COLLAR演唱会爆喊发言全纪录　Ivy：COLLAR每一个都好值得被喜欢

女团COLLAR一连两场的演唱会《COLLAR “GAME ON” LIVE 2025》尾场昨晚（29日）在亚洲博览馆举行，七位成员在尾段连唱5首团歌《Back in the Game》、《SSS》、《OFF/ON》、《Riding High》以及《Home Run》，落力地又唱又跳，展示女团气势！唱到最后一首歌《Home Run》时，COLLAR缓缓降落舞台，之后突然再跳起登场，令歌迷超惊喜。

睇更多COLLAR快歌跳唱靓相：

而前一晚的致谢名单，原本只有队长沈贞巧（Gao）讲感言，她说今晚想听队友们讲，而这个环节最终令COLLAR个个泪崩！《01娱乐》就为大家带来七位发言的足本全文字纪录。

许轶（Day）：“好多谢大家，真系冇谂过会收获到咁多爱，一直以来可能我哋大家⋯讲返多少少我哋自己，就系我哋都系几冇自信、好混乱嘅人，换衫都好混乱，所以要拍条片，畀时间我哋换衫。大家好冇自信嘅时候，每当演唱会见到每一位大家，觉得好开心，同埋冇谂过大家会同我哋……识唱我哋嘅歌，我已经觉得好感动嘅一件事，多谢大家每一位。”

王家晴（Candy）：“我觉得好多谢大家嚟，因为我觉得今次准备呢个演唱会嘅过程，其实系好辛苦嘅我觉得，因为我feel到大家都好想今次做到啲唔同嘅嘢，畀大家睇，所以我好多谢大家买飞入场，去支持我哋，去睇我哋表演嘅每一位。”自考完DSE就参加《全民造星IV》及成为艺人的她，月前刚从香港城市大学心理学社会科学学士毕业，她发言时更大呼：“我毕业喇！我可以全职投入COLLAR！”

Marf：“一直以来我哋都系好似一个平凡人嘅内心，虽然我哋坚强咗好多，但系都仲系真心地、唔系客套地觉得，唔敢相信我哋唱歌，唔敢相信我哋出咗歌，仲有呢个concert。但系都好多谢你哋每一位咁support我哋，同埋好多谢每一位好同唔好嘅评语畀返我哋，都系好似Candy咁讲，我哋今次做咗好多努力，无论Dancers，跳到汗同血同肉佢都分唔到喇已经，而我哋都练咗好多好多唔同、好劲、好爆嘅机关畀大家睇，系咪好爆先？好多谢每一个单位畀我哋嘅每一个信心，同埋勇气，同埋每一个容许同包容，所以我哋都好爱你哋，多谢！”

其实在Day、Candy、Marf讲感受时，后面几位的李芯駖、陈泳伽（Winka）及苏雅琳（Ivy）都已经爆喊，当中Ivy更是哭成泪人。

芯駖哭著说：“我其实今日都喺度谂，我有冇需要突然间要讲嘢，所以都谂定咗少少。我一路都喺呢个过程入面，喺度观察我哋唔同嘅人，我觉得今次点解我哋好似比之前更加攰呢？因为我哋有好多嘢都好想做到最好，无论我哋嘅rundown，我哋唱歌，其实我哋好多人唱歌都唔叻，我哋有好多努力摆咗喺入面，我觉得系好感动、我觉得，多谢大家畀包容我哋，畀时间我哋去进步，我哋有好多伤兵，每一日都有我哋医疗团队，帮我哋针灸，只脚好痛。第一套衫其实好重，差唔多八磅咁重，我哋练弹台未必有人知道，但系我哋一路都觉得，点解我哋要用咁多力去做一啲嘢，我觉得系每一次见到大家听我哋唱歌，畀掌声、畀力量我哋嘅时候，我觉得一切都系值得！因为我哋除咗一啲大家都识唱嘅广东话歌，希望我哋嘅歌喺某一啲时间里面可以陪伴到大家，咁我哋就已经觉得可以功德圆满。”

至于以往最易喊，感情最丰富的Winka就强忍眼泪：“我好多谢大家，我系一个好多情绪、好高敏嘅人，我多谢团队一直陪住我，我觉得我喺今个演唱会，终于享受到跳舞唱歌𠮶一种自信，𠮶种开心，我唔再惊我做成点，因为我谂返起我以前busking嘅时候，冇一个人睇我都系咁样唱，何况而家有咁多人喺度睇，我点解唔唱好跳好？我点解唔拎多个自信同埋𠮶份勇气出嚟，所以我多谢你哋陪住我咁耐，无论经历啲乜嘢都好，见到啲灯牌、嗌，同埋fans依旧喺度支持我哋，整手灯，做好多嘢，我真系好爱你哋，多谢！大个女喇！”

而喊得最犀利的Ivy就剖白内心感受：“我觉得我出道之后，多多少少都有迷失过，每次捉返我返嚟，或者令我坚定返嘅，系每一次出团歌之前𠮶一个礼拜，我见返COLLAR嘅时候。佢哋一直都陪住我，见到佢哋无论发生咩事，无论出面遇到乜嘢、听到乜嘢comment、工作好辛苦，但佢哋依然喺度系咁请我食蛋，我觉得COLLAR每一个人都好值得俾人喜欢，大家为佢哋鼓掌嘅时候，系我最感动嘅时候！我真系好钟意你哋，COLLAR真系好劲，同埋我喺度好想特别咗多谢两个单位，第一个系Mike Orange，呢个小秘密， Mike Orange每个礼拜一至两日都教我、Gao同Candy唱歌，呢两个月广东话乐坛嘅歌都俾我哋唱得差唔多，同埋就系我哋面前嘅dancer，COLLAR嘅舞都难㗎嘛，佢哋系一日记一只歌，好夸张！辛苦晒！多谢你哋！同埋排舞师都好厉害。”

芯駖亦补充多谢演唱会总监细So，表示：“佢有好多坚持，喺我哋唔相信自己嘅时候，佢话畀我哋知我哋呢个rundown系可以，好多谢佢！”

最后当然要轮到Gao，不过她因为尚有最后一首Solo要唱，不想被眼泪影响演绎，所以就说之后再讲，只抛下短短一句：“我想讲嘅就系Game on, Never Game Over，人生系一个好好玩嘅游戏，永远都唔会输。”之后COLLAR与舞蹈员就手拖手谢幕，大会屏幕播出日本歌手Yui的《Goodbye days》，伴随著COLLAR彩排演唱会的片段，唱到一半，萤幕便影著Gao在后台唱《Goodbye days》，队友望著她，而Gao再放低手上公仔离去，这幕与开场互相呼应，令人动容。

原本COLLAR已讲到明冇Encore，不过观众不肯走，COLLAR相隔一会换上T恤再上台，虽然冇唱歌，但就不停摆甫士畀Fans影相，大会亦播出一段她们也从未收看过的绝密短片，演唱会在大约11点23分结束，两场《COLLAR “GAME ON” LIVE 2025》圆满落幕。