由周星驰、林子聪联合执导的《功夫女足》现已上映，香港票房已达500万。在《少林足球》饰演六师弟的林子聪（肥仔聪），廿几年过去，今次以导演身份参与，就似师叔一样教导一班小师妹。而身边两位分别是“丧彪”胡予安（Angel），以及雪野，两位在试镜时都“甩皮甩骨”，但开拍时上晒电，有不俗演出。至于今次担任导演一职，肥仔聪坦言事前全不知情︰“周生都冇同我讲，到成咗片先话我知，其实工作性质都系差不多。”

以师叔身份落场，林子聪凡事都尽力帮后辈，希望令套戏拍得顺利，尤其今次是全绿幕拍摄，比起廿几年前有实景拍摄，难度更高。“有实景真人易好多，当年衰衰地都有百几人坐观众席，个波又系真嘅，而家拍系方便咗，唔怕日晒雨淋，但演员就要有100%幻想力。要幻想现场有几万名观众，幻想个波嚟紧，幻想要跑，我都做过新演员，要大家系咁幻想真系难啲。”

胡予安素颜踢拖去试镜

在戏中饰演“丧彪”的胡予安，就完全唔识做群众戏。“我唔知咩系群众戏，经常企喺后面发呆，聪哥就会过嚟点醒我，要畀戏。佢又会翻译下导演的要求，等我哋知道要点做。”胡予安因为跟星爷一齐玩Wakesurf而认识，有一日星爷问Angel有冇兴趣做戏？“我冇谂过觉得太遥远喇，然后过两日，佢无端端傍晚6点打电话嚟叫，叫我去佢公司见面，我费事人哋等，著住拖鞋、素颜、扎个马尾就去，当时仲要比现在肥2、30磅。所以我心态是畀最真一面你睇，个机会系你就系你，但我试完戏就觉得自己会得。”

Angel有谂过，当日如果有时间打扮下先去，反而会落选，就是当日的状态最似角色需要。林子聪更披露她是第一个落实的女演员，连女主角都未定。Angel最开心是角色叫“丧彪”，明显是香港人讲广东话对白，非常香港地道。

雪野望住周星驰都唔知佢系星爷

另一新演员雪野，在戏中都是叫雪野，2007年出世，今年得19岁，亦正正因为太年轻，根本不知道谁是周星驰，联络面试工作由父母代劳，起初更以为是电骗。雪野︰“第一次面试，很多人坐在前面，我不认得哪一位是周星驰，所以我向每个人都说一次︰‘导演好！导演好！’”直至有人指出星爷才是导演，她才恍然大悟。

第一次见面未有戏演，只叫她跳跳舞，又问她见到鬼会有甚么反应等。事隔一段日子，剧组再联击她父母来第二次面试，今次还有一份对白。“但我始终没有演技经验，所以首先都是把台词记下来，但现场太紧张，导演一直坐在我面前，根本背不下来，最后花了一个小时才背起。最后又要我跳拉丁舞，我其实不会跳，凭自己记忆跳一次。”

听落不太顺利，到底雪野又凭甚么获得星爷赏识？林子聪︰“她不说话时很酷，有种距离感，令身边人不敢跟她说话，正正因为个角色就系唔讲嘢，成日黑口黑面，好适合佢。加上拍摄时不可化妆，Cool Cool 地，化咗反而会靓咗。”

林子聪延续经典压力大　当年未完成画面今天圆梦

同样是足球题材，难免让观众跟《少林足球》作比较，这方面身为导演的林子聪会否带来压力？“之前做得太好，要突破真系好难，所以最后放弃这个想法，换个全女班，风格同故事完全不同。以前系做人冇梦想同咸鱼有咩分别？今次系要赢得起都要输得起，一开场成班已经好踢得，个个都身怀绝技睇下点赢，点知输咗，从而减少很多求突破的压力。”

昔日六师弟的轻功水上飘，已经非常精彩，但原来未完全展现出来。“以前拍摄真系满足唔到，当日已经想轻功不单止上天，落地都可以一阵风咁走，点知我拍完上面就跌落嚟受伤，跟住嘅场面就拍唔到。今次就可以拍番晒出来，可谓圆梦。”

至于林子聪获星爷点名做联合导演，又算是对六师弟的一个最大肯定？林子聪︰“唔可以咁讲，咁多年嚟大家都会刻意分工，边个岗位唔够人就要去，正如当日几师兄弟动作场面，都系由二师兄做晒，唯独我太肥佢替唔到我。其他如果唔够人写剧本我就去，场记唔够人又叫我顶，系去到《美人鱼》，比较专注导演工作多一啲。至于落够，周生都冇同我讲，到成咗片先话我知，其实工作性质都系差不多。”