香港DJ专访｜自香港Rave年代活跃至今的著名DJ Frankie Lam（上）

上月专栏的嘉宾Gareth Chan在专访中透露，他的音乐启蒙是电子音乐，亦师承本地DJ Frankie Lam。Frankie是在本地屹立多年的著名DJ，笔者曾在不同DJ口中听过他的名字，直至数年前认识他后，便明白他为何如此受尊敬。即使Frankie拥有无数资历和成就，与他攀谈时却能感受到他的亲切，以及对后辈的无私分享。这次有幸邀请Frankie担任嘉宾，一连两个月在本专栏分享他的故事和见闻。

波盛：上次同Gareth做访问，佢就讲返当年点样遇到你同埋跟你学DJ。喺你嘅视觉对佢嘅印象系点呢﹖

Frankie：我唔记得佢几多岁，但真系细得好紧要。点解我咁深印象，可能因为见佢唔系好识讲广东话，又青靓白净几靓仔咁走埋黎好怕丑。跟住讲下讲下觉得几得意㖞，见到佢好有心好多有关DJ嘅嘢想问，跟住坐低越嚟越好倾件事就系咁样产生。有时啲人埋黎叫我教佢，你会有一种“你真系先啦”嘅感觉。但𠮶个小朋友埋嚟我同佢又connect㖞，我都唔知点解，可能佢个外形同埋佢讲嘢嘅方法令到我想教佢多啲嘢。

波盛：咁你细个学打碟𠮶阵，又系咪好似Gareth咁自己走埋去个DJ度问﹖

Frankie：绝对系，尤其系我𠮶个年代。首先歌先啦，𠮶阵时冇得search系咩歌，有一只歌你听咗，你即场唔知道咩歌，你就有机会永远都唔知。所以我哋𠮶个年代嘅人，一听到有咩钟意嘅歌，喺间club或者酒吧度就即刻挨埋个DJ booth，喺度装或者直接问个DJ，咁好多时个DJ都会讲嘅。有啲DJ就唔会讲，因为有好多秘密武器唔畀人知。呢度就系点样认识啲歌。

跟住打碟𠮶度，当年喺Grand Hyatt嘅地库有间Club叫JJ's，好出名嘅以前，我初初出嚟做野喺𠮶度做。有一次其中一个同事突然数“one two three four”，跟住𠮶首歌转咗第二样嘢。我𠮶阵觉得：“咁得意嘅你点知㗎﹖”我𠮶阵时零音乐嘅，就突然间学到一样叫“数拍子”嘅嘢，就系无端端数四下之后，佢真系个人声会走出嚟，数完呢四下佢真系有个saxophone走出嚟，我就觉得好神奇。咁我喺𠮶度返工吖嘛，我就晚晚返工喺个酒吧度数“one two three four”，数中咗啱咗就好兴奋，数下数下咪揾个唱盘返屋企玩啰。

波盛：𠮶阵买咗唱盘返去你系点样练﹖

Frankie：𠮶阵时冇钱买两个唱盘，得一个唱盘加一个mixer，就驳去屋企原本𠮶个hi-fi仔。摆只CD 落去屋企嘅hi-fi度播一首歌，跟住我就用个黑胶唱盘去beatmatch然后mix。转咗歌去只黑胶碟度喇，就停音乐，返返去个CD度，play第二次歌，喺黑胶盘度揾第二只歌，做另一个mixing。

唔怕老实讲，我初初由零至到我beatmatch到，识得mix做到几好果阵，我唔系好理咩音乐嚟，我当机咁打。我觉得beatmatch一对到，叠住会有个flanger effect，一叠到𠮶下好过瘾。所以你畀只Reggae我又系咁玩，你畀只Drum and Bass我又系咁玩，你畀只Techno我又系咁玩。到我玩到咁上下，觉得某啲音乐特别好玩或者特别钟意听，就开始觉得喺音乐上我都要有返啲Style喇。

波盛：咁之后系点样得到第一个打碟嘅工作机会呢﹖

Frankie：𠮶阵时成班朋友仔都听歌，一定会去一间叫Y.Y.，即系阴阳。带我出身𠮶个人，我就系喺𠮶度识，佢叫Spark， 姓林嘅。𠮶阵我哋成班人落去Y.Y.就系听佢打碟，因为佢啲歌喺𠮶个年代系好新好型，佢好够胆打一啲唔同类型嘅音乐。因为佢系DJ之余，自己会入口唱片，做埋唱片生意卖碟畀DJ。咁我哋一听到正嘅歌就埋去问佢咩嚟，去多几次就熟络咗。

突然有一日佢同我讲：“我有个DJ唔做㖞，我礼拜三无人打，你试唔试下﹖”咁从此我就喺酒店一个礼拜返六日工，净系礼拜三放假，去中环呢间bar打碟，自己一个𡃁仔走落去开工。我仲记得第一日返工，陈百强企咗喺个DJ booth度话：“细路，你迟到！”

波盛：打黑胶要用好多碟，咁你系点样准备啲歌﹖

Frankie：𠮶阵时𠮶啲DJ booth好兴用公家碟，有个唱片柜全部黑胶碟嚟，因为未必个个人会带碟返工，你返到去就系打呢啲碟。正常系好熟啲碟嘅，但我系第一日返工完全唔熟，跟住乱咁抽。好彩佢哋有啲column系跟BPM排，因为以前打黑胶碟，个黑胶碟封套会有个白色Label，写住“A-Side、乜乜歌、BPM 126”，“ B-side、乜乜歌、BPM 128”。咁你唔好理佢咩歌，总之BPM 125你就揾返只BPM 127去mix。咁因为礼拜三其实就唔系好多人，我就攞啲碟落嚟系咁听歌，好开心㗎。

波盛：𠮶阵对于自己成为一个DJ有咩感觉﹖

Frankie：首先我喺Grand Hyatt嘅club度做，已经有一个优越感。因为𠮶度算系全城数一数二嘅club，一个乜嘢都唔识嘅小朋友，读完书入咗去，而去𠮶啲已经系好劲嘅名人，有史太龙、周星驰。有啲外国名人或者local名人嚟做宣传，佢哋好多时都会去呢间club，所以我𠮶时喺度做个bartender已经觉得劲啲。再去埋Y.Y.打碟啦，Y.Y.又系好多犀利嘅人落去，我打𠮶阵时有罗文、陈百强等等。因为音乐令我出入𠮶啲地方，我觉得好正呀，返到屋邨就会同啲朋友讲“琴日咁咁咁咁呀”。

波盛：𠮶阵会唔会已经有种想法系觉得会咁样一直做DJ做落去﹖

Frankie：初初无㗎。初初我做酒店，跟住打一日碟已经觉得好开心，谂住冇乜嘢咪继续喺酒店度做啰，无谂话边样系我嘅职业。有一日酒店𠮶度有啲问题出现咗，我就离开咗酒店，一跳就跳咗去100%去打碟喇。

DJ始终都算系音乐同艺术嘅一种，由以前到而家都好，你用艺术或者用音乐揾食，你冇话guarantee可以做职业㗎。某啲人可以，某啲人系捞极都系冇嘢做，睇好多方面嘅。一系你叻到冇咗你唔得，你就可以话乜都得，但系呢啲人唔多，好多人都系几叻下嘅。但系你又几叻我又几叻，呢个job我唔做你可以取代到我。你又唔系最叻，即系唔系无嘢取替唔到你，咁你就要靠你个人缘，你点样做人，人际关系都好重要。

波盛：你话最初打碟系当机咁打，享受成功beatmatch𠮶下。咁做咗DJ之后，有无一啲事情令你对音乐嘅睇法有改变﹖

Frankie：转捩点就系我喺中环打紧碟，𠮶阵20岁倒啦。有一日佢哋接咗一个场嚟做，喺湾仔红灯区。𠮶阵有一样野就系美国嘅水兵嚟香港，𠮶只船好似叫独立号，我哋湾仔有个口号就系“有船到呀听日冇假放”。成个湾仔都系美国人，咁𠮶度就系湾仔红灯区。我哋就主要打commercial音乐，或者有水兵𠮶阵时就超Hip Hop。

本身我𠮶阵喺中环跟住𠮶个head DJ，佢系超级欧洲音乐人嚟嘅，玩Eurobeat、 欧洲Techno，咁我好自然就听返呢啲。细个就唔系话好识，觉得呢啲Eurobeat同埋Techno系全世界最劲嘅音乐。细个𠮶阵我曾经睇唔起其他音乐，觉得Hip Hop 嘅嘢边度啱我。点知有一日我落咗湾仔度做，有船到，去咗𠮶间叫Neptune’s，就系最出名打Hip Hop嘅，一落到去改变咗人生。见到全场二百人全部一齐Hip Hop，突然间觉得自己好渺小，就觉得原来Hip Hop咁劲。当时我就同自己讲，以后我唔好再睇少任何一种音乐。你玩𠮶种音乐你嘅事，你唔好以为自己钟意𠮶种音乐就最劲，其实样样都劲。

再因为喺𠮶个年代我认识咗Galaxy，跟住就识埋Tommy，Hip Hop、Scratching 喺我生命入面出现。𠮶时90年代尾咁啱就系Galaxy最当打要攞冠军𠮶个年代，咁我同佢好friend嘅，支持佢去DMC比赛，又撞啱𠮶阵时Rave兴起，咁我哋两个就一个玩Hip Hop，一个就跳咗去玩Rave。

波盛：90年代喺香港嘅Rave scene系点﹖

Frankie：我听返啲前辈讲，96年𠮶阵已经有，到98年𠮶阵其实都几劲。𠮶阵时喺湾仔有个叫 Christian 嘅 DJ 而家都仲有嘅，跟住而家好出名嘅DJ叫Lee Burridge，其实当年佢就喺香港嘅Neptune’s同埋Big Apple依两间湾仔嘅酒吧度玩。有个叫Sunday Morning嘅party，就系由礼拜六晚五点至到第二日礼拜日嘅十二点、一点，就系全Rave。落去嘅人全部都系超级听Rave嘅人，有型、靓仔。𠮶阵时华洋共处仲系好旺盛，落得去嘅香港人啲思想都系型嘅，再加埋𠮶啲听歌嘅英国人，好好玩㗎，呢样嘢系超劲。𠮶阵时香港都未有Bar City或者九展嘅Rave。

而我咁啱得咁桥，喺好出名嘅Big Apple楼上𠮶间叫La Bamba𠮶度打。90年代喺卢押道、谢斐道𠮶度，有个好大嘅招牌写住La Bamba，𠮶个Logo系Dick Tracy嚟，系一个戴住帽好似神探咁嘅样。我𠮶阵时就喺𠮶度打commercial，《Barbie Girl》、《Shalala lalaa》𠮶啲。到我钟意咗underground Techno之后，我就入咗啲碟，喺La Bamba未有人或者就完场啲人走晒，我就作反喇，就播𠮶啲歌出嚟。播到有一日Lee Burridge冲咗上嚟，问我：“依只碟边度揾㗎﹖正㖞！”从此我就识咗佢。

佢系一个大人物嚟。我觉得𠮶阵嘅Rave系喺地下确立咗一个位，慢慢多人玩喇，跟住先至有其他organizer有少少商业性质咁去举办依件事，再越搞越大，搞到去九展或者某啲大型嘅地方。

本月专栏回顾了Frankie成为DJ的故事，并带读者回到90年代香港Rave文化兴起的光景。下月他将分享成为DJ后，在本地音乐圈中陆续衍生的身份，以及如何将多年的人生体验和想法，注入他今天打理的日式酒吧中。