前女团Beanies成员黄健怡（Winky），今年以个人之姿踏上音乐旅程，继年初《小人国》后再推新作《超级市场关门前》，同样是她的个人创作，并邀得黄伟文（Wyman）填词、黄兆铭编曲、陈考威监制，更有Tim@Dear Jane担任MV导演，得前辈们倾力支持，Winky感激之余，坦言内心仍有很多挣扎与不安。

新歌是Winky首尝以爱情为题材的抒情歌，她说：“要好赤裸裸咁样呈现自己嘅内心，学歌词话斋‘像我这种性格，只表面勇敢，心底不潇洒’，其实唔净系讲爱情，喺家庭、关系甚至系工作上都啱用。喺做音乐嘅路上，遇到好多面对选择嘅时候，喺外人眼中，好似好大胆，其实入面有好挣扎同不安。”《超级市场关门前》描述社会给予女性既定的期望，促使女性在时限内结婚。但作为女性又应不应该被这些规限，迫使自己调整自我价值和要求，去配合社会的期望？

对于爱情，Winky直言从未有太大憧憬：“只系拍过一次拖嘅我，其实都唔知咩系爱情嘅情况下，就同对方一齐咗，所以讲到结婚呢个题目，对我嚟讲实在太过陌生。系咪真系要将货就价？我觉得而家嘅时代同以前唔同咗，或者以前𠮶个年代好多人30岁前就会结婚生仔，我觉得如果只系为结婚而结婚，会宁愿慢慢等真正能够同我可以相处过下半世嘅人。”她透露经常被朋友和同事问何时拍拖，Winky自言个性较独立，认为自己一个都很开心：“点解一定要有男朋友？尤其我系创作歌手，反而需要更多空间时间去创作，相对地嚟讲，我会觉得生活得更加自在。”

这次已经是Winky与Wyman的第三度合作，直言收到歌词时大感震撼，她说：“真系好有共鸣，好似畀Wyman睇穿咗真实嘅我，将我心里面嘅说话写晒喺份词入边咁，非常感谢佢送呢份词畀我。记得有次喺欧洲做嘢，我就约咗Wyman出嚟食饭，我哋一直都系网友，𠮶次系第一次见。成餐饭冇讲过下首造咩歌，但系就分享咗我哋生活上嘅小经历，我相信Wyman了解咗好多我嘅个人特质，所以佢写咗呢份词俾我。”她坦承自己就如歌词提到般，只是表面勇敢，心底不潇洒，尤其今年Winky选择离队独自发展：“系好大转变嘅一年，好多选择都要自己去做决定，好多时我嘅呈现可能系好勇敢，甚至好潇洒，其实我嘅内心绝对有好多嘅不安，惊同担心。”

她又大赞陈考威是非常特别的监制，亦是她在歌手路上的大恩人：“佢真系教导同比咗好多心机去同我倾，造《我和爱丽丝绝交了》𠮶阵，系佢揾Wyman帮我填词，好surprise Wyman一句答应咗，之后就开始咗我哋嘅网友关系。”Winky又指Tim同样是陈考威帮忙牵线，对方给予很多意见：“今次系我第一次拍咁需要演技嘅MV，仲有段一边化妆一边喊嘅独脚戏，最后要强颜欢笑。当知道有呢段剧情，真系好紧张。”为力求完美，Winky更特意找老师学演技，坦言是过去数个MV里最有挑战性。