话题电影《UFO离奇命案》，由新晋导演郭家禧（CK）及李振杰（Jack），找来老Best黄德进（Eddie）投资，以小本的300万港元摄制，希望闯出一条新血路。而一齐参与这次历险的演员就有凌文龙及杨偲泳（Renci）。看过电影的，都知道该片以一个反转又反转的铺排，令观众在短短的86分钟观影过程中，感受一次又一次的翻腾，而两位演员，在收到该剧本时，从文字上又可有带来同一的刺激，从而答应登上这离奇之旅。

UFO离奇命案｜不忍老Best心血付流水　黄德进拎300万开戏做出品人

入场留意演员的“焗蟹”瞬间

回想看到剧本的一刻，Renci坦白地说︰“第一次睇完，唔系好Get到，要睇多几次，组织到当中的有趣位，好快就应接拍。香港很少有呢种模式的电影，同埋呢个合作班底都好吸引。”至于凌文龙，跟导演CK是认识，更有一次差点便可以合作，所以今次机会再来，一看剧本就觉得︰“好玩！而且睇剧本时，已经脑补好多场面，去到现场时，都仲同陈湛文、林子杰创作更多嘢落去，过程好好玩。”

Renci提醒入场的观众，不妨留意所有演员的反应，如果见到有人在不正常的情况下拧转面，就即系忍紧笑，因为佢哋每次都作出改动。”凌文龙︰“有少少微调啦，要令大家演出时有新鲜感，所以有时系会忍唔到笑。”

11日拍完的极速感觉

成本只有300万，时间就是金钱，缩短制作时间就是最好的节省成本方法，而事前的预备功夫亦做到足不容有失。凌文龙︰“唔觉得有好大分别，事前做足准备，过程好顺利。”Renic︰“我哋成班人喺山头Full Run过一次，特别是有爆破及枪战一幕，大家都预演一次，确保唔要有任何甩漏。”

样样都计算准确，偏偏就遇到最大的隐忧，一度令剧组担心未能继续拍摄。Renic︰“系我右脚嘅旧患，当年打波时惯性右脚受伤，韧带都断过，而今次就喺11日的拍摄过程中，第三日就三条韧带同时撕裂，行唔到。”

杨偲泳脚伤成最大隐忧

剧组得悉都担心Renci的情况，亦担心拍摄进度是否要煞停，但Budget有限，要解散剧组再择日重组，经费已超出上限，正当全组人都处于非常忐忑不安下，第二日Renci如常现身。“原本话睇咗医生先，但医生太忙摄唔到期，索性唔睇就坐住轮椅嚟现场。班男人见到我坐轮椅，仲争住推，放车一样失控。”

人到但行唔到，凌文龙就大赞两位导演调动得宜，“有啲戏Renci企定定，靠我哋好似走马灯咁围住佢走，营造到好似大家一齐郁紧。又有一次我同佢坐喺地，被某啲嘢吓到弹起，于是我就贴住坐隔篱，到弹起时我负责揪埋佢起身，但表情又唔可以有用力的感觉。”

陈湛文露股成焦点　Renci疑曾目击UFO

电影去到最后，陈湛文会继《三夫》，再次在大银幕露股，而据凌文龙忆述拍摄这幕时，现场非常热闹。“因为拍摄𠮶几日都冻，而最冻就系睇Mon个位，平时唔睇Play Back大家都匿埋一边取暖，唯独拍摄当日，大家都围住个Mon唔舍得走，又会畀下意见。”Renci更笑指拍Close up时，全场人都Wow一声︰“发出鼓励的声音。”

电影以UFO为题，两位都相信世界是有的，Renci更声称自己可能见过︰“好细个一次打完沙滩排球，大家开始执嘢，我就呆呆坐喺度度，当时已经黄昏，但我见到天空突然有粒光，唔郁，冇闪，但突然就飞咗去呢边，然后又飞咗去另一边，我问身边人见唔见到，又冇人见到，搞到我好似天选之人咁。”虽然是真是假一直都冇无法证实，但留在心中的悬念亦无形中成为信念，从而相信世界真的有UFO。