蔡思贝昨日（25日）她以一身粉红色打扮出席《Hello Kitty 设计师山口裕子老师签名会》，与原作者见面，并自爆从小原来是Hello Kitty迷！讲到近日与周星驰合作的电影《功夫女足》在内地上映，她坦言演出时绝对豁了出去，完全放下蔡思贝，又透露星爷对自己说：“你系做得最似李小龙嘅一个女演员！”使她受宠若惊，不过对于电影被偷票房一事，她则坦言好不忿。

自爆是Hello Kitty迷 见山口裕子真人画画如像见证魔法

蔡思贝自言从小已是Hello Kitty迷，以前家中一整个柜都是Hello Kitty的公仔，又回忆起：“有一个透明玻璃钱罂，好似水晶咁，有个凸咗出嚟嘅Hello Kitty头，呢个我都好钟意，因为我觉得好特别，有啲特别嘅日子，我就会喺银仔上面写个日期，摆落钱罂度纪念呢一日，睇吓几时先储到。”因此当她见到山口裕子老师在面前画Hello Kitty时，感觉像见证一个魔法发生，非常开心。

为演活《功夫女足》孖八 每晚与李小龙公仔倾偈

近日周星驰执导和编剧的电影《功夫女足》在国内上画，蔡思贝因“孖八”一角突围，她坦言为角色豁了出去，完全放低自己：“直程系……冇咗蔡思贝，我𠮶时每一日都有一只李小龙嘅公仔摆咗喺间酒店房度，我每日返工放工返嚟都系同公仔倾偈，我都好想入到星爷要求𠮶个状态，佢想我呈现到好多有几场打戏都系致敬李小龙嘅情节，我都觉得…哗！呢个系无上嘅荣幸，首先李小龙系一个好厉害嘅传奇人物，然后亦都系我自己偶像嘅偶像，星爷嘅偶像，佢将呢个李小龙嘅部份摆咗喺呢个角色度，令到我好感受到佢对呢个角色嘅爱，我唔想辜负佢，我自己真系好努力咁样希望捉到𠮶种神髓出嚟。

苦练动作戏近两年 亲自睇星爷教戏劲开心

她透露当初是自荐去演这套戏，但Casting完一段长时间都未有消息，不过她就跟自己说，既然是有动作戏，一定要先好好装备自己，于是蔡思贝在一、两年间训练自己学功夫，希望有机会时能亲身上阵做动作戏，最终皇天不负有心人。讲到另一主演张继聪曾笑言为了睇星爷亲自出手示范教戏，刻意扮唔识做，蔡思贝就说自己太投入，所以没想这么大，只是乖乖听星爷的话尽力做好，但补充：“当然佢都有示范，有啲moment大家倾嘅时候，我哋点样排戏嘅时候，佢自己会自动波示范，就算冇扮唔识，佢自己都自动波示范，我哋身边啲人都睇得好开心，佢嘅一举一动各样嘢，佢自己嚟料，我哋就喺侧边欣赏。”

获星爷赞赏“最似李小龙女演员”：估唔到佢会俾咁大肯定我

问到星爷有没有跟他说什么，蔡思贝说：“上次路演佢就俾咗一个好欣慰嘅肯定我，佢话‘你系做得最似李小龙嘅一个女演员。’我𠮶刻都讲唔到嘢，我都估唔到佢会比一个咁大嘅肯定我，所以我自己都好开心！”她预告电影会于香港上画，相信届时都会有宣传活动，可以跟大家见面，又指电影上映后收到很多正面留言，“我见到好多人话因为我哋呢套戏，或者我呢个角色，令到可能有啲人话我好多年冇笑过，但系呢套戏令到我笑返，我觉得呢啲系令到我觉得最开心最有份量嘅回报，我自己都系过来人，我都受到星爷电影影响嘅一个人，我知道𠮶个影响有几大，而家原来我系一份子，可以带欢乐，但系感动俾人嘅一个角色，我觉得已经系最大嘅意义。”

谈《功夫女足》国内被偷票房 直言感不忿

最后，谈到国内有“偷票房”事件出现，有观众去戏院买飞睇《功夫女足》，但戏院却出手写飞，有可能是将电影的票房数字转移到另一部电影造势，而星爷就在限动用“？？？”回应事件，蔡思贝都直言不忿，表示：“大家都系创作人，大家都呕心沥血咁样去创造一个作品出嚟，点解会有呢啲情况发生呢？冇咗自己票房，影响到套戏嘅口碑成绩，我呕心沥血做出嚟嘅作品咪好惨啰？我自己睇到都觉得好不忿，我都希望大家尽量买飞嘅时候都睇清楚，系《功夫女足》嘅票，公平地入返落《功夫女足》嘅票房啰。”