上海2026年第48届世界技能大赛圆满结束。今届中国香港代表团一共派出41位技能精英，出战37个项目，最终赢得一面银牌及14面优异奖章，奖项数目创历届新高。其中，香港专业教育学院（IVE）电脑及电子工程高级文凭课程毕业生邓光大（Gordon）代表中国香港出战轨道车辆技术项目，同8位来自世界各地嘅选手同场竞技。佢最终夺得银牌，仲获颁中国香港代表团嘅最佳选手奖！

由乘客到铁路技术人员　职专课程打好基础

自细开始，Gordon无论平日返学定放假同朋友聚会，都经常搭港铁，亦一直对香港庞大便捷嘅铁路系统好有兴趣。佢中学毕业之后，喺参与港铁“见习铁路技术人员计划”嘅哥哥鼓励下，决定投身其中，正式投入铁路维修呢门专业。

喺计划安排下，Gordon一边喺公司担任学徒，一边喺IVE兼读电脑及电子工程高级文凭课程。佢话，自己喺公司嘅电子工场负责有关信号系统嘅维护工作，需要理解铁路设备电路板上各个电子元件嘅构造同运作原理，先可以进行针对性维修。而IVE课程所学嘅知识，加深咗佢对电路图同电子零件嘅了解，亦帮助佢建立对电路逻辑嘅分析能力，为现时工作打好基础。

一年半针对性训练　不同部门累积经验

为协助Gordon备战第48届世界技能大赛，公司培训团队为佢制定咗约一年半嘅培训计划，围绕比赛四大项目进行针对性训练，并安排专业导师悉心指导。

Gordon获安排轮调至不同部门、车厂同工场，喺真实营运环境下，亲身接触不同型号嘅集电弓、列车车门同转向架设备，累积各种维修嘅实战经验。当中，由于比赛指定嘅车门设计同韩国制列车相似，团队特意安排佢去小蚝湾车厂培训，深入了解车门嘅特性。

至于Gordon认为较具挑战性嘅电路故障诊断，导师除咗安排佢去工场练习线路接驳，更设计唔同嘅故障情境畀佢进行模拟训练，帮助佢掌握诊断技巧，提升处理效率。

除咗本地培训，团队亦安排Gordon多次到内地院校集训。呢啲经验既令佢提前熟悉比赛用嘅设备、工具同场景，更有机会同来自不同地方嘅年轻选手交流技术以及备战心得，了解唔同地方嘅训练模式，扩阔国际视野。

轨道车辆技术成正式比赛项目　考验铁路维修技术

今届赛事首度将轨道车辆技术纳入为正式比赛项目，选手需要喺指定时间内完成四大项目，包括检查与维护车门系统、集电弓同转向架，仲有故障检测，全面考验选手对铁路车辆嘅综合维修同应变能力。

Gordon曾经喺2024年代表中国香港参加喺法国里昂举行嘅第47届世界技能大赛，当时轨道车辆技术属于展示项目。到今届上海赛事，项目首度纳入正式比赛项目，对选手嘅技术同临场发挥能力有严格要求。Gordon作为专业技术人员，面对呢场极具挑战嘅国际赛事，唔单止冇退缩，更提醒自己全力以赴。

面对时限考验　调整策略全力以赴

比赛分三日进行，Gordon坦言比赛期间需要完成嘅工作内容比预期多。喺第一日进行集电弓检查同维护项目时，由于时间非常紧迫，佢赶唔切完成所有工序。面对呢个考验，Gordon即时调整心态同节奏，回想返过往嘅经验同备战策略。佢明白比起执著于解决单一工序，更重要嘅系整体时间管理，妥善分配时间去争取最高分数。

另外，电路分析与接驳亦系比赛嘅关键环节之一，非常考验选手嘅临场判断力。要确保电路正常运作外，评审亦会按电路接驳嘅整齐度同品质评分，所以选手要喺兼顾品质同时间，在两者之间取得平衡。由于Gordon一早已经喺培训时针对呢个情况谂好策略，令佢喺比赛时拿捏好时间同节奏。

去到第三日比赛，Gordon话由于当时已经消耗咗唔少体力，所以觉得有啲压力。不过，佢不断激励自己要坚持到底，专注做好每一个项目，不留遗憾。佢最终喺第三日追返唔少分数，成功为中国香港赢得一面宝贵嘅银牌。

国际赛事肯定实力　继续精进技术

世界技能大赛规定每位选手只有一次参赛机会。 Gordon话好庆幸自己能够代表中国香港踏上世界舞台，并取得佳绩，证明自己过往投入嘅时间同心血并冇白费。今次同世界各地嘅年轻选手同场较量，见识到各地铁路系统嘅最新发展，令佢信念更坚定，喺铁路专业继续前行，同精进技术。

职长UNLOCK：掌握“职”业资讯　发挥个人专“长”

VPET 职专教育一直以技能为本，著重职业导向嘅实战学习，鼓励学生按个人兴趣同专长，及早解锁专业知识、掌握实际技能，为未来职涯规划做好准备。

想发掘更多升学同行业资讯，欢迎浏览职专教育网页，搜寻心仪课程、了解资历架构同埋各行各业嘅发展前景；亦可追踪官方Facebook及Instagram专页，紧贴最新嘅行业动态。

（资料由客户提供）