阔别香港专场舞台超过两年，人气乐队ToNick终于宣布回归！今次佢哋拣喺5月1日劳动节开骚，于Backyard@AXA Wonderland举行《Backyard Live: ToNick 我是你的洗碗机》音乐会。今次唔止系一场户外Band Show，ToNick四子更决定将演艺圈最神秘嘅“后台禁区”搬上台，邀请全场观众一齐参与“开骚拜神仪式”，将现场变成大型“自己人”屋企派对。

从愤怒Band仔进化“暖男洗碗机”

自2024年九展演唱会后，ToNick虽然一直有喺各大音乐节见大家，但乐迷最恨嘅始终系近距离接触。等咗两年几，呢班曾经满腔热血嘅“Band 仔”已经踏入人生新阶段，由“愤怒”变做“爱惜”。

今次演唱会主题《我是你的洗碗机》，正正系ToNick四位成员（恒仔、小龟、Ryan、晨曦）步入“成熟男”嘅心声：“今次嘅主题系讲男女关系，有好多人就算变到阿伯都唔识得同另一半相处，成日吵吵闹闹又或者不瞅不睬。点成熟地处理关系并不在于年纪，而系在于心态。到时入场睇吓我哋有乜分享啦！其实ToNick都冇咩大改变，都会keep住做音乐出show、同其他单位合作。我哋同fans互相睇住对方成长，依家同佢哋沟通嘅方法亦都唔同咗，唔一定净系show先见面，可以平时都互相关心吓！”

ToNick“某成员”笑言男人去到某个年纪，最重要系识得“既来之，则安之”，只要另一半开心，屋企就快乐，世界就和平。所以我哋已经做好洗碗抹地、任劳任怨嘅觉悟。

ToNick开放一千个名额零距离互动

今次ToNick再度选址AXA Wonderland，但就玩转新花样，利用Backyard呢个全新场地模式，务求拉近同大家嘅距离。现场空间特别强调“Homey”同“亲密感”，仅仅开放 1,000个名额，令台上下可以真正做到“零距离”互动。

ToNick 兴奋指：“我哋嚟过呢到好多次，但今次想透过 Backyard 模式玩啲唔同嘅嘢，想同一千人一齐用‘爱’发电，玩爆个场！”

ToNick演唱会模式创新

除了场地革新，今次最爆嘅point莫过于“全场拜神仪式”。

平时净系得Artist同Crew先可以参与嘅开骚传统，今次竟然邀请埋观众参与，届时会有充满仪式感嘅切烧猪环节。最令乐迷惊喜嘅系VIP门票福利，除咗有签名海报同合照，仲会获赠极具创意嘅小礼包（围裙及抹手巾），最夸张嘅系竟然包含“拜神烧猪一客”，令唔少网民大嗌：“真系当正大家系自己人，成件事好暖！”