一连三场的《农夫全香港最好笑嘅演唱会》今日（10日）在红馆圆满结束，农夫在后台受访，坦言公布开骚消息后，很多朋友、前辈都问他们紧张与否，C君说：“其实我每次都会答佢，最紧张已经过咗，最紧张就系有冇人嚟睇，咁我哋系希望我哋度咗嘅嘢有人嚟睇，我哋先测试到到底好唔好呢，所以最紧张𠮶样嘢过咗，多谢大家支持。”今次因为母亲节缘故，尾场在下午举行，农夫说：“因为我觉得夜晚真系要陪妈咪，我哋冇理由要人拣陪阿妈定系我。”又指在母亲与农夫之间，冇人会拣农夫。当问到为何下午场都不邀请早瞓的郑裕玲（Do姐）做嘉宾，二人一唱一和，C君：“呢个系下午场，如果我哋真系好希望可以招呼到Do姐，我哋要开清晨场。（陆永：早上7点半，下午场2点半都偏夜。）7点半佢可以做紧运动入嚟，呢度又真系体育馆嚟㖞！”

预告10月伙张继聪开《人夫集团》　性质似“须根SHOW”

尾场没有Do姐，但观众席上就有黄子华，讲到为何不索性邀子华上台合唱，他们说子华出现已相当之畀面，又怕毫无准备下捉对方上台，子华根本唔记得《上善若水》歌词。不过农夫透露，筹备期间子华都十分帮手：“我哋度咗好多个唔同嘅show名俾佢拣，佢都有讲点解呢个好，点解呢个唔好，甚至乎下一个show嘅show名，佢都俾咗好多意见。”

他讲的下一个show，正是10月与张继聪的《人夫集团》，张继聪连续做足三场嘉宾，合唱《我连婚都够胆结》，讲到下个show性质，陆永说：“《人夫集团》都有几多唔同嘅歌，但系佢又唔系净系一个演唱会咁样。”C君补充：“又唔系一个栋笃笑，娱乐综艺节目咁……综合娱乐舞台show。喺戏曲中心搞，所以你会谂到系好舞台嘅一件事，但系你又唔好谂到佢系粤剧，系好少有呢个种类，可能最接近都真系要讲返子华神，须根show。”农夫指自小受子华、吴镇宇、张达明的《须根Show》薰陶，入晒脑，所以都想做一个“娱乐综合舞台show”。问到今次票价会否仍然是$780良心价，农夫表示：“我哋两个冇问题，不过阿聪收好贵，所以最后票价会系合理价，我哋拉返低佢，佢又擡返高。”

揭古天乐成“农作天下”老板缘由　张继聪牵线

上一场农夫邀请古天乐做嘉宾，并正式宣布古生原来是他们公司“农作天下”的老板和投资者，农夫讲到合作的缘由，表示由张继聪帮手牵线：“适逢𠮶阵时，我哋完咗经理人合约，准备自己开公司，我哋都谂住有啲project要做，唔系净系自己for艺人管理，有啲嘢想搞，搞到啲嘢有人投资。古生系最出名投资嘅老板，咁系咪下下搞一件事就逐个揾投资呢？会唔会我成间公司都会有人投资吓？咁就揾古生啰，阿聪叫我哋去揾，话觉得呢个project几好，就话不如你揾吓，咁我哋去揾啰，咁就OK喇，都好好㗎，倾咗一段时间。”农夫指古生曾上过公司一次，C君：“佢上嚟真系赞，哗，呢度乜都冇嘅？”陆永则指古生虽然平时惜字如金，但那次在公司俩了差不多两小时，又很感谢对方爽快答应做嘉宾，一send完邀请讯息已获秒回。

赞麦玲玲零提水唱新版《风生水起》：以往会帮佢入

另一位常设嘉宾麦玲玲演绎新版的《风生水起》，重新改过歌词，在网上引起极大回响，C君感谢玲玲姐要重新学和背歌词，又要抽时间录音和不停练歌：“如果你仔细啲睇，我哋以往都会帮佢入𠮶首歌，系完全冇㗎今次，佢今次完全靠自己。”陆永更谓，平时合唱都会在玲玲姐身后拍她背脊示意入歌，但今次她独自一人在升降台，只可以自己搞掂，他又说：“都对佢唔住，因为其实我哋唔系可以俾到太多飞佢，你知玲玲姐，平时人哋嘅演唱会佢都买好多飞，佢冇份演出都买定好多飞，你唔知佢做咩，但系呢一个佢有份演出嘅，佢系需要好多好多飞，但系我哋真系唔能够俾晒咁多飞佢，所以如果开多六场都冇问题，佢会全部买㗎嘛！佢全部买到晒㗎！”玲玲姐今次的Hip Hop Queen长袍造型非常密实，等了三晚都没有除下长袍，展示自己长场，陆永：“咪系啰，你哋问返佢啦，佢做咩唔开出嚟？”至于玲玲姐投诉这件衫著得她好肥，他们异口同声：“咁又唔系件衫！”

感谢阿娇飞回香港做嘉宾　有《草莓苹果橙》才衍生《学海无涯》

而头场嘉宾Twins，农夫感谢钟欣潼（Twins）特地飞回香港，过程中还要排练，除了是“还债”也是友谊，他们又表示：“我哋嘅嘉宾，我哋唔系希望你唱一首歌跟住我哋去换衫，系希望有意思，系因为佢哋𠮶首歌（《草莓苹果橙》），先至Inspire咗我哋做呢首歌（《学海无涯》）㗎嘛，咁其实系一个好似见返个时代咁，佢哋都会觉得，系㖞啱㖞。”至于是否一早知道阿Sa结婚，C君就回答：“唔系唔系，早少少，一早？有几早啫？15年前知呀？”