胡枫（修哥）将于6月7日举行人生第6次红馆演唱会《修哥九五至尊无限枫骚演唱会》，今次他以94岁之龄开骚，再破自己纪录。为迎接明年的95岁生日，大会以“九五至尊”为主题，修哥今日亦以一身金光璀璨的西装出席记招，在多位美女陪同下登上龙椅，气势十足！天星娱乐陈淑芬在活动上宣布将为今次演唱会申请“举办演唱会最年长华语艺人”健力士世界纪录，而今次演唱会的主办单位亦同样破天荒有48个，比上次足足多一倍有多，其中有珠宝品牌送上价值超过港币10万元的“金龙盘柱”摆设。

>> 更多香港及澳门演唱会及活动介绍 <<

曾志伟落实任嘉宾　修哥拒碌人情卡邀契仔女爆曾孙或上台

修哥每次开演唱会，台上都十分势闹，圈中好友、契仔契女轮流做嘉宾，而今日活动上播出曾志伟的片段，他亦是今次演唱会目前唯一公布的嘉宾，修哥说：“我70岁第一次演唱会，佢已经做嘉宾，真系唔话得呀！”而对于其他嘉宾阵容，修哥指自己一无所知，亦不好意思碌人情卡：“我而家真系唔知，主办邀请嘅，但系主办就懒神秘，唔讲有咩嘉宾。我开过咁多次，好多人做过嘉宾，我自己唔好意思出面请。（问：有冇好多契仔契女同你讲话下次开骚一定要预我？）冇冇冇冇冇，唔理喇，佢哋嚟就OK啦，开心啦。”修哥之前试过在演唱会舞台上四代同堂，被问今次会否再次邀家人上台，他说：“屋企人就算上台，都系啲曾孙上台，唔知监制有咩指示，等佢哋讲咗我先同曾孙讲。”

贴心开下午场方便长者睇完返屋企食饭　笑言冇劲歌热舞

修哥有“舞王修”之称，讲到今次会否在台上劲歌热舞，他笑言：“老实讲，劲歌就麻麻哋，冇就唔会㗎啦，因为90几岁，唔可以郁得太多，总之有娱乐性。”今次演唱会开骚时间为下午3时30分，原来这是修哥贴心安排，他透露：“有一次我夜晚开骚，有人话畀我听，有位长者等车等到1点 ，我个心非常之唔安乐，以后开show都系日头开，等长者可以返去食饭，唔使等车等得咁夜。”至于他自己，他指平时作息时间为晚上12点，每日瞓足9小时，几十年来都如此，想早睡都不成功。

感谢陈淑芬劳心劳力申请健力士纪录　暂不考虑加场：90几岁仲加？

对于演唱会将申请健力士世界纪录，修哥坦言自己未有多想，表示：“在我嚟讲，我都未曾谂过破咩纪录，不过呢次陈太就真系用好多心机，总言之佢讲嚟讲去，讲好多次，同对面商量，然后先至得到成功，佢劳心劳力，真系好多谢佢！”修哥圈中人缘旺，问到是否已欠下很多飞债，他笑谓：“系呀，但我一句话‘呢啲唔关我事㗎，有咩就同主办讲。’我净系专注歌唱、表演。”最后，修哥被问会否考虑加场，但他说：“加场？唔好喇啩，90几岁仲加场，我都希望加场，不过我体力唔知有冇。”