得悉他们皆未有出现在记招名单，笑说：“冇？咁肥仔唔够努力啰，我会鼓励我队长再畀心机！努力呢啲无止境，你冇得话人哋努力，你话佢好努力，即系话紧你唔够努力啰，叫你要放弃，所以要继续努力啰。”他又指相信自己要入乐坛只能靠V姐，到时出《星秀传说》1.0、2.0、3.0等版本，会练定黐脷筋版本的Rap。