《2025年度叱咤乐坛流行榜颁奖典礼》记者招待会昨日（20日）举行，冯允谦（Jay Fung）、云浩影（Cloud）；以及谢安琪（Kay）、江若琳（Elanne）分别在记招后受访，云浩影表示今年对歌手和歌曲奖信心不大，因为暂未有一首歌跑出。

Jay Fung指自己今年出了广东歌、英文歌，希望做更好的音乐，但未有考虑会否得奖，有奖攞当然感恩和开心，因为可以报答同事们的努力，但都是先做好音乐为主。去年失落男金后，Jay Fung坦言有失望，也有歌迷替他不值，认为去年其成绩比陈卓贤更值得“男金”，Jay Fung表示：“每一年都系咁样，做好自己音乐，如果有人欣赏，或者得到咩奖项我都系好开心。或者如果得唔到都好，我都会戥其他人开心，因为每个人都好努力，唔系净系我自己一个。（有Fans戥你唔抵，觉得今年点都要系你）呢啲都唔系我决定到，净系做好自己音乐，每一年都系要做啲人哋喜欢嘅作品，我自己又喜欢嘅作品，咁就过到自己个关。”

云浩影参加了“试当真”的大型综艺《墨鱼游戏2》，另一参加者邓兆尊早前在直播透露，游戏时间太长，由早上10点玩到夜晚7点才完成了第二个游戏，自己不得不与森美、钱嘉乐夹计“早死”，Cloud就认为拍摄时间长是正常的，她说：“我觉得始终要兼顾100人系正常嘅呢个时间，同埋大家要化妆，我哋证件相都系当日先影，我觉得大会都安排得好好㗎喇，又有饭团食，自己合身嘅衫咁样，因为拍摄不嬲都系呢啲时间，就算拍MV都好，我哋都拍好耐，所以我就觉得好玩亦都辛苦，但系都系正常、值得嘅。（觉唔觉得太早死？）系啰，唔知点解咁早死，但系我觉得可能我嘅运气喺第一关（狐狸先生）用晒，早知我就排后啲！本身谂住唔紧要啦，勇敢啲，原来应该要褪后少少。”

而谢安琪在记招上跷住林家谦手臂出场，她解释因为一个人行红地毡会害羞，幸好家谦主动问要不要跟他一起行，Kay大赞她是超乖的世纪暖男：“我以为佢讲吓，点知佢真系拖住我一齐行，不过佢𠮶种方法有少少敬老feel，我略嫌呢度争咗少少，如果佢型少少或者Hea少少就啱feel啲。佢头先有少少战战兢兢，多咗！”江若琳连续两年回归《叱咤》，她透露今年会与老公儿子去台北倒数跨年，1月1日搭飞机回港直奔亚博，留低两父子在当年“只揪”，会较为辛苦，不过Kay就跟她分享，当母亲不在身边，小朋友反而更乖。

今次记招上，Kay与Elanne是大前辈，问会否感到时光飞逝，Elanne直言恐怖：“好恐怖呀，头先有队组合系Form one！我生得佢出！”Kay自爆新女团Honey Punch刚刚找自己集邮，成员跟自己女儿差不多大：“佢哋最细𠮶个队员啱啱13岁生日咋，直头好似我个女Kakaball咁，我个女都8岁，同佢跳舞𠮶啲Buddy好多都系10岁、11、12岁，其实差唔多，所以犀利，乐坛新陈代谢好健康！”对于曾否幻想仔女都有日做新人，Kay笑言若到时自己仍在乐坛就会觉得好威，似亚马逊森林，又不用再找林家谦拖自己，拖返儿子张瞻就可以。她觉得儿子唱歌好听、女儿跳舞有潜质，但未敢畀压力二人。

Kay：“唔知点解，我老公凑小朋友，以前仲要换片年代𠮶啲，我谂住佢实会喊、会求救，同埋明白老婆嘅重要，点知啲细路跟住佢，立即变乖，好爽！片都换少几条！好奇怪，叫佢食就食，瞓就瞓，所以我叫佢放心。（记者：小朋友虾你？）佢哋又唔系虾我，好少嘢就好娇纵，对住爸爸，佢会好直接‘食啦’，佢就食啰，爸爸话‘你攰啦？瞓啦。’咁佢又瞓喇㖞，所以妈妈平日啲语气可能系自己攞嚟，太温柔。”

由于MIRROR将缺席《叱咤》，记招上亦不见人，连带镜粉都消失，被问会否感冷清，Kay反而认为：“今日好多唔同歌手嘅fans平均分布，另一种光景又几好睇，今日都好热闹。”而Elanne则谓：“我都系，今日我啲fans话终于霸到位喇，佢哋上年霸唔到位，今年我见到我啲fans都已经可以入到嚟，我觉得系另一个景象啰真系。”