由伍健雄监制、吴家伟执导的电影《欲望寄生》今日（22日）举行开镜拜神仪式，更难得地邀请到狄龙大哥出山拍戏，他与米雪姐受访时，就透露今次是因为太太陶敏明鼓励他不要全退休，而他觉得拍这套戏收获很大，除了撞到多年前曾合作的米雪、袁咏仪外，狄龙大哥更激赞余香凝，指自己过往曾睇过她的《缘路山旮旯》和《双囍》，赞她用功又进取，在马来西亚电影活动上讲英文“Lak Lak声”：“一啲都唔丢香港人嘅架！”此外，米雪姐指跟狄龙大哥合作学到很多做人道理，狄龙于是分享师父林蛟的教诲，更在访问期间即兴示范拉筋，动作轻松俐落地弯腰及双手掂地，腰力比很多年轻人好！

听从太太建议出山拍戏 与米雪相隔多年再合作

米雪表示与狄龙大哥上次合作已数到TVB的《包青天》，当时她客串其中一个故事，而狄龙大哥即回应：“我年轻就好钟意睇武侠小说嘅，‘笑书神侠倚碧鸳，飞雪连天射白鹿’，睇晒！我知米记演出咁成功，佢一定有呢个缘份，仲有同我师兄弟白彪，组织咗一对金童玉女，郭靖黄蓉。钟意睇电影嘅人，钟意睇剧嘅人都爱上佢哋，我就做咗金庸小说里面嘅段王爷，我都好满足，但未有机会同佢做郭靖黄蓉。”问到今次为何能打动狄龙大哥出山拍剧，他透露是因为听从太太陶敏明建议：“太太话你唔好退，你微退，多个朋友多条路，我谂吓都啱嘅。”

大赞余香凝用功又上进 讲英文流利不丢香港人架

他指今次拍戏很大收获，除了重遇米雪，还有当年在《边城浪子》合作的袁咏仪，他忆起当年在又冻好偏僻的地方一起挨更抵夜，结果对方邂逅了张智霖，一拍即合，至今仍然成双成对。而狄龙大哥大赞余香凝：“我睇过两部戏，一部《缘路山旮旯》，另一部系结婚嘅（《双囍》），我话我睇结婚𠮶部，净系你对住爸爸𠮶几个镜头，我好入心，你做得好好！台湾𠮶部，系一个好嘅演员，我话呢个戏我接啦，我亦都趁呢个机会同佢哋交流吓，学吓演技。”狄龙大哥再赞余香凝很用功、很有进取心，并说：“上次我喺马来西亚获得一个终身成就奖，佢都有参加，佢讲英文‘Lak Lak声’，一啲都唔丢香港人嘅架！我都唔丢架，我讲几句法文啫。因为啲人话，你而家老喇，你退休有咩感觉？我话人老咗，就好似啲酒咁，越嚟越醇。”之后更在访问中大讲法文。

狄龙即场弯腰手掂地拉筋 乘机鼓励后辈唔好懒

米雪姐透露：“龙哥成日就算我哋休息𠮶阵时，佢都教我哋学做人嘅道理，少少咋，少少就已经够。佢啱啱先至话不论系职位小嘅、高嘅，我哋都要好礼貌咁样去对佢哋，呢个系真㗎㖞！”狄龙大哥则说：“我哋跟过戏班师傅，我师傅叫林蛟，你哋听过，系老前辈，骑马又叻，支棍真系耍得好叻好叻，佢话‘你有时间唔好玩，唔好匿埋做啲唔三唔四嘢，你‘晾腿’……”此时他突然将咪递给米雪姐，即场示范站立前弯的动作，俐落地弯腰并把双手掂地，腰力和柔软度非凡，79岁仍然宝刀未老！狄龙大哥解释：“呢啲将勤补拙，我哋唔识嘅就趁机会学，同后生讲，唔好懒，长江后浪推前浪，你一个唔小心就俾人排他，排咗你去外面。”米雪即附和：“呢个就要记住。”

狄龙盼演父女 米雪：我哋忘年恋都得㗎！

狄龙大哥赞米雪姐得天独厚，人缘好、fans又多，笑称：“唔使讲，赞得太多就唔对路，米雪真系好演员，希望老天爷同我哋安排，我做父亲你做女！”米雪轻靠狄龙大哥，表示：“我哋忘年恋都得㗎！”而幽默的狄龙大哥却谓：“咁又高攀咗你，我咪老牛食嫩草？”

狄龙怕麻烦少用电话 靠太太与外界接触

说回今次戏中角色，狄龙大哥将饰演草根小巴佬，年纪大患有老年病，因为想食安乐茶饭，被余香凝介绍去买年金，幸好现实中他没有被骗，笑言平时连电话都少用，没有智能电话，全靠太太助他与外界保持联系，表示：“多数都系太太同我接触，因为WhatsApp都唔识，唔识好过识，免得麻烦。”至於戏中同样被游说买年金的米雪，现实中又可曾遇过电骗？她说：“我觉得自己要有常识同知识，唔识就唔好扮嘢，一定要问过啲专家或者专业人士，咁就唔会俾人呃到！”而狄龙大哥则再教导大家：“不贪为富！唔好贪心！不义之财不可得。”