《第44届香港电影金像奖》昨晚（19日）圆满结束，其中《再见UFO》获得5个奖项，包括：最佳编剧、最佳女配角、最佳原创电影歌曲、最佳导演以及最佳电影！典礼结束后，发行商高先电影举行庆功宴，最佳女配角得主卫诗雅、最佳原创电影歌曲《华富一号》演唱者黄淑蔓，以及入围“最佳男配角”的黄又南、戏中饰演又南大哥的朱栢康一同接受访问，朱栢康就亲自解释为何黄淑蔓得奖时他会爆喊。

朱栢康解释于黄淑蔓攞奖时爆喊原因：我唔系佢爹哋

朱栢康连续两年颁奖畀“阿妹”（二人于《破．地狱》饰演兄妹并在上届同时获奖）卫诗雅，他自言今届有两大荣幸事：“一就系颁奖畀阿妹，二就系黄淑蔓、崔展鸿攞奖嘅时候，有take我喺度喊。”记者指他连续两年都喊，他透露与《华富一号》的作曲、编曲及监制崔展鸿，原来是相识二十多年的好兄弟：“首先我觉得自己好丑嘅，点解又要影我喊呢？但系点解喊，当然，我一定唔系淑蔓嘅爹哋，点解会喊？因为崔展鸿系我相识咗二十几年嘅好兄弟，我哋一齐经历咗太多，无论系事业上面嘅嘢，私人上面嘅嘢，我哋好多人生上面嘅嘢，我哋经历咗好多，所以见到佢攞奖，我系好感动。”

他笑说：“好彩佢哋喺𠮶个moment先take我，因为喺佢哋take我之前𠮶个moment，我系伏咗喺白只个膊头喊到⋯⋯（颤抖）咁样，所以白只而家走咗，要返屋企换衫。（问：佢有冇嫌弃你？）冇呀，佢猛咁拍我大髀话，‘I know, bro’，因为我哋朱凌凌几个同崔展鸿嘅相识，就系喺佢18、19岁嘅时候，冇错冇错！”而身旁的黄淑蔓被问到起初知不知道朱栢康哭到泪流满面，她说：“我以为佢俾我嘅亲情感动到，我以为佢系一个好重家庭情，你应该系嘅，咁讲到爹哋佢就忍唔住喊。”当记者建议她都叫朱康做爹哋，朱康即落闸：“叫到老晒！”所以淑蔓就说会叫他哥哥。

黄淑蔓再夺金像奖称“叫亲糊都食糊”　卫诗雅：下次调转我唱歌

卫诗雅连续两年从朱栢康手上接过金像奖，她表示很开心，本身虽有点紧张，但因为一上台见到对方大大力给她拥抱，马上心都定了，朱栢康则指自己在台上已相当克制，忍住眼泪，谁知一下台又再哭。被问有冇导演睇中他的眼泪，找他演喊戏，他说：“好多导演都叫我拍喊戏呀！”而淑蔓就要求插队：“可唔可以帮我拍个MV先呀？”黄淑蔓早在9年前的《第35届香港电影金像奖》中，已凭《差不点我们会飞》获得过“最佳原创电影歌曲”，今次第二次提名，结果又攞奖，她说：“我觉得好劲，好似叫亲糊都食糊咁！”身边几位听完都“哗！”她即笑笑解释：“Sorry，太寸！我唔系咁嘅意思，我系抱住好感恩同埋好荣幸嘅心嘅，希望下次有机会可以自摸，自摸嘅意思就系我可以包办曲词编监！”朱康即说卫诗雅都一样叫亲糊都食糊，卫诗雅即谦称：“唔系，唔系，下次我调返转试吓唱歌啦，唯有咁样啦，希望下一次系攞到歌曲奖，上台唱歌。”之后黄淑蔓和朱栢康继续讲，指分别想攞女配角及女主角奖。

卫诗雅自爆公开电话号码搲捞坚有用：真系有收到剧本

卫诗雅与医生老公周祉安，不论是在红地毡环节、颁奖礼、庆功宴上都形影不离，非常甜蜜，当问到对方有否因她攞奖感动到喊，她说：“冇呀，佢冇喊，佢都OK，头先我拎住个奖，佢好开心，咁我拎住个奖，我话‘俾你拎吓’，佢话‘唔拎呀，好重！’”上次卫诗雅在导演会获奖时，突然公开自己的电话号码“搲捞”，透露暂时未有新戏开，指希望有更多导演、监制找自己，若有好剧本，绝对不介意减片酬；今日她再下一城，被问有戏开的机会会否再提升了她说：“希望啦希望啦，希望大家揾我嚟casting，任何角色都OK。（问：上次有冇人打俾你？）真系有，真系有！我真系有收到剧本，有嘅有嘅，系真系有，所以有用㗎讲自己电话号码出嚟！”讲到她凭7、8年前的角色获奖，朱栢康直言：“有时一个好嘅演员，佢里面有嘅斤両，注定咗喺度就喺度，佢唔受时间所摧毁。”

黄又南失落男配少少失望但未气馁：以杜德伟为目标

而黄又南失落最佳男配角奖，输俾《风林火山》的杜德伟，他不讳言有少少失望：“少少啦，但系Alex ……我哋喺《再见UFO》片场虽然冇戏份，但系我哋大家都有倾偈，头先我恭喜佢，大家揽一揽，佢都话‘你都加油呀！’我话‘我一定会㗎！以你为目标！’佢好好人，佢好Nice。”而对于《再见UFO》成绩斐然，又南很希望可以原班人马再开新作，又说：“我最大感受系睇住我经理人真系喺6、7年嚟，不断因为投资者嘅问题，最后真系上咗，我坐喺侧边，佢喺走廊嘅另一边，所以一讲到最佳编剧我都眼湿湿，最佳电影攞埋，我即刻真系揽住佢！佢都有安慰我，话‘加油！你都要！’”他又透露戏中饰演自己童年的小演员徐嘉谦原来今日（20日）考DSE，所以之前冇谢票，但今日都专诚去金像奖，完骚后马上回去休息，又南认为二人最相似是名写同样有个“谦”字（黄又南本名黄德谦），不过7、8年过去，对方现时已差不多高过自己。

朱凌凌罕有合体　朱栢康被问出歌可能：我哋好麻烦

最后，朱凌凌五位成员白只、杨伟伦（阿卵）、陈文进（Chris）以及朱栢康、朱栢谦久违在金像奖上合体，问到可有机会一齐拍戏，朱康只说：“朱凌凌有冇机会开部戏？系有机会嘅，机会有好多㖭，但系几时就唔知喇。（记者：开空头支票？）唔系空头，真系有机会，唔知几时咋嘛。”而讲到今年会否推出歌曲作品，他更玄妙地说：“我哋生命入面有好多作品，不过唔系畀观众睇，我哋就好麻烦嘅，你哋见到我哋上台，已经乱晒大笼，一个朱栢康已经咁麻烦，五个系真系好难搞！有啲嘢我哋真系要倾清楚，‘大家系咪钟意呀？’‘好啦！做啦！’”