上周四（8日）会展认真墟冚，事关香港佛山社团总会搞咗场就职典礼，郑志刚﹙Adrian﹚正式上任做会会长，场面过千人，认真够晒大阵仗。

清爽剃须look现身

当晚Adrian以清爽嘅剃须look现身，成晚心情都劲靓，致辞完就满场飞，同嘉宾有讲有笑，又频频selfie，睇嚟真系几享受呢个“佛山社团大佬”新身份。咪住，郑志刚祖籍顺德，点解会做咗佛山“社团大佬”？答案好简单顺德系归佛山市管，所以由顺德乡里郑志刚嚟做，都算系顺理成章。

睇下当晚出席嘉宾就知几畀面，除咗坐满一堂佛山乡亲，政商界嘅大粒嘢好似陈国基、梁君彦、新上任立法会主席李慧琼、仲有一直获封“港大美女”嘅新民党主席叶刘淑仪等都到场，连广东省省长同佛山市委书记都专程出席，个个都系社会上有头有面嘅人物，现场星光熠熠。

组织青年企业家代表团考察佛山

讲到个场有几墟冚，晚宴足足摆咗超过130围，系真正嘅千人宴。睇返当晚个menu，都系稳阵得体嘅大路菜式：乳猪全体、蚝皇鲍鱼、清蒸海老虎斑……成十道𩠌，样样实在，用来招呼乡亲绝对交到功课。

离开新世界之后嘅郑志刚，应该仲忙过以前，讲明由旧经济跳去新经济。系旧年佢成立咗新公司ALMAD Group，近日便宣布杜拜皇室合作进军中东同北非市场，而最威水莫过于系佢早前投资壁仞科技（6082），该股以上限定价19.6蚊，郑志刚帐面已赚咗差唔多3.3倍；若以首日收市价34.46蚊计，帐面仲升超过6.5倍。

揾真银之余，郑志刚仲不忘公益，唔系点做“大佬”呀！佢致辞时就公布多样嘢啦，包括计划亲自带队，组织一个青年企业家代表团去佛山考察，强调希望以民间力量推动两地商贸合作，帮后生一代发掘多啲机会。