选择合适嘅升学跑道，有助年轻人充分解锁潜能！现正修读青年学院职专文凭（屋宇装备工程）课程嘅李永健（永健），凭住对空调制冷技术嘅热情同专业实力，代表中国香港出战2026年9月22日至27日喺上海举行嘅世界技能大赛。

过去一年，永健多次参加不同交流同比赛，以赛促学。佢希望将交流所得嘅见闻，以及逐渐熟悉嘅国际标准应用喺日常工作，持续钻研技能，为日后工作累积更多经验。

按兴趣选择合适跑道 　探索实务技能新天地

永健以前喺传统中学读书，期间发现自己更想学习一门扎实嘅手艺，掌握实际技能，为未来打好基础。

咁啱当时有朋友对职专文凭（屋宇装备工程）嘅课程有兴趣，于是佢哋就一齐入读青年学院。永健喺新环境中建立起自信，仲会同父母分享自己喺学校嘅点滴。

参加职学计划学以致用　前辈分享成参赛契机

求学期间，佢参加咗VTC Earn & Learn职学计划，喺机电工程署（机电署）担任二级技术员。透过喺机电署嘅训练同实习，佢将课堂上学到嘅空调制冷理论直接应用喺实际工作，进一步加深咗对相关原理嘅理解，亦同时提升咗专业技能。

喺机电署工作期间，永健听到前辈分享过往世界技能大赛嘅经历，开始认识呢项赛事。赛事汇聚来自世界各地嘅选手，畀大家同场切磋，仲有机会接触更多唔同嘅专业知识同技术，令佢对呢个比赛产生浓厚兴趣，视之为一个非常难得嘅体验同学习机会。

将比赛所学带返职场　严谨细节融入日常工作

永健表示，平日工作主要聚焦喺空调系统嘅维修同保养，而世界技能大赛涉及嘅技术范畴就更加广泛：选手需要由设计开始，经过组装、管道接驳，亲手完成一个小型制冷系统，令佢有机会全面接触唔同嘅范畴同技术。

佢亦提到比赛评分标准非常严谨，例如喉管是否平直、喉管之间嘅喉码同距离都有相应要求。不知不觉地，佢亦逐渐将呢啲标准融入日常工作之中，转化为自己嘅专业习惯。

连场交流累积经验　积极迎接世界技能大赛的挑战

为咗喺世界技能大赛得到好成绩，永健去到广州、广西同贵州等地进行交流培训同比赛，有机会同全国前十名嘅选手互相学习。

今年四月同六月，佢分别参加咗广州热身赛同喺澳大利亚举行嘅Global Skills Challenge。经过多次交流同实战，佢认为自己嘅技艺同实力都有明显进步。而喺世界技能大赛正式开始前，佢亦会再前往广州，同国家队选手一齐进行深度训练，希望把握时间磨练技术，喺赛事中能发挥理想嘅表现。

过程中，永健同嚟自唔同地区嘅选手建立友谊。交流期间，除咗接触到唔同地方嘅生活文化，佢亦了解到各地嘅空调制冷工作模式同技术规范，进一步扩阔专业视野。呢啲难得嘅经验唔单止加深咗佢对专业技术嘅理解，亦令佢更加有自信。

寻找热情所在　未来盼将经验传承

毕业之后，永健希望继续留喺机电署工作，不断提升自己嘅技能，并喺将来将课堂所学同比赛经验分享畀师弟师妹，扶持佢哋一步步成长。

回顾自己由传统中学转读职专课程，一路走到世界技能大赛舞台，永健想鼓励现时正考虑升学方向嘅师弟师妹，最重要系揾到自己喜欢同有兴趣嘅方向，再按照个人能力同性格，寻找适合自己嘅人生道路。当揾到目标，就要勇于向前同保持学习，唔好轻言放弃。

职长UNLOCK：掌握“职”业资讯　发挥个人专“长”

想发掘更多升学同行业资讯，欢迎浏览职专教育网页，搜寻心仪课程、了解资历架构同埋各行各业嘅发展前景；亦可追踪官方Facebook及Instagram专页，紧贴最新嘅行业动态。

呢个系列会先后同四位中国香港代表队选手进行访谈，除咗制冷与空调（空调制冷）项目嘅永健，仲包括糖艺/西点制作（西点制作）、时装技术（时装科技），以及管道与制暖（管道及制暖）项目选手。佢哋将会分享从选择修读职专课程，到踏上世界技能大赛舞台嘅心路历程，令大家更深入了解职专教育如何协助年轻人解锁潜能，记得密切留意！

（资料由客户提供）