一连两场嘅“TWINS 25周年1314新春限定粉丝见面会”昨日（13日）于西沙GO park举行，这次是Twins出道以来首个大型Fans Meeting，别具意义。向来疼锡Twins的经理人霍汶希（Mani）当然有到场支持，见证两个女的重要时刻。而开show前，汤怡（Kathy）亦神秘现身，送上祝贺二人25周年蛋糕，认真有心。场内亦展出了八套二人历年来的经典舞台服装及头饰，让fans可以近距离疯狂打卡，十分有心思。

Twins 25周年粉丝见面会

这次FM找来好友“农夫”担任MC，期间，Twins唱出《发梦见过你》、《你最红》、《孖宝668》、《相爱25年》及《忠粉》五首歌，又边唱边落台跟fans作超近距离接触，全场high爆！之后又跟fans玩估歌仔、写挥春游戏、不同组合的合照及全场大合照。 唱完《忠粉》后，台下fans举牌点歌，Twins宠粉模式全开：“好啦，每首唱少少啦。”随即唱出《双失情人节》、《黑色喜剧》、《冬令时间》同《天对地》，绝对福利满满。

阿Sa叫fans要Keep住热情

现场播放二人“成长”片段，当看到以前颁奖礼片段时，阿娇感触话：“好多回忆呀。”阿Sa笑说：“好搞笑呀睇返啲颁奖礼𠮶啲片，𠮶阵时啲镜头会拍到你哋㗎嘛，我真系觉得你哋好劲，打锣打鼓，哈哈。”阿娇话：“系呀，成场都系你哋把声。”阿Sa即肉麻表白：“其实全场其他歌手啲fans都好劲，但我觉得你哋真系最劲！令到我哋好有面子啊，哈哈。”粉丝即刻自动波吹BB，全场歌迷更好有默契地嗌阿娇阿Sa，气氛即时升温。

随后阿Sa指十分喜欢这种形式见面，还趁机叫fans找回当年的热情，“我觉得呢几年都弱咗少少啰你哋，哈哈。”阿娇和应，更着fans“要揾返个Passion。”阿Sa续说：“你哋要保持个初心㗎嘛！好似我哋咁！要保持个能耐、保持个精神。虽然你哋个年纪、我哋都系啦，大家越嚟越大，但系都唔可以‘老兀兀’咁样㗎嘛，我喺台度都唔会呜⋯⋯ 咁㗎嘛。”她更分析可能以前没有电话，大家才能十分投入，然后又问：“可唔可以变返以前呀？”全场即时大叫不停，阿Sa最后话：“嗱，以后记住我哋去到边度都要咁呀，勿忘初心呀。”

社恐阿娇零怯场

临完场前，二人分享感受。阿娇先说：“首先好多谢大家一路以嚟咁支持我哋，有一啲二十五年一直喺度、有啲系新嘅、有啲系中间加入，虽然我哋唔系成日都可以见面，但系我哋都会成日挂住大家，所以希望以后多啲呢啲线下嘅活动，等你哋唔好咁望穿抽水。”

随后更自爆有社恐，太接近人会紧张，“但系今日我冇，呢个场地真系好warm，我今日完全冇怯场、冇紧张、非常好。”而阿Sa坦言出场前十分紧张，“虽然开演唱会都好紧张，但呢个系fans meeting， suppose就系同啲最熟、最friend嘅fans一齐见面，但唔知点解好紧张，可能系好耐冇见，亦都可能系咁样嘅形式嘅fans meeting真系第一次。平时开演唱会，你哋系好远，但呢度大家系好close，所以可能因为系咁样就有少少紧张，所以好多谢大家今日嚟到呢度同我哋一齐玩。”最后二人逐一跟fans hi bye，首场见面会于温馨感人又笑声不断的气氛下结束。