《2025年度叱咤乐坛流行榜颁奖典礼》于今晚（2026年1月1日）假亚洲国际博览馆隆重举行，去年开完首个红馆个唱的邓丽欣（Stephy），首夺“我最喜爱的女歌手”奖。森美颁奖前，先叫大会展示当年二人2004年合作电影《甜丝丝》的海报。

她哽咽讲感受：“我系同自己讲系唔可以喊嘅，我多谢森美，好多谢叱咤903！我对上一次上呢个颁奖台，系23年前，当时系攞新人奖，攞完呢个新人奖之后我落返呢个台，我觉得我离呢个台好远。我唔知几时可以再上返嚟攞奖，之后我坐咗喺台下都好几年，然之后我一直望住好多嘅歌手上台攞奖，我都好羡慕，但系我唔系羡慕佢哋攞奖，而系我羡慕佢哋可以好自信咁企喺台上面唱歌。𠮶段时间我有迷惘过，又想逃避过，亦都有怀疑过，但系我从来冇放弃过！因为我知道前面仲有好多人相信我，仲有好多人一直等紧我，所以我一直都向前行，无论行得几慢，无论行得几细步，我都一直向前行，好多谢今次每一个有投票俾我嘅每一位，你哋真系推咗我上嚟，原来唔放弃一直向前行，真系可以上得返嚟嘅！好多谢你哋每一位，系你哋成就咗呢一个咁励志嘅故事，我好想将呢个励志故事去送俾所有……而家如果呢一刻系觉得条路好难行，唔知再点样行落去，或者有怀疑嘅所有人，请你哋千祈唔好放弃请你哋一定要相信自己，继续向前行，无论向前行嘅𠮶一步有几细步都好，一定要继续，只要你哋向前行，唔好放弃，你哋一定行得到你哋想去嘅目的地，一定可以揾到属于你哋嘅舞台，亦都好多谢，一直相信我嘅歌迷， 2026年祝大家平安快乐！”之后她唱出歌曲《立断》。