“《this is OUR STAGE》声秀毕业演唱会”将于本周日(18日) 晚上在麦花臣场馆举行，《声秀》十六强学员包括冯熙燮、柯雨霏、胡子贝、张津铭、徐惠晴、布子殷、陆卓谦、冼奕瑜、胡港丰、司徒泆、陈卓怡、林洁心、甄敏芳、周智敏、萧凯恩和颖乔会透过他们的歌声向一众导师致敬，感谢他们无私的教导，一起齐心完成这个具有特别意义的毕业演唱会。

日前胡子贝、陆卓谦Jeffery和甄敏芳Jenny相约去了band 房，子贝负责键琴，Jeffery弹结他，他们二人加上Jenny夹band夹得不亦乐乎，Jenny的导师苏永康（阿公）、子贝与Jeffery的导师吴浩康（Deep）也到了band房探班，耐心教导三位学员如何如何做好“毕业的意义”。

Deep先说：“今次演唱会对你哋嘅要求会严谨过之前做节目，因为你哋而家已经系专业歌手，以前比赛𠮶阵如果有乜闪失都系决定你留唔留到喺度，你哋就算冇谂过赢都好想留低，过往叫你哋享受舞台其实系好苛刻嘅要求，但系今次演唱会真系对你哋有呢个寄望。”

阿公接著说：“每个学员都要尽量做好自己，譬如你要练好你要唱嘅歌，呢个show始终唔系一个个人演唱会，有合作嘅部份，合作嘅部份其实系讲求协调，你哋由去年五月开始聚埋一齐，大家可以过咗咁有意义，咁有趣嘅大半年系好难得。今次系一个毕业演唱会，点样去做好毕业嘅意义？我首先觉得除咗要突出自己之外，都要凸显返过往呢八个月嘅友谊，大家互相扶持行过嘅日子，我觉得呢啲日子只会喺你人生出现一次，所以大家要珍惜。”“以前你哋比赛嘅心态真系好似好想去serve评判，因为评判会决定你哋嘅生死，但今次我觉得作为一个专业歌手，做现场另外一个好需要去训练嘅伎俩就系你哋点样同观众交流，因为以往你哋比赛𠮶阵可以系瞌埋眼纯粹搞掂自己𠮶part，感动到你自己同评判就得，但系做演唱会系唔得嘅，要同观众有交流，呢一样嘢其实系经验慢慢累积返嚟。其实我对你哋咁多位学员都有一个期许，希望你哋每一个喺台上面嘅表现都系比你哋比赛嘅时候更加好，呢个系对你哋自己嘅交代，同埋对买飞入嚟睇你哋嘅观众嘅交代。你哋已经做咗歌手，你哋唔系净系同一齐比赛𠮶班学员斗，系同成个乐坛𠮶千几二千人斗，成件事已经变得仲难，所以我会要求嘅系你哋嘅演出会唔会比上一次好呢？呢个亦都系你哋嚟紧嘅日子好需要做到嘅嘢。”

三位学员亦把握机会询问导师的专业意见，Jenny : “阿公，喺节目上面我哋系以作为学员嘅身份去演唱，依家我哋已经成为一个职业歌手，系一个咁大嘅舞台上面应该要有一个点样嘅改变？”阿公回应她说：“以前我会同你哋讲，你要想像第八行以后嘅观众都会听到你唱歌，而家系要八十行以后嘅都要听到。将来如果你哋有机会去红馆，再大啲或者去到启德，喺你练习嘅过程中，如果只系用同一个力量对晒咁多个场馆系唔啱嘅，呢个经验系要你哋自己慢慢去累积。”Deep 补充说：“假设我企喺一个一千人嘅场馆嘅台上面，我都系用一个二万人场地嘅方法去project，而家嘅首要点都当咗佢两万人场做选择。”Jeffery问：“如果我喺彩排嘅时候我个Ear Mon听得唔好，我应该点样做？”Deep 说：“千祈唔好有任何不满嘅样出现。”

子贝 ：“我哋比赛嘅时候系唱比评判听，但今次系演唱会系唱俾观众听，我想问吓老师我哋唱返比赛嘅歌，同喺演唱会唱同一首歌有咩分别？”阿公：“其实都系好在乎你哋喺比赛𠮶阵能唔能够感动人，你感动到嘅话你就已经成功咗，其实你哋平时练几多，就拎返几多出嚟。”“现场气氛会令到你嘅肾上腺高咗，尤其是第一个出场嘅歌手，边个系第一个出场？好似系子贝你，咁你要小心啲啦，通常导演会同你讲你系第一个出场唱，帮我炒热个气氛，本来你打算用70%嘅力，最后你就出咗85%，咁就有机会Over咗，呢样都系经验，慢慢你就会体会到。”Deep补充说：“阿公讲得啱，无论边个听你唱，你嘅目的都系要感动佢，我哋希望尽量满足到观众，但系你都要明白一件事，冇一个人可以去满足到呢个世界所有人，我都听过有人讲Michael Jackson唔识得跳舞。我哋只可以返去最原本嘅就系呢个编曲我应该点样唱？呢份词又应该点样唱？又或者系我想透过呢个表演想人哋点睇我？”