DJ Tommy是香港著名DJ，90年多次代表香港远赴外国参加世界DJ大赛，是至今世界排名最高的香港DJ。多年来活跃于本地乐坛，参与很多本地音乐制作，既是LMF的成员，又与陈冠希和陈奂仁合组唱片公司CMD，后来亦成为农夫经理人。

笔者在很久以前已在网上看过他当年在世界赛的片段，可谓目不瑕给。后来学习DJ后，更加明白个中难度，心表尊敬。数年前有幸在朋友的婚礼中与DJ Tommy相遇，只敢攀谈几句。直至最近在工作上有幸再次相遇，便主动邀请DJ Tommy接受访问。一连两篇专栏，将与读者回顾DJ Tommy过去30多年的音乐历程。

波盛：你一开始系点样接触电子音乐同DJ﹖

DJ Tommy：细个𠮶阵去旺角啲唱片舖录歌，𠮶阵喺信和、荷李活商场好多唱片舖，有好多DJ。我成日去录歌，录啲Remix呀录啲Billboard嘅Prince、Michale Jackson。跟住会听到啲DJ版，将《爱情陷阱》整到10分钟，“这陷阱、这陷阱”10次跟住“阱、阱、阱”咁样，觉得好得意，就开始钟意听Remix。喺屋企就用Cassette机录电台，录一次“这陷阱”就Pause，等下一次“这陷阱”出现就再录，好似整第一个自己嘅Cassette带Remix咁。

之后同一个屋邨入面有一个介绍我去做灯光音响嘅朋友，话识一个朋友个舅父系DJ，系以前𠮶啲Disco好劲嘅DJ，问我去唔去佢屋企学下。𠮶阵我大约13定15岁倒，就去佢屋企，见到佢将啲Modern Talking、Brother Louie，仲有啲Eurobeat喺度Mix。但佢唔教我哋嘅，所以我个Friend去咗1、2次就无去，我就坐喺度睇咗几个礼拜。

直到有一次佢叫我埋去，就教我点样驳歌。 佢就讲𠮶啲Break度有8拍，教我数，我试咗几次就识咗啲基本，知道喺个空档无音乐得个鼓嘅时候驳第二只歌，跟住又教我数BPM一分钟几多下，但畀我玩咗两次就无再理我。就系咁识咗依啲基本嘅DJ概念。

波盛：仲记唔记得第一次DJ系点﹖

DJ Tommy：𠮶阵时系做灯光音响先，去人哋𠮶啲Party例如宴会、船P、香港大学陆佑堂、中大𠮶啲唔知咩堂，又有啲楼上P，好多酒店嘅Ballroom。我去Setup啲灯光音响，推喇叭，整啲灯，去驳线嘅啫。咁我平时都有喺我公司试下玩，有一次有一个DJ失场，偶然畀咗个机会我，老细知我识识地就话：“无DJ呀，你去打啦。”𠮶阵我就觉得：“正㖞！有得打碟！”我平时都系玩吓咋嘛。咁玩完一晚无人投诉，就咁样开始。

𠮶次之后好好彩，老细喺我执完喇叭、驳完线、成手黑妈妈做好晒啲苦工，就叫我去打碟，打完就搬返啲喇叭返公司。𠮶阵时好辛苦，老细唔会特别畀多份人工，但我又无所谓，学到好多嘢好开心。

同埋开心在另外有一间灯光音响公司揾我剩系去打碟，第一次唔驶只手黑妈妈咁打碟。系打酒店，好似夜晚6至8定6至9，要播当年电影好兴嘅慢歌畀人听住食饭。听完9 点几就砌个Dance Floor出嚟，咁就开始Party，打好多中文歌，然后有少少英文歌，张国荣、谭咏麟、麦当娜、Michael Jackson、《YMCA》依啲一定会有，咁就成为正式有钱嘅DJ工作喇。𠮶阵时去好多依啲酒店，最常去就系信德中心𠮶边间酒店入面有个Ballroom，圣诞、倒数都必定去𠮶度。

波盛：后尾点解会有参加DJ比赛嘅念头﹖

DJ Tommy：后嚟喺中国城夜总会做嘢，都剩系打灯。因为𠮶度已经有DJ，我𠮶阵未去到咁劲嘅Level，咁个DJ叫Louis，佢好过瘾成日返到嚟都好开心。我哋有个Control Room后面有个休息室，入面有个电视仔同录影机。有次Louis拎咗录影带返嚟话：“有个好劲嘅DJ比赛，睇唔睇﹖”我记得𠮶阵系1991年，佢播出嚟系1988年世界DMC比赛，睇到系DJ Simon。我一路都知依个人，因为有去听佢Noon D打碟，系神奇到不得了。我会落去扮跳舞，其实系为咗听佢，好精彩。

我一路都知佢有去DMC比赛，但𠮶阵时无可能睇到，唔似依家有YouTube。跟住居然有录影带可以睇到佢喺伦敦同其他国家嘅DJ比赛，仲入到十强。然后又睇到1988年嘅世界冠军，叫Cash Money，玩得好夸张，就知道原来捽碟有得咁玩。跟住就去所有唱片舖，见到黑人封面嘅碟我就买，买咗返去仲发现有几只系啲人比赛用嘅歌，我记得有只系Public Enemy嘅《Rebel Without A Pause》，好似煲水声咁。

𠮶阵仲知道3个月后香港有比赛，喺屋企就当自己系𠮶个世界冠军，Copy佢咁练。每日喺度捽，觉得似喇㖞，就睇1990年嘅比赛片段，又喺度练。就系咁，睇完录影带之后嘅3个月，我就参加咗1991年香港DMC比赛。

波盛：去到比赛现场有无好紧张﹖

DJ Tommy：𠮶阵有两晚初赛，Foul咗之后先去到第三Round决赛，有成三、四十个DJ。𠮶阵见到𠮶啲DJ系某某Club嘅DJ，我觉得佢哋系大明星嚟。然后我记得我Soundcheck𠮶阵乱咁玩，突然间啲DJ就走埋嚟问我叫咩名同我倾计，我就好紧张咁就识咗佢哋。

我报名比赛𠮶阵都未改DJ Tommy依个名。跟住香港DMC个负责人系外国人嚟，叫Alan James，佢就问我个名叫DJ咩。我心谂：“死喇⋯”跟住咁啱有个Label叫Tommy Boy，我就识Tommy依个字，咁就同佢讲我叫Tommy，咁样乱嚟㗎咋。

到夜晚比赛介绍我𠮶阵，就叫DJ Tommy。跟住就赢咗个香港冠军，然后就第一次去英国比赛。我到依家都好记得，唔知系咪发紧梦，玩咗几个月就宣布我系冠军，𠮶阵时心谂：“死喇咁大镬。”𠮶阵时觉得有啲大镬㗎，完全唔知点算，去到英国更加大镬，又唔识倾计因为英文唔叻。

波盛：依家回想返，你觉得系咩原因令你自学3个月就有咁好成绩﹖

DJ Tommy：我都唔知点解，可能因为Copy得快手，其实唔知点学又唔会有人教你，咁就耳同手势跟到足，咁就识咗。我永远都系自学但教唔到人，我系属于视觉记忆𠮶啲人。睇90年冠军𠮶个DJ David嘅录影带，啲手快到咁样，咁咪学佢啰，不过剩系学到半桶水唔系好叻。

我1991年第一年去世界DMC比赛，有三十几个国家，Foul剩10个入决赛，咁我第一回合就Foul咗。去到现场睇完全系两个世界，同录影带睇完全两个Feel嚟。现场听啲嘢实净好多，我就好皮毛玩咗三个月，𠮶个系我唯一一次比赛紧张。因为我喺香港比赛唔紧张，我唔知自己做紧咩，乱咁玩谂住做完就算，仲识到啲DJ好开心添。

𠮶阵去到英国比赛见返晒录影带入面𠮶啲DJ，睇见啲人咁劲系好紧张，好多失误，都知道自己入唔到，跟住就睇埋决赛，仲识到1990年嘅世界冠军，即系我抄佢𠮶个，同佢影到相好开心。𠮶阵我同自己讲，1992年一定要再参加，一定要入到决赛，因为觉得自己未够水准，反正都嚟到依度见识到个世界，话比自己听要认真对待依件事，好好睇睇，第时有录影带睇都可以保留一个美好嘅印象，好似啲人影写真咁。

波盛：既然你立定决心要认真对待依件事，返到嚟香港之后你点样备战下一年嘅比赛﹖

DJ Tommy：返嚟香港就辞咗音响灯光份工，去咗做信差，每日好快做完嘢就返屋企练习。星期六日完全唔出街，一日练八个钟左右，要练返啲基本功。练完基本功就要谂自己应该点样去比赛，见到世界赛啲人咁犀利各出其谋，我就谂一套自己嘢去比赛，然后系咁练，又揾DJ Galaxy帮我拍低啲动作。同时间又学英文，学刘家杰𠮶啲基本嘢起码同人沟通到先。夜晚返Bar City做Part-time DJ，呢几样嘢夹埋，咁就全力为咗比赛。

1992年又赢到香港比赛，𠮶次都惊赢唔到，但系对自己𠮶套嘢好有信心，玩𠮶阵就唔惊。最后1992年世界赛入到决赛攞第八。𠮶阵最开心系识咗啲DJ，有书信来往，佢会寄啲录影带畀我，我又寄啲录音带过去，有好多依啲书信好开心。

我仲记得𠮶年完咗比赛喺英国第一次去Rave Party，我留咗喺英国，Paul Oakenfold就叫我去BBC电台录个圣诞Mix，因为佢同带我去嘅外国人好熟。我仲去咗Paul Oakenfold屋企饮茶，坐到夜晚佢就揸车带我去个黑妈妈嘅地方，有一个Warehouse，跟住佢入去打碟，啲外国人癫晒好好睇，我就喺DJ Booth隔离睇住佢打碟。依个就系我第一次去Rave Party，𠮶阵时都唔知咩嚟。

波盛：𠮶阵攞咗个世界排名第八，又喺英国见识过Rave Party之后，返嚟香港有无谂过要喺依方面做啲嘢﹖

DJ Tommy：无呀，香港嘅环境你谂到都做唔到，因为无人识依样嘢。92年香港边有人识Rave，𠮶阵全世界去唱K，一个人无能力影响到咁多嘢。𠮶阵好惨，好多DJ无工开，个个去晒唱K，Disco都执晒笠。

然后香港DMC比赛又改咗制度，我就转咗做电脑绘图，喺中环返工朝九间五都几正㗎，然后喺Bar City返下Part-time咁。做到1996年，个上司突然同我讲咗样好奇怪嘅嘢，话如果要升职都要大学程度，言下之意即系我几难升到，剩系升晒我隔离啲人，唔知点解个感觉怪怪地。

咁桥96年香港DMC个赛制又改返，我都仲有同啲DJ交流，咁就决定再参加下玩下啦。不过𠮶阵好惨，香港剩返好少DJ参赛，以前三十几个到得返几个，咁我就好彩又赢咗香港冠军，𠮶年世界DMC就去咗意大利比赛。

波盛：我第一次睇你嘅比赛片段，就系1996年赢咗第二名𠮶次。我记得你用身体唔同地方去捽黑胶，打打下仲拎咗罐可乐出嚟饮，好印象深刻。你仲记唔记得系点样构思呢一Set出嚟﹖

DJ Tommy：比赛6分钟啦，都有一个Flow喺度。开头点样吸引人，中间有啲好听嘅嘢，有一个高潮，然后临尾Ending有个爆发。其实我比赛临尾个Ending都唔系好爆发，𠮶阵我度咗半年左右，我觉得唔系好好㗎，但系都过到自己𠮶关，不过如果够时间我会再好啲嘅。

至于点解临尾捽到好快，系因为92年去英国听到一种音乐叫Jungle，好似Drum n Bass，好过瘾好鬼快，所以临尾就用个“1-2-3”嚟捽个Jungle Beat。其实依家觉得唔系咁好，但都OK嘅，啲评判钟意就得。𠮶阵去编排，就谂边一段做边啲手势。

同埋饮可乐𠮶个呢，你哋Video睇得唔清楚，我系玩得好兴奋突然揿停个音乐，啲人嘅反应系：“做咩事呀﹖”我就喺地下攞罐可乐出嚟饮叹一叹先，然后我有自己印嘅黑胶，有个Sample系“er”，咁我就啱返时间啱返位扮返个“er”嘅动作，咁啲人就觉得好过瘾，即系有啲小gimmick畀人记得。

因为早几年喺初赛见啲评判恰眼瞓，我又做过香港比赛嘅评判，就了解咗评判依样嘢，睇得多都几攰。你做评判睇咁多DJ，个个都差唔多个个都好劲㗎喇，但系边度记得你做过啲咩嘢，你要有一下令到佢记得，我就谂咗呢个饮汽水，咁就真系work。我谂啲人其他嘢好似唔系好记得，但系依个记得就已经够，我𠮶阵就谂啲咁嘅嘢，都好神奇可以做到。

波盛：知道自己攞第二嘅感觉系点﹖咁多年嚟你点睇依个世界排名第二嘅名衔﹖

DJ Tommy：谂住入到围已经好开心，𠮶个年代所有香港啲DJ都话入到决赛当攞世界冠军㗎喇。成日听到依句，咁我就一定要入到决赛唔好衰畀大家睇，即系要为香港DJ争光。跟住入到决赛，宣布第二名𠮶下，个感觉系：“哗！入三甲﹖仲要第二﹖”真系完全谂唔到，因为我谂住去玩㗎咋嘛，同啲DJ好Friend大家吹下水倾下计，开开心心，入到决赛就得㗎喇。

真系好开心，算系攞过最劲嘅排名，即系读书又唔叻，攞到依个世界第二㖞。我唔知呀，我成日都觉得自己唔够㗎，值唔值攞到呢个世界第二呢﹖但系人哋觉得你值先系正确㗎嘛，唔好谂自己值唔值，自己真系有努力嘅。攞到世界冠军同第二我觉得个感觉差唔多，我已经觉得好夸张，咁嘅资质攞到世界第二已经好满足，满足到不得了。

波盛：96年攞咗第二之后，有无谂过下一年再冲击第一﹖

DJ Tommy：其实够㗎喇。不过喺97年𠮶阵，比赛前两、三个月香港个Agency同我讲，上届个世界冠军唔去㖞，因为上届世界冠军系有得自动晋级挑战卫冕，咁佢唔去就叫我去，话可以攞住卫冕世界冠军依个名衔，直接去比赛又唔驶初赛。

但我系觉得点玩呀，世界赛我得两、三个月，又要谂又要练，无可能㗎。跟住个Agency系咁怂恿我，其他DJ又系咁怂恿我，其实我唔系想去攞返个名次，我系想攞返个开心，识咗啲DJ无乜几可飞过去同唔同国家DJ玩呀嘛。

咁我就戆居居走去练，其实系非常之唔够，就攞住卫冕冠军嘅名衔直接入决赛。我知自己死硬㗎喇，但都好好彩啲评判都畀咗我第六。其实我自己就觉得第几都唔紧要，唔系好好嘅，只系贪过瘾有免费机票飞过去同啲DJ玩，因为依个紧要过比赛。

我都重视个比赛嘅，我都谂咗啲好特别嘅嘢，希望赢唔到三甲都有啲嘢畀人睇到啦。我谂到用橡筋箍住个唱针，然后喺度弹就会有啲声，谂住依啲应该有记忆点。点知初赛有个巴西DJ又系有橡筋，仲要弹到啲巴西鼓好Groovy嘅。咁𠮶阵比赛有啲书出返㗎嘛，跟住啲人就写话我可能见到个巴西DJ咁做，所以即刻抄返依样嘢咁做。

我𠮶阵心谂：“你喺意大利边度揾条橡筋畀我﹖”我都唔知原来意大利有橡筋卖，你点练呀﹖无得练㗎㖞，即时做系无可能，有啲人就唔会明有啲嘢其实唔系咁。同埋其实世界之大，唔同DJ都会谂到一啲好精彩嘅嘢，有机会同一时间谂到。你以为剩系得你独有﹖其实依个世界好多叻人，仲要好过你。

本月主要聚焦DJ Tommy成为DJ的故事，以及历年参加DMC世界DJ大赛的心路历程。下月专访他将分享获得世界排名第二后，进入本地流行音乐工业的经过，以及近年与好友DJ Galaxy的各种音乐企划。