导演陈可辛刚于成都煞科新片《明天，会更好》的华语影坛著名 ，经过连续32组拍摄，最终比预期早五日煞科，并开始进入通宵剪片阶段，就是为了赶上出席日前在香港电影资料馆举行，“星级影谈”系列最后一个活动。活动放映其2005年的华丽歌舞巨作《如果·爱》，亦是陈可辛第一部在中国内地拍摄的电影，别具意义，所以能够赶回港半日出席非常开心。

庆幸自己有见过上一代人讲嘅“老北京”

陈可辛︰“我都无谂过我仲赶到以32组时间，拍完一部排咗40组嘅戏，感觉好似返番去UFO年代拍《风尘三侠》、《金枝玉叶》嘅状态，成个人都好亢奋，赶得切返嚟半日，跟住又飞番去做后期。”昨日活动陈可辛更特别邀请了与他合作无间，编剧林爱华作为惊喜嘉宾现身映后谈，两位老拍档在台上分享当年拍摄幕后故事。

在映后谈中，陈可辛指自己相隔多年重看《如果·爱》感受很深。“隔咗好耐无睇呢套戏，今日睇返好感触，特别系当时北京因为要准备2008奥运，所以成个北京会大执大改。我哋2004年第一次去北京拍呢套戏，周围都系改建嘅地盘，满天都系建筑吊臂，好多废墟同埋空置咗嘅厂。去到见到啲废墟觉得好靓，好有质感好好睇，但因为好多嘢都喺𠮶阵时开始拆，所以𠮶时系一路拆一路拍，我哋就keep住追呢啲景嚟拍，戏入面嘅北京，就系依家最旺嘅三里屯SOHO区。都庆幸自己有见过上一代人讲嘅‘老北京’，亦都多谢电影，我哋用菲林纪录到𠮶个时代喺呢部戏入面。”

不喜欢歌舞片　但偏喜欢歌舞片的直白

他续说︰“同埋戏入面睇到我哋𠮶时好大嘅sponsor eBay。𠮶时eBay啱啱打入中国市场，但当然好快就俾淘宝搞掂咗，从此消失。”他亦大胆直言不喜欢歌舞片，但偏偏歌舞片可以令他直白讲出心声︰“因为我好钟意好多嘢都讲得好白，而喺创作过程有歌舞呢样嘢，平时喺对白讲唔到好白，就可以用歌入面嘅歌词帮演员做心声唱出嚟。写剧本时就发觉好得心应手，因为用咗歌舞片呢个形式，之前成日俾人闹我太白，依家可以攞正牌讲出嚟，无人会再闹啦。”

当编剧林爱华分享与陈可辛的创作历程时大嗌痛苦，写《如果·爱》超过二十稿︰“其实喺UFO时，李志毅已经同我讲过话陈可辛今日同你讲黑，其实可能系白，然后听朝就会将白转返黑。同佢写嘢就唔好跟车太贴，因为佢系好钟意倾剧本，所以佢系会不停咁变。咁唯有靠自己了解佢有乜要求，或者我可以写啲乜，然后度身订造俾佢。但系个过程就好辛苦，冇耐性咪走咗啰。因为佢系不停咁变，《如果·爱》我差不多写咗超过二十稿。我记得后尾写到一个地步已经要放弃，因为所有version都写哂出嚟，唔知可以再写乜出嚟。佢好追求精益求精，就好似唧牙膏咁要唧到最尽，所以变咗你帮佢写剧本系好痛苦。”

陈可辛评周迅︰“太单纯天真兼恋爱脑”

提起《如果·爱》女主角周迅，相隔21年陈可辛再与她合作新片《明天，会更好》，陈可辛大爆与周迅认识21年，到现在依然太单纯天真兼恋爱脑！“本身我心目中系想要一个写实啲，更加血淋淋嘅《甜蜜蜜》，《如果·爱》周迅演个角色要再狠心啲功利啲，但佢演嘅时候都系演得好爱个男主角，唔够狠。其中戏入面有一幕佢跳上巴士同金城武道别，明明应该系要头也不回，咁先至系我心目中嘅蛇蝎美人（Femme Fatale），啲男人触摸唔到嘅女人，点知拍极佢系都要回头望，仲问我点解唔可以咁爱佢，真系俾佢吹涨！所以啱啱煞科套戏《明天，会更好》，同佢倾返呢件事，我觉得佢都多咗经历，应该唔再系我以前识嘅咁天真。点知佢真系唔系讲一套做一套，佢真系咁样，直到依家呢个年纪，隔咗21年之后佢都仲系咁单纯天真，我真系服咗佢。”

《如果·爱》是陈可辛与金城武首次合作，亦因为这部戏令二人成为好朋友︰“金城武系一开始就谂到佢做男主角。因为由金城武好后生𠮶时开始，已经好少有啲小鲜肉系连我哋男人都觉得好睇。因为啲靓仔通常都系花弗啦、油头粉面，即系你睇到佢会觉得佢会抢你女朋友𠮶啲。而金城武我认为系少有靓仔到男女通杀，男人见到佢都觉得‘哗！就算女朋友俾佢抢咗都无话可说啦’哈哈。同埋因为我唔识拍啲二十几岁后生仔嘅故事。所以就一路等，等到佢过咗三十岁就俾写呢个角色俾佢。”