DJ Tommy在上月专栏与大家分享了他的DJ生涯，初学3个月便获得香港冠军，继而代表香港远赴外国参加世界赛。DJ Tommy的多个身份亦为人熟知，包括作为LMF成员之一，与陈冠希和陈奂仁共组唱片公司，亦是本地Hip Hop组合农夫的经理人。本月来到DJ Tommy访问的第二回，将与大家回顾他在主流音乐圈的精彩故事。

波盛：当初系点样踏足本地主流音乐圈﹖

DJ Tommy：𠮶阵92至93年左右我完咗世界第八之后，识咗一个滑板舖老细，日本人嚟叫Tabo。佢喺尖沙咀金巴利道有间滑板舖，佢好钟意DJ，𠮶阵时我有上去玩，因为佢有个唱盘喺度。原来佢啲衫系Sponsor软硬天师，见到林海峰同葛文辉过嚟攞衫，跟住就识咗软硬。

佢哋要去做郭富城红馆演唱会嘅表演嘉宾，唱《广播道Fans杀人事件》，跟住叫我去帮佢哋做DJ播黑胶。咁我拣咗几只好快Beat嘅Hip Hop，就喺只歌中间“咩咩咩我哋支持你”𠮶度捽下，咁就搞掂咗。好乱嚟，咁就喺红馆做咗依件事。

好早期喺92至93年，都有好多捽碟嘅Session，帮杨振龙、谭国政、Patrick Delay。佢哋𠮶阵时系三剑侠，做好多草蜢、电子嘢，又有Remix咁。𠮶阵时攞个唱盘去佢哋Studio捽咗好多，有叶蒨文、草蜢，多到我都唔记得。

到96年世界比赛之后，返嚟谂住揾嘢做，都唔知点。跟住林海峰出Solo碟，就揾我：“喂！Tommy！帮我做歌。”我心谂：“吓﹖我乜鬼都唔识㗎㖞，做歌﹖”可能佢见我识捽下以为我识做歌。咁好啦整啦，做佢只大碟《的士够格》，做咗只《世纪大战》讲踢波嘅。咁我就买咗啲Synthesizer、Sampler同Sequencer，唔识嘅全部嘢都系，驳线乱咁弹，喺录音室就做咗几只歌出嚟。

又做咗只《甜甜蜜》，系佢同胡蓓蔚唱，只歌系Gary Tong嘅。跟住Gary话想我整只R&B，佢又好似以为我识咁㖞，觉得我系DJ一定识啦。咁我又整，揾啲音乐人帮我弹，其实都唔系好R&B。但佢啲Chord配得几好听，又整咗个Arrangement比佢。做咗林海峰只碟之后就好多嘢做喇，真正入咗香港乐坛。

波盛：《的士够格》依只碟之后，系咪就系做LMF﹖

DJ Tommy：帮林海峰录只碟入面有一只叫《喂喂喂》，系亚龙大嘅，我喺录音室帮亚龙大Davy捽碟。捽完之后Davy话“正㖞！Tommy仔，你呢啲好过瘾㖞。我有队组合叫LMF，喺呢队Band抽个鼓佬，𠮶队Band抽个歌佬，不如你又Join埋嚟，玩㗎咋贪过瘾㗎咋。”咁我话好呀，跟住就上咗佢哋Band房，有唱盘喺度又有黑胶，咁我就乱咁捽。

“Tommy仔畀个Loop我。”咁我就畀个Loop佢，全部啲人我都唔识。跟住有人喺度打鼓，跟住呢度又喺度Rap，咁我唔理系咁捽。跟住系录低咗，Davy就砌咗只歌出嚟，之后又叫人Rap又弹嘢，就做咗LMF依样嘢出嚟。系玩㗎咋，乱咁玩都唔知做紧咩，大家斗乱嚟，好好笑咩都乱嚟，但其实个个都身怀绝技。

跟住我记得之前MC仁有队嘢叫N.T.，我帮佢做过一啲歌捽碟嘅。跟住有一队叫Screw，有个歌佬叫William，好鬼劲㗎把声。咁我就介绍畀Davy，依个阿仁依个William，好过瘾㗎。依个Rap得好犀利，𠮶个把声又好鬼穷凶极恶，不如一齐嚟玩，就组成咗LMF第一只《屋邨仔》𠮶只碟。𠮶阵喺Bar City搞咗个新碟发布会，做咗第一场Show。跟住只碟好似好好卖，就开始做LMF，签咗畀唱片公司。

跟住我记得之前MC仁有队嘢叫N.T.，我帮佢做过一啲歌捽碟嘅。跟住有一队叫Screw，有个歌佬叫William，好鬼劲㗎把声。咁我就介绍畀Davy，依个阿仁依个William，好过瘾㗎。依个Rap得好犀利，𠮶个把声又好鬼穷凶极恶，不如一齐嚟玩，就组成咗LMF第一只《屋邨仔》𠮶只碟。𠮶阵喺Bar City搞咗个新碟发布会，做咗第一场Show。跟住只碟好似好好卖，就开始做LMF，签咗畀唱片公司。

波盛：开始咗LMF之后，DJ方面仲有无继续﹖

DJ Tommy：癫呀𠮶个年代，好多Rave Party，果阵时做好多场。香港好多夜晚嘅Club、天光Party，不断咁样做，连续咁样做好多，又做音乐又DJ，跟住又LMF表演，做歌。同时间又要飞来飞去，大陆、韩国、日本、欧洲。跟住又去过莫斯科，去咗莫斯科𠮶个红场定克里姆林宫𠮶度，系一个奥林匹克年青人奥运会之类嘅嘢，入到去好大个Hall，跟住就同个英国DJ打碟。

佢系89年定90年嘅世界冠军，又系𠮶阵时比赛识咗佢。跟住好多年青朋友入嚟Party，我唔知玩咗咩，究竟系捽碟定系播歌呢，我都唔记得做咗咩。真系好多呢啲回忆，唔知自己做过咩，但系又记得𠮶个画面好过瘾好开心。

LMF做《屋邨仔》之后，大懒堂就签咗畀华纳，无得乱玩，开始真系录嘢要好认真做碟，又要做访问。𠮶阵时系好多，又去马拉做Show，我𠮶阵时都唔知点样做到咁多嘢。跟住华纳就话“DJ Tommy，你不如自己出只碟啦。”吓﹖以为我乜都识㖞你哋啲人。佢哋话：“你试下啦，第一个DJ出碟㖞。”跟住我就谂：“死啦！做歌㖞，我同Davy一齐做我去帮下手就得啫，自己做只碟大镬喇。”所以就做左一只EP顶晒栊，做左一只Remix跟住做左三只歌，咁就无啦啦出咗只碟喇。我记得我做自己碟好辛苦㗎。因为我做音乐乜都唔叻，我记得买咗好多音响、乐器、器材，摆喺度试下唔同声，Tune咗好耐，我记得瞓得好少觉，因为好多嘢做。

波盛：好似唱片公司咁讲，你系香港第一个DJ出碟，系一件事嚟。咁你𠮶阵做依只《Scratch Rider》嘅构思系点﹖

DJ Tommy：我嘅Concept就系尽自己能力啦，因为我唔系咁叻，尽做啦。𠮶阵时听好多Acid Jazz，谂咗只《大城故事》想做啲Acid Jazz嘅嘢，跟住另外一只就系好Hip Hop嘅就系《忍唔住要》，同埋阿仁嘅一定要。因为我觉得佢好鬼Snoop Dogg，整只类似咁嘅嘢畀佢Rap下。跟住𠮶个年代我自己好钟意听嘅MISIA，系日本R&B女歌手，咁就整只R&B啦。

因为林海峰𠮶阵叫我整只R&B我整得唔好，我要真系知道点整，跟住喺日本买𠮶啲歌嘅Chord嘅书，喺个Keyboard度弹，又几似㖞，咁就配返𠮶啲Chord。做林海峰𠮶只碟识咗胡蓓蔚，咁不如揾胡蓓蔚嚟唱啦，佢又唱得好有Feel，咁就做咗呢三只。跟住有只Remix LMF嘅就最好最简单㗎喇，咁就四只歌，尽我能力做咗自己嘅个人碟。

波盛：除咗自己碟，我见你之前有喺IG分享，话有段时间帮唱片公司做好多Remix。

DJ Tommy：系呀系呀，依家揾返我先知道做咗依啲，可能都仲有啲唔知。我有一期同Mark Lui合作得好密。我同黎明做咗一次《Sugar In The Marmalade》嘅Rave Party Event，跟住佢就好多歌揾我帮佢捽碟、整下啲Hip Hop Loop。

𠮶阵时做好多依啲Remix，跟住郑秀文系华纳嘅，我出碟佢又知我DJ，𠮶阵好兴“Fing头”音乐，咁就要做啲“Fing头”嘢。然后去台湾做宣传，走几场咁播个Medley。可能啲人讲返我先知，因为做咗太多，有好多呢啲唔知系唔系清醒嘅状态下做完就交咗货。

好记得陈奕迅𠮶个好笑，揾我做𠮶个人同我讲：“Tommy，你整只陈奕迅嘅Medley，最紧要快。”咁我唔知佢系要快交货定只歌嘅速度要快，我又无问清楚，我就整到好鬼快，交咗畀佢佢又OK得咗㖞。因为𠮶阵香港人普遍系要听依啲轻快㗎嘛，无可能做啲好有Mood，你觉得好有型嘅Hip Hop，都系畀夜场或者啲人屋企开Party听，咁应詃系呢啲。快！最紧要快！整快啲！

波盛：呢个阶段维持咗几长时间﹖

DJ Tommy：呢个状况由1996年维持至千禧年代头，跟住就有另一个状况出现，认识到农夫同Edison。应该系2002年定2003年左右，𠮶阵时我做LMF，做左只碟就储左经验做唱片，跟住就应该系Edison。佢《香港地》𠮶只碟揾MC仁先嘅，咁就唔知无啦啦叫咗我去一齐拍个MV，咁我就戆居居同啲人喺度揈下揈下。𠮶阵Edison同英皇差唔多完约，好似之后啲碟就可以畀佢话晒事想点就点喇，咁《香港地》只碟之后佢就话要做自己真系想做嘅Hip Hop。

之后仲有陈奂仁，陈奂仁同MC仁两个阿仁。MC仁介绍陈奂仁畀我识，话系新加坡Producer。陈奂仁就话：“Tommy，下只碟要做一啲Hip Hop，我想揾你一齐做。”又系好似当我乜都识咁。跟住就见Edison，做咗《嘥气》𠮶只歌。然后佢出自己碟之后又有自己唱片公司㖞，跟住叫我入去一齐做。𠮶阵我、佢、陈奂仁三个一齐开咗间Clot Media Division，就开始啰𠮶阵时。

波盛：遇到农夫之后你又挑战咗一个新岗位，就系经理人。有啲咩促使你有依个决定﹖

DJ Tommy：2002年左右喺一个DJ比赛见到农夫表演，觉得：“哗咁搞笑嘅﹖香港有Rapper Rap依啲咁嘅嘢嘅﹖”咁就识到佢哋。𠮶阵佢哋做完一只碟就同旧公司完约，我就话：“不如我帮你哋做啦。”因为我喺华纳𠮶阵时出自己碟，知道晒唱片公司𠮶啲运作呀嘛，派台呀，揾啲咩DJ呀。亦都因为我做自己碟𠮶阵时去访问，识咗好多当时嘅DJ，好多联系，咁就好多人教我点做啰。

佢哋啲Rap咁搞笑，笑住嚟润你咁样，不如试下帮佢哋做啦。𠮶时好过瘾嘅其实，啲人话：“Hip Hop边系咁㗎﹖好似佢哋咁Rap﹖”其实美国啲Hip Hop都有好多种嘅，系你哋听嚟听去都系Gangster Rap系𠮶种啫，有好多类似De La Soul、A Tribe Called Quest都系类似咁嘅做法嘅Rap，唔系凶毒𠮶种Rap，系用聪明啲嘅方法润你。

𠮶阵时就一脚踢咩都做晒。佢哋未识做音乐𠮶阵，我就帮佢做 Beat、录音，跟住Mixing、印唱片封套、揾人Design、揾人印碟、揾发行、派台、接Show、倾Show、收钱、揸保姆车，真系咩都做。因为我𠮶时觉得好易呀，一条友都做到。同埋我好彩，因为自己出碟𠮶阵时上电台，好多DJ都识识地，咁就易做啲。好感恩咁多位帮过我嘅人，咁做所有嘢都好容易啰。

然后《456Wing》就多啲人识啦，跟住就做《风生水起》。𠮶阵我又做Edison，要帮佢做好多音乐上嘅嘢，又出Show，佢个潮牌好多嘢又要影相做宣传，又做一啲Mixtape Hip Hop𠮶啲嘢。咁我又做紧农夫㖞，我就话不如签佢哋入去啦，我可以一次过做晒，唔驶我做下你又要帮佢做。推埋入去咁就签咗，咁我就有其他人手，唔驶我一脚踢。

农夫佢哋讲返个故事，话我试过瞓8秒。因为佢哋嚟录完音之后，又要后期做Mixing、Tracking，逐条Track Dub一次，又要做Mastering同其他湿湿碎碎，我记得真系好少瞓觉。有次佢哋嚟录音Break紧𠮶时，我记得我喺张梳化度恰，跟住突然间醒，好精神。跟住佢哋话：“老细你瞓咗8秒咋㖞，你醒㗎嗱﹖”我都唔知瞓咗几耐，其实因为太多嘢做，恰一恰已经好精神。

波盛：回望依段时期，由灯光、音响开始，演变到今时今日嘅身份，个感觉系点﹖

DJ Tommy：我觉得每做一样嘢，你就喺𠮶个时间学定另一样嘢，当然可能有关系或者你好钟意。好似我做灯光音响𠮶阵就学DJ啦，跟住有人揾你做DJ。DJ完之后，又可以做到音乐㖞，叫你做歌㖞。跟住你做歌又会识到唱片公司啲人，知道啲运作，你又可以做唱片公司，签人、出碟，变咗做唱片公司嘅其中一个成员。几好玩㗎，真系好好彩。

* 原本打算将DJ Tommy的访问只分成上、下两篇，不过在后期的整理过程中，发现内容丰富众多。最终决定会将历时2小时的访问，分成上、中、下三篇。下月将会有DJ Tommy与多年好友DJ Galaxy的故事，以及他的工作近况。