关智斌演唱会被叫与嘉宾Tyson Yoshi除衫：两个除就唔系咁嘅票价

关智斌《The Endless Adventure Live in Hong Kong》演唱会昨晚（27日）于启德体艺馆圆满结束！尾场继续惊喜满泻，Kenny不但大晒苦练三年多的空中pole dance，更请来Tyson Yoshi做嘉宾，两人“gym buddy”上身互爆健身秘闻，Tyson Yoshi更自嘲“富二代”引爆全场笑弹！

Kenny演绎《隐形人》时，大show苦练三年的空中pole dance！只见他于装置上倒吊旋转、飞舞，动作优雅又性感，完美配合歌曲剧情，睇到台下观众哗声连连兼疯狂鼓掌！这个表演绝对是诚意之作，证明Kenny为这个演唱会下了不少苦功。

全晚最爆笑一定是嘉宾环节！Tyson Yoshi一出场，二人合唱《1994》后，歌迷就不断大叫除衫，Tyson则淡定地说：“除衫要睇场合嘅，我哋呢啲做后辈，最主要系识分庄闲吖嘛。”跟住大叫：“我系唔会除嘅！”搞到Kenny笑到弯腰。Kenny指邀请Tyson任嘉宾是因为觉得大家都系“Peter Pan”，点不知Tyson竟然自爆：“因为我系富二代啫！”全场即刻起哄，Kenny追问：“咁究竟系唔系啫？”Tyson笑住话：“我唔系呀。”二人对话认真笑死人！说到认识过程，原来二人是健身室识的“gym buddy”，Tyson大爆Kenny好勤力，Kenny即反爆Tyson：“你都好勤力㖞，我收到风头先rehearsal完你系赶住去做gym，但系因为塞车咋㖞。”Tyson再次发放笑弹，“系呀，红隧濑屎我就返番嚟啦。”接着又有观众大叫二人除衫，Kenny闻言即笑说：“两个一齐除就唔系咁嘅票价㗎啦！”笑翻全场。

随后Tyson又分享一段彩排后的小插曲，“头先彩排完咗，我闷得滞走咗出去谂住行街，笠顶帽笠个口罩以为冇人认到我，点知呢，好多人认到我㖞！”Tyson解释因为他是嘉宾，所以未有跟认出他的fans影相，更公开道歉，“平时次次有人问我可唔可以影相，我都会影㗎。但我想同头先𠮶班朋友讲呢，唔好意思，因为我系嚟做嘉宾， suppose系秘密，我以为冇人认到我，点知你哋认到我，你明唔明，我就好尴尬，所以我冇影到相，想同头先嘅朋友讲对唔住。”最后Tyson临落台前还问Kenny：“你听日系照操㗎嘛？”果然系gym buddy。

Kenny于台上特别多谢一班好友，又爆了很多温馨趣事。尤其是阿Sa蔡卓妍及容祖儿。他指阿Sa十分窝心跟他说：“你个演唱会你嘥咗好多钱呀，你啲学费都冇晒啲歌酬啦！我仲有枝咪，我俾你啦。”而祖儿在他迷惘的时候给了很建议及支持。又对已经成为人妻多年的郑希怡（Yumiko）说：“多谢你Yumiko，佢特登为咗我排咗几日舞，仲要无啦啦跳埋晒啲咁sexy嘅舞，人哋已经结咗婚好多年㗎啦嘛！”跟Yumiko的合作，又令他回想起当年一齐去唱K，Kenny仲记得当年去Club玩唔够五分钟，即接到经理人Mani追魂call，“佢好神通广大咁打到电话过嚟问：‘你哋而家喺边呀！’真系好劲当时嘅追踪技术，哈哈，当时都仲未有电话。”

最后Kenny感性地说这个show要多谢身边每一个人，他们就像这个show的齿轮不可或缺。他更要特别多谢自己，同所有观众一起成就了这个“彼得嘅时间”及“冒险岛”，这是他今年最开心的事。至于努力是否一定会成功？Kenny就好有智慧地说：“我唔知，不过好得意㗎，佢会用一个佢嘅时间表话俾你知，你嘅努力值唔值得有一个回报，当觉得值得嘅时候，就会话俾你知。”Kenny这个“无尽冒险”暂时告一段落，相信入场的观众应该都带走了满满的欢乐及感动。

而完骚后Kenny接受访问，谈到同门师兄谢霆锋大驾光临捧场，问他为何不邀请他上台担任嘉宾时，他笑言唔够胆，因为对方一向好少睇演唱会，他肯来已让他感到非常荣幸，并透露：“佢已经千叮万嘱，咁我话你想点就点，大佬！”演唱会上亦播放了多位好友的打气影片，包括张敬轩、古巨基及已移居台湾的旧同事蒋雅文（Mandy），Kenny指公司同期出道的歌手们感情一直非常好，特别提及与Mandy的深厚情谊，透露双方一直有联络，因为同年出道、住同一区，所以有段时间非常熟，也感谢对方身在台湾也二话不说帮手拍片。

谈及首场嘉宾容祖儿在台上哭成泪人，Kenny笑著抱怨道：“边有人做嘉宾上台喊成咁！”他坦言自己也被现场气氛感染，不禁都眼湿湿，笑指或许是年纪渐长，让人更懂得珍惜，也因此变得更容易感触。