邱礼涛执导电影《复仇的人》昨日（30日）举行开镜拜神仪式，除了刘青云 、邓涛等主演外，还有首曝光的新角色蔡少芬 （Ada）和邱彦筒 （Marf），二人一同受访，Ada指今次是继电影《山水有相逢》后相隔31年再与刘青云合作，属客串性质，一见到青云已赞对方靓仔又瘦了，很期待再合作。问到为何会答应今次演出，Ada说：“最主要系导演嘅啫，因为导演Herman揾我嘅时候，我一听到我经理人话俾我听，我就即刻话‘咩都唔好讲，拍啦！咩角色我都做！’总之Herman揾我我就做！”二人过往曾合作《同门》等电影，Ada因而很欣赏，也很“锡”邱礼涛，“佢又对我好好，所以我心里面系好感激，总之佢揾我就会做。”

为邱礼涛力挺客串 饰演曾傲棐富贵母亲

Ada今日是首日开工，其角色为曾傲棐（Arvin）妈咪，有财力、势力和属于控制狂，她说：“我今日系第一日造型，未对镜头拍过，所以讲唔出𠮶种兴奋嘅感觉。啱啱见咗佢，我就话‘衰仔，搞咩呀你！’因为我知道佢喺入面做咗一啲嘢，我都系其中一个复仇的人。”但她笑言剧组准备的装束、行头已经够劲，无需要她出动私伙。Ada主要戏份是跟青云拍摄，讲到相隔多年再拍港产片感觉如何，Ada透露因为上年拍摄了邵氏剧《风华背后》，都有keep住拍嘢，所以感觉不错，加上只是客串，心情也会不一样。

痛心校园欺凌及艺人遭网暴 盼大家宽容正面：会好负面好伤

电影主题与校园欺凌、网暴有关，身为人母的Ada对此特别痛心，也会特别叫仔女在网上世界小心：“加埋我哋做呢行，见到艺人俾人网暴，又或者一啲唔系咁好嘅消息，不停俾人炒作，都会好难过，会觉得唔好咁啦！好似令到成件事好负面，会令到啲人好伤，未必系咁差㗎啫，可唔可以正面啲呢大家？”她说自己很易过滤负面资讯，只要不看就可，但对于身边朋友或子女，她就会劝对方或陪他们倾偈开解，Ada坦言难以阻止孩子接触哪些资讯，表示：“永远都唔知佢睇紧咩，就算封锁其实冇用㗎嘛，佢哋有自己朋友，好容易就上网手机、iPad，所以好难，最紧要同佢喺呢度（思想上）做功课，多啲倾偈。”她说家中规矩是食饭时禁用手机，要一家人把握这个时间好好相处。

友人女儿骤逝触动大女敞开心扉 学习放低身段向女儿请教

Ada谈到，早前朋友女儿过身，跟她大女年纪一样，当然全家人都很伤心，但她感恩的是，大女出席完对方的丧礼后主动对她敞开心扉：“佢突然话俾我听话妈妈我醒咗，原本生命可以咁短，我以为自己好年青，原来周围嘅嘢系可以突然间离开我，跟住佢突然间同我讲话‘我想同你倾多啲偈’，佢自己主动同我讲，我话‘吓？’”Ada也在学习如何跟女儿沟通，试著不要太专制，放下自己身段跟女儿道歉、问对方会否有什么使她不舒服等，此时她问Marf：“我唔知我算唔算系一个好妈妈？但系我都尽力。”Marf则说：“ 好好呀！令到小朋友安心得来又肯去讲嘢俾你听。我觉得你可以开个Channel去讨论，你好有心得，你真系会研究再去揾一个方法去应付。”Ada就表示不敢，自己也在学习中，更对Marf说：“所以我就话喺你哋啲年青人身上我就学到好多嘢。”

Marf出道后与母亲关系变好 少见面反而倾更多

Marf与母亲一向关系亲密，她指是出道后感情反而变好：“我觉得现实地系因为佢知管唔到我，所以都真系放松咗，变咗都冇咁专制。以前专制啲，而家可能一个月都见唔到一两次，所以一见到佢都要将所有嘢话晒俾佢听，有时可能大家去大家屋企过夜嘅时候，𠮶晚就会倾好多偈。”被问有否遇过电影中的欺凌遭遇，Marf庆幸没有，但知道世界各地都有同类事件发生，甚至更糟都有，但归根究底都是提醒大家要注意心灵健康，并保护自己小朋友。

学生妹造型遭流出 获刘青云大赞有胆识：导演都担心我会唔会做唔到

Marf早前被影到以校服造型与青云哥在湾仔街头拍戏，使造型曝光，她说：“ 哎呀！系呀！我好努力喺我嘅学生造型里面揾唔同，之前都系做学生，第一次做学生都系眉上浏海，但系𠮶时就系扎辫，所以今次都有导演同埋服装讨论过，今次可唔可以试吓短头发再眉上，佢哋都有咁嘅类似嘅谂法，所以就改变咗呢个造型。”青云在访问中大赞Marf有胆识，她不敢剧透太多，但表示：“我唔知呀，但系咁样听到就好喇，因为我觉得𠮶样嘢都几大胆，但系我都好开心可以有呢个体验，超级多谢导演畀呢个机会我，导演本身都好担心我会唔会做唔到，因为好惊，但系最尾就……我相信佢都放心。”

大赞刘青云沉稳有魅力 与蔡少芬一见如故倾母女经

Marf与青云合作，坦言暂时只敢近距离观察对方，希望再多观察和接触，从合作经验中学到对方的沉稳，又赞：“佢真系好caring同埋好gentlemen，同埋佢好charm！青云哥真系好charm！”她喜欢一班人热闹地开戏，觉得就算在幕后聊天、食饭，都是在帮角色建立成长线，但暂时就未太敢跟青云哥说话，怕令自己分心，但感受到青云哥也有有趣一面。至于与Ada，Marf跟她虽然没对手戏，但仿佛一见如故：“Ada姐姐超级Nice，我哋一嚟就part中咗，你又对我同妈咪有少少好奇，跟住我又好钟意听佢讲佢同佢个女㖞唔知点解。”Ada就说：“我同佢年纪差唔多，所以冇分别分。”

Ada女儿亭亭玉立 被问会否做星妈回应：俾人星两巴就有

早前Ada与女儿被捕获，细女已亭亭玉立，Ada透露15岁与13岁的女儿已跟自己差不多高，又自豪地说：“同埋都系靓㗎！喺妈妈眼中，仔女永远最靓嘅OK？”至于会否做星妈，她却笑言：“俾人星两巴就有！将来嘅嘢将来先算，我都话，如果佢talent好似Marf咁好，梗系冇问题啦！又识唱又识跳，又做到戏，梗系好好，但系呢啲就睇佢自己钟唔钟意，同埋佢想唔想，呢啲冇得迫，最好佢自己行佢自己嘅路。”她透露大女目前想做英文老师、小学老师，自己很支持，不过相信将来也可能会变，到时再算。