由香港影视界庆祝国庆筹备委员会筹办，紫荆文化集团荣誉支持的《庆祝中华人民共和国成立77周年招待会》，昨晚（28/9）隆重举行，《九龙城寨》系列导演郑保瑞都有出席。电影《九龙城寨之终章》自开拍以来，一直成为城中热话，除了由尖东拍到去庙街，成了流动观光点，剧组的饭盒同样具话题。自吴彦祖在一次访问投诉难食后，张文杰都爆饭盒配搭新颖难以想像。不过导演郑保瑞接受访问，就力撑饭盒冇问题，自己日日都食，仲觉得几好食。“其实买饭𠮶几个场务手足都唔开心，人哋唔系特登买个难食畀你，不过大家口味唔同。”

问到饭盒事宜，郑保瑞强调自己日日都食，又觉得冇问题几好味。“我只可以讲口味人人唔同，虽然我都有自备午餐，因为要减肥，食菜多，但我都叫阿姐预备个饭盒畀我，我日日都食，我又觉得几好食。”至于有指饭盒菜式配搭“新颖”，郑保瑞表示不觉得特别奇怪︰“我都想同工作人员讲两句，唔会有人专登买啲难食嘅嘢返嚟，不过大家口味唔同，下次可以全面啲。”

未有演员即场投诉　“我又衰，可能迟放饭”

既然有演员提出问题，拍摄期间导演又可有即时作出跟进？“佢哋又冇喺现场讲。其实部部戏都有人话啲饭盒难食，唔系第一次啦，咩萤光汁，我哋都听咗廿几年，点会当系一回事？日日都有人话难食，有人话好食。日日都食烧味饭，转下有汁嘅，又话啲汁浸到啲饭烂晒，咁点啫。我又衰，可能迟放饭，成日拍埋两个镜头先，搞到啲汁同啲饭混埋一齐，呢样系非战之罪。”

冇揾吴彦祖跟进　“有咩好倾，又唔系第一日拍戏”

郑保瑞觉得演员的反应是真实，的确可以觉得难食，但都坦言这件事有令同事不快︰“买饭𠮶几个场务手足都唔开心，人哋唔系特登买个难食畀你，我只可以讲，大家都尽力做好件事。”问到事后可有找吴彦祖倾下？“有咩好倾，又唔系第一日拍戏。（记︰但佢反应激烈嘛！）佢反应激烈但又冇喺现场讲过，可能佢自己吞晒唔想烦我啦，但下次大家唔怕讲，想食咩都可以讲，好易解决。今次我当趣闻去听，希望剧组唔好介意。”

问到郑保瑞从影多年，食过最难食的剧组饭盒又是甚么模样？郑保瑞︰“我又觉得大家开工，都系萤光饭𠮶啲啦，摆得三个钟，个饭熟成咗啦，会有几好食吖。有时食两啖就走，望到唔啱食，就算啦，当减下肥。”

“大家睇啦！大家睇啦！大家睇啦！大家睇啦！”

早前郭富城表示未有参与《终章》的拍摄，是否属实？郑保瑞就一直以四个字“大家睇啦！”回应，一口气讲足8次，似有口难言暗藏秘密。“我仲有秘密？已经周街拍畀你哋拍晒啦大佬！”至于在元朗搭建的场景，拍毕后会否保留做景点？“都有倾过保留，但都唔系咁容易，始终本身系搭嚟拍戏，如果要保留让人参观，就系起楼，两回事嚟。”