《2025年度叱咤乐坛流行榜颁奖典礼》记者招待会今日（20日）在昂坪市集举行，谢安琪挽著林家谦出场，而魏浚笙Jeffrey则以挂住几抽提子上身，相当抢镜。

记招结束后，家谦与Jeffrey一同受访，Jeffrey自称是致敬“菩提老祖”，而家谦则赞他一睇就知“大抽”。谈到家谦可以跷著女神Kay的手出场，他说：“佢话冇信心，有啲惊，可能今日比较大风，话不如一齐行，我话系咪㗎，佢话佢都想，就陪佢一齐。”对于有冇信心攞奖，家谦：“呢啲奖心入面已经有好多，（记者：奖唔怕多。）都唔怕少，都无所谓，心中富有。”今届MIRROR全员缺席，场面似乎不及以前热闹，不过家谦就觉得比想像中墟冚，因为他原本以为大家三号风球要去避风。

早前有网民表示睇Jeffrey玩综艺其实几难顶，指他表现不专注，又不理解游戏规则，若非生得靓仔实在难以包容。而Jeffrey却亲自回复这个半赞半踩的留言，更自爆有ADHD（专注力不足及过度活跃症），直指：“完全明！有时我都好炆憎（𤷪𤺧）自己点解理解得咁慢又做唔到当刻就get到玩咩。”

访问中Jeffrey再谈起这件事，透露已求医：“佢话我好恍神，我睇到我都认为系咁，所以即刻走去睇医生，之后发觉真系有问题，真系对症下药呀！医生都确诊咗，轻微。”他指药可食可不食，但自己都想改善这些症状，又说：“佢话如果你真系想集中啲就食药啦，但系如果平时活动又真系唔系好需要要嘅，我平时都会打坐，喺一个宁静环境反省吓自己。”除了ADHD， Jeffrey之前都讲过有湿疹，家谦即“林医师”上身叮嘱：“唔好食咁多提子，湿疹唔系咁好㗎。”

Jeffrey主演新片《杀手#4》入围本届金马奖提名名单，不但荣获五项提名，更是今届获得最多提名的港产电影。他坦言“有得做已经好开心”，预告届时动作连场，即场邀请家谦去睇首映，家谦谓：“首映就我自己入去首映，我自己第一次睇咪叫首映啰，唔一定要join你嘅首映。”

谈到早前陈奕迅（Eason）接受郑裕玲访问，大赞林家谦可爱，他笑言：“我怀疑佢唔系讲我，系讲TY（Tyson Yoshi）。（记者：佢系讲你）成日都系咁，好口甜舌滑，个女都系咁。（佢个女点赞你）包包可爱啲，佢讲嘢都好cute！”被问会否跟Eason的女儿CONSTANCE康堤（包包）合作，家谦觉得顺其自然，免得带给任何人压力，至于对方平时如何称呼家谦，他说：“Uncle乜？Uncle Terence？死啦我都唔系好记得，都冇呀，就咁‘hi’，可能平辈，死啦我系咪平辈，当friend，所以都好casual。”

Tyson Yoshi月前在意大利与太太Christy举行婚礼，近日再回港补摆中式婚宴，不过家谦和Jeffrey都冇去，家谦说Tyson指到时有不同群组的人，他去有机会引起混乱；而Jeffrey就非常清醒：“冇，我意大利去咗啦。（阿正都有去香港𠮶个）阿正冇去意大利，婚礼费事去两次，同一个人，人情两份。（林家谦：你食都可以食多餐）我平时自己都有晚餐食啦。”