《寒战1994》今日（27/4）举行世界首映，一众演员都有出现。其中饰演壮年版蔡元祺的吴彦祖（Daniel），以及年轻版李文彬的刘俊谦，率先跟记者见面。二人在戏中有大量对手戏，需要高度默契，庆幸两位一见如故、惺惺相识，首次合作已经成为好友。

二人谈到为何首次合作满有默契，原来两位都有不少共同话题。吴彦祖：“大家倾好多生活话题，好快就交流到。”刘俊谦更大赞同Daniel相处感觉令人好舒服。“拍摄时佢仲送咗一个自己设计的耳机畀我。”阿谦更讲笑会珍而重之，拎到返屋企会背住太太锡部耳机。问到阿谦可有回礼？Daniel立即答：“佢已经系一份礼物。”

吴彦祖伤心囡囡唔再叫Daddy

吴彦祖今次返港，仲有另一部戏拍摄中，会逗留到6月尾才走，问到囡囡可有挂住？“个女而家好享受我唔喺屋企，因为我会严肃啲，有少少虎爸，较著紧佢读书方面。”不过讲到最伤心，是囡囡8、9岁时，开始话唔叫自己做Daddy。“佢话改叫Dad，佢觉得自己大个，唔会再咁叫，但我好钟意听到Daddy。”

问到Daniel万一女儿拍拖会否更不舍？他便利用《寒战1994》对白回应：“有啲嘢讲得唔做得，有啲嘢做得唔讲得，例如我会同太太讲：‘我想打死个男仔！’呢啲就讲得唔做得。”Daniel强调总之佢揾到一个好人，唔好畀人呃便可。记者立即反问如果个男仔似刘俊谦又如何？“咁冇问题啦，我都想要个咁样嘅仔。”